SPORTS

Itinalaga na ni US President Barack Obama si NBA Legend Shaquille O’Neal bilang sports envoy sa Cuba.

Ito’y bilang hudyat ng pagbabalik ng mainit na ugnayan ng dalawang bansa.

Nakatakdang magtungong ngayong araw si Shaq sa Cuba upang pangunahan ang basketball camps para sa kabataan at ipamalas kung paano makatutulong ang sports sa pag-develop ng academic, leadership at teamwork skills.

Kasama ng 4-time NBA champion sa pagbisita sa Havana si Dallas Mavericks Assistant Coach Kaleb Canales.

By  Drew Nacino

Pinuri ni dating Honorary Lakers Vice Pres. Earvin ‘Magic’ Johnson ang pagkakahugot ng Los Angeles kay Brandon Ingram.

Ayon kay Johnson, mahina sa outside shooting ang Lakers kaya’t kailangan nito ang isang tulad ni Ingram na 6-foot-9 ang height at produkto ng Duke University.

Sinabi naman ni Rookie Lakers Head Coach Luke Walton, dating assistant sa Golden State Warriors, na hindi sila nababahala sa timbang ngayon ni Ingram na 190 pounds at 18 taong gulang lamang.

Kumpiyansa si Walton na kahit may kapayatan, hindi maglalaon ay lalakas at bibigat din si Ingram.

Kaugnay nito, nakuha naman ng Orlando Magic si Forward Serge Ibaka matapos ang multiplayer trade sa Oklahoma City Thunder.

Nakuha naman ng Thunder sina Guard Victor Oladipo, Forward Ersan Ilyasova at gayundin ang karapatan kay Power Forward Domantas Sabonis kasama ang 11th pick sa NBA Draft.

Samantala, narito ang mga nakapasok sa top five ng NBA Draft:
1. Ben Simmons ng Philadelphia Sixers
2. Brandon Ingram ng LA Lakers
3. Jaylen Brown ng Boston Celtics
4. Dragan Bender ng Phoenix Suns
5. Kris Dunn ng Minnesota Timberwolves

By  Jelbert Perdez 

Inaasahang magiging number 1 at 2 pick sa 2016 NBA Draft ngayong araw na ito sina Ben Simmons at Brandon Ingram.

Dahil dito, itinuturing ng panalo ang Philadelphia Seventy Sixers at Los Angeles Lakers.

Ang Seventy Sixers ang may karangalang unang pumili ng player na magiging bahagi ng draft at posible umanong kunin nito ang serbisyo ng 6’10 power forward mula sa Louisiana State University na si Simmons.

Bukod ditto, ipasasagot din sa Philadelphia ang 24th at 25th picks ng first round.

Ikalawa namang pipili sa NBA draft ang Lakers na inaasahang kukunin si Ingram na small forward mula sa Duke University.

By  Judith Larino 

Tinanggap na ni PBA legend Ramon Fernandez ang  pagiging commissioner ng Philippine Sports Commission o PSC .

Matatandaang  una  nang ini-alok ni incoming President Rodrigo Duterte kay  Fernandez  ang  posisyon  ng pagka-Chairman  ng  PSC   ngunit   tinanggihan  ito ng  tinaguriang El Presidente   ng Philippine Basketball.

Dahil  dito, napunta ang pamumuno sa PSC kay William Butch Ramirez.

Inaasahan namang  makikipagkita sina Ramirez at Fernandez kay outgoing PSC Chairman Richie Garcia sa susunod na linggo.

Ang  Tatlo pang commissioners  ng PSC  ay pupunan bago mag July 1.

By: Ralph Obina

Bigong makuha ng Phoenix si 3-year NBA veteran at former Kentucky University Standout Deandre Liggins bilang regular import sa season-ending PBA Governor’s Cup na sisiklab sa July 15.

Ayon sa bagong Fuel Masters Coach na si Ariel vanguardia, wala pa rin silang import hanggang ngayon.

Pero tiwala pa rin si Vanguardia, pumalit kay Koy Banal bilang chief tactician ng team, na makakahagilap din sila ng 6-foot-5 reinforcement.

Nasa bansa na ang Asian import ng Fuel Masters na si Lee Kwan Hee ng South Korea.

Mainstay siya ng Samsung Thunders sa KBL.

Bagong salta rin sa team sina Mark Cruz, Norbert Torres, Simon Enciso, Prince Caperal, Jonathan Uyloan, Mark Borboran at John Wilson.

By  Mariboy Ysibido