SPORTS

Pinatunayan ng Filipino boxer na si Marlon Tapales na siya pa rin ang kampeon kahit binawian na ng World Boxing Organization (WBO) Bantamweight Crown dahil sa pagiging overweight.

Ito’y makaraang matalo ni Tapales ang Japanese contender na si Shohei Omori sa 11th round via technical knockout sa Edion Arena, sa Osaka, kagabi.

Pinatumba ng Filipino southpaw si Omori ng kaliwang left uppercut na sinundan ng mga suntok dahilan upang itigil ng referee ang laban.

Aminado si Tapales na nangako siya sa kanyang sarili na hindi niya ibibigay ang belt nang walang laban.

Sa kabila nito, mananatiling bakante ang WBO Bantamweight crown.

By  Drew Nacino

*AFP Photo: Marlon Tapales of the Philippine (L) and Shohei Omori of Japan (R)

Nakahanda nang sumabak sa Barcelona Open sa susunod na linggo si World Number One Andy Murray.

Ito ay matapos siyang talunin ni Albert Ramos – Vinolas sa Monte Carlo Masters nitong nakaraang linggo.

Limang linggong nagpahinga si Murray matapos magtamo ng injury sa siko noong Marso.

Una nang sinabi ni Murray na sa Madrid at Rome lamang siya maglalaro bago ang French Open.

By Katrina Valle   

Nadepensahan ni Eduard Folayang ang kanyang one championship lightweight title matapos makuha ang unanimous decision win laban sa challenger na si Ev Ting sa main event ng “One: Kings of Destiny” sa Mall of Asia Arena.

Ito ang unang title defense ng kanyang korona na naagaw niya mula kay Japanese Shinya Aoki noong November 2016.

Dahil sa panalo ay umakyat na ang fight record ni Folayang sa 18 wins at 5 loses habang nalugmok naman si Ting sa 13-4 record.

Samantala, nanalo sa kani-kanilang laban ang ating mga kababayan na sina Kevin Belingon, Honorio Banario, Gina Iniong, Danny Kingad, at Robin Catalan habang natalo naman si Eugene Toquero.

By   Jelbert Perdez

*Photo from ONE Championship

Naibulsa ng defending champion Cleveland Cavaliers ang panalo kontra Indiana Pacers sa Game 3 ng NBA Playoff Series.

Tinalo ng Cavs ang Pacers sa iskor na 119-114.

Nanguna sa panalo ng Cavs si Lebron James na kumana ng 41 puntos.

Kasabay nito, naungusan na ni Lebron sa third spot si Kobe Bryant sa NBA All Time Playoff scoring list.

Hawak na ngayon ni Lebron ang 5,641 puntos, habang nangunguna pa rin sa may pinakamaraming puntos sa kasaysayan ng NBA si Michael Jordan na sinundan ni Kareem Abdul Jabar na nasa ikalawang pwesto.

By Ralph Obina

Sumailalim sa operasyon si dating World Number One Tiger Woods dahil sa pananakit ng likod at binti nito.

Ayon sa kwarenta’y uno (41) anyos na golf legend, naging maayos naman ang kanyang operasyon at unti-unti na aniyang naibsan ang sakit na kanyang naramdaman.

Dahil dito inaasahang anim na buwan na namang mawawala sa competitive golf si Woods na huling naglaro sa European tour noong 2014.

By  Ralph Obina

Out muna sa Game 2 ng NBA Playoffs si Kevin Durant ng Golden State Warriors laban sa Portland Trailblazers.

Ito ay makaraang ma-injured si Durant sa Game 1.

Ayon kay Warriors Coach Steve Kerr, hindi nila isusugal ang sitwasyon ni Durant at hihintayin na lamang nila ang tuluyang paggaling nito.

Sa kabila nito, kumpiyansa si Kerr na mapupunan ng iba pa niyang manlalaro ang kawalan ni durant sa Game 3.

Matatandaang sa Game 1 kontra Portland ay nakagawa si Durant ng 32 puntos at sampung (10) rebounds.

By Ralph Obina

Kumpirmadong nagdadalantao si World Number Two Serena Williams.

Ayon sa ulat, mahigit apat na buwan nang buntis ang trenta’y singko (35) anyos na American tennis star.

Dahil dito, out muna sa mga torneo si Williams kabilang ang French Open, Wimbledon at US Open.

Sa susunod na linggo, nakatakdang masungkit muli ni Williams ang top spot sa world rankings kung saan ay maaari niya itong maidepensa kung makakapaglaro ito ng isang tournament sa loob ng labindalawang (12) buwan pagkapanganak.

Matatandaang Enero nang huling maibulsa ni Williams ang kampeonato sa Australian Open.

By  Ralph Obina