SPORTS

Nasungkit ng Barangay Ginebra San Miguel Gin Kings ang kanilang ikatlong sunod na panalo sa 2017 PBA Commissioners’ Cup.

Itinumba ng Ginebra ang NLEX Road Warriors sa score na 101-92 sa kanilang paghaharap sa Cuneta Astrodome sa Pasay City, kagabi.

Nagpakawala ng double-double na 18 points at 13 rebounds si Justin Brownlee para sa Gin Kings habang nag-ambag ang kanyang mga teammate na sina Veteran Forwards Joe Devance ng 18 points at Japeth Aguilar ng 17 points.

Kumamada naman ng 16 points si Wayne Chism para sa NLEX subalit hindi ito naging sapat upang makasilat ng kahit isang panalo ang koponan na nananatiling kulelat sa kartadang 0-7.

Mayroon ng tatlong panalo at isang talo ang Barangay Ginebra na nasa ikalimang puwesto.

By  Drew Nacino   

Photo Credit:  PBA Images

Abanse na sa third round ng Monte Carlo Masters si World Number Two Novak Djokovic.

Ito ay makaraang idispatsa ni Djokovic ang kalabang si Gilles Simon ng France sa iskor na 6-3, 3-6 at 7-5.

Inamin ni Djokovic na nahirapan siya ng husto sa laban nila ni Simon dahil sa paiba-iba umanong momentum.

Susunod na makakaharap ng Serbian tennis star sinuman kina Russian Karen Kachanov at Pablo Carreno Busta ng Spain.

By  Ralph Obina

Sasabak nang muli sa tennis si two-time Wimbledon champion Petra Kvitova.

Ito ay matapos ang apat na buwang pamamahinga makaraang masaksak ito sa kanyang bahay sa Czech Republic noong Disyembre.

Ayon kay Kvitova, kanyang susubukan ang kanyang kapalaran sa French Open matapos maging maganda ang lagay ng kanyang recovery.

Matatandaang naging rank number 2 sa women’s tennis ang 27-anyos na si Kvitova noong 2011 habang kasalukuyan itong nasa ika-14 na pwesto sa world rankings.

Ang French Open ay magsisimula sa Mayo 22.

By  Ralph Obina  

Umarangkada na ang training ng Gilas Pilipinas bilang paghahanda para sa 2017 South East Asian Basketball Association Championships na gaganapin sa bansa sa Mayo 12 hanggang 18.

Labingpitong (17) player ang sumabak sa daily practice sa Kerry Sports Manila sa Taguig City.

Pinangunahan ng veterans na sina Calvin Abueva at Jayson Castro ang ensayo ng team kasama sina Raymond Almazan, Troy Rosario, at Allein Maliksi.

Namataan din sa practice ang ilang rookies gaya nina Matthew Wright, Roger Pogoy at Ed Daquioag habang sa ikalawang round na lamang training sumabak sina LA Revilla, Terrence Romeo at Von Pessumal.

By  Drew Nacino

*Photo: PBA Images

Pinataob ng Washington Wizards ang koponan ng Atlanta Hawks.

Nagtapos ang pagtutuos ng dalawang koponan sa iskor na 114-107, pabor sa Wizards.

Nanguna sa panalo ng Wizards si John Wall na kumana ng tatlumpu’t dalawang (32) puntos at labing apat (14) na assists.

Sinegundahan naman ito ni Bradley Beal na nakapagtala ng dalawampu’t dalawang (22) puntos.

By  Ralph Obina

Hawak na ng San Antonio Spurs ang unang panalo sa Round 1 ng Western Conference Playoffs.

Tinambakan ng San Antonio ang Memphis Grizzlies sa score na 111-82 sa game 1 ng kanilang best of seven series sa homecourt ng Spurs sa AT and T Center Arena, Texas.

Pinangunahan ni Kawhi Leonard ang Spurs sa score na 32 points at 5 assists habang nagpawakala rin ng 32 points si Marc Gasol para sa Memphis.

Sa ibang game, nasungkit din ng Utah Jazz ang buena manong panalo kontra Los Angeles Clippers.

Samantala sa Eastern Conference Division, hawak na rin ng Milwaukee Bucks 1-0 lead matapos ilampaso ang Toronto Raptors habang may isa na ring panalo ang defending NBA champion Cleveland Cavaliers laban sa Indiana Pacers.

By  Drew Nacino      

Naging mainit ang laban sa pagitan ng defending champions Cleveland Cavaliers kontra Indiana Pacers, sa pagsisimula ng NBA playoffs.

Nanalo ang CAVS sa pamamagitan lamang ng isang puntos kontra PACERS sa iskor na 109.

Nagbuslo si Lebron James para sa CAVS ng tatlumput dalawang puntos, habang dalawamput tatlong puntos naman ang ibinigay ni Kyrie Irving at labing puntos naman ang ibinuslo ni Kevin Love.

Puspusan din ang paggawa ng puntos nina Paul George na nakagawa ng dalawamput siyam na puntos at Lance Stephenson, para sa Pacers.

By: Katrina Valle

Nasungkit ng Atlanta Hawks ang ika-apat nilang sunod na panalo makaraang ilampaso ang kalabang Charlotte Hornets.

Nanguna sa panalo ng Hawks si Dwight Howard na nakapagtala ng labing siyam (19) na puntos at labindalawang (12) rebounds.

Dahil sa tagumpay, hawak ngayon ng Hawks ang ika-limang puwesto sa Eastern Conference sa pamamagitan ng apatnapu’t tatlong (43) panalo ng koponan.

Samantala, nasadlak naman sa ika-limang sunod na pagkatalo ang Hornets na mayroon lamang tatlumpu’t anim (36) na panalo sa serye.

By Ralph Obina  

Aminado ang Filipino figure skater na si Michael Martinez na nanghinayang siya sa kabiguang mag-qualify sa 2018 Winter Olympics.

Ayon kay Martinez, bagaman ginawa niya ang kanyang makakaya upang masilat ang 24th place sa katatapos lamang na 2017 World Figure Skating Championships sa Finland, sadyang magkaka-iba ang rules sa mga tournament.

Sa kabila nito, aminado si Michael na hindi pa rin siya nawawalan ng pag-asa na makapunta sa 2018 Winter Olympics sa South Korea.

Ito’y makaraang magkaroon ng tiyansa ang tinaguriang “Pinoy Ice Prince” na makapasok sa naturang patimpalak sa pamamagitan ng Nebelhorn Trophy Competition sa Germany sa Setyembre.

Kailangang makapasok sa top 6 si Michael sa nabanggit na torneyo upang mag-qualify sa Winter Olympics.

By  Drew Nacino

Inaasahang magbabalik-Pilipinas na ngayong Abril ang naturalized Filipino player na si Andray Blatche upang makasama sa training ng Gilas.

Kinumpirma ni Gilas Team Manager Butch Antonio na posibleng sa katapusan ng April dumating si Blatche mula China.

Ayon kay Antonio, nagpapahinga pa sa ngayon ang Gilas bigman matapos magkampeon ang kanilang team na Xinjiang Flying Tigers sa Chinese Basketball Association.

Sa ngayon aniya ay puspusan ang training ng national basketball team para sa 2017 SEABA Championship na gaganapin sa Araneta Coliseum, sa Mayo 12 hanggang 18.

Ang seaba ang magsisilbing ticket ng gilas upang makapasok sa FIBA Asia Cup sa Agosto.

By  Drew Nacino

Photo: FIBA