Panibagong karangalan ang ibinigay ng atletang si Eric Cray sa Pilipinas makaraang masungkit ang gintong medalya sa ika-22 Asian Athletics Championship sa Buhbaneswar, India.
Ito’y makaraang matapos ni Cray sa 49.57 seconds ang 400-meter hurdles kung saan, pumangalawa ang atleta mula sa Chinese Taipei na si Chen Chieh at pumangatlo naman si Jabir Mp ng India.
Una rito, nasungkit ni Mark Harry Diones ang silver medal para sa Pilipins sa triple jump habang bronze medal naman ang nasungkit ni Ernest Obiena para sa pole vault.
Sinasabing kasama ang tatlong atleta sa listahan ng mga manlalaro na sasabak sa Southeast asian o SEA Games na gagawin sa Kuala Lumpur sa Malaysia sa Agosto.
By Jaymark Dagala
Muling nagpakita ng bangis si Rafael Nadal matapos makapasok sa Last 16 ng Wimbledon.
Walang kahirap-hirap na pinataob ni Nadal ang kanyang kalaban na si Karen Khachanov kaya’t lalong lumalakas ang pag-asa niyang masungkit ang korona sa torneo.
Pasok na rin si defending champion Andy Murray sa last 16 makaraang gibain si fabio fognini.
Samantala, nangibabaw din si American tennis star Venus Williams laban kay Naomi Osaka dahilan upang mapasok na rin ito sa Last 16.
By Jelbert Perdez
Laglag na sa Wimbledon Open ang Japanese tennis star na si Kei Nishikori.
Ito ay makaraang idispatsa si Nishikori sa third round ng torneo ni 18th seed na si Roberto Bautista Agut ng Spain sa iskor na 6-4, 7-6, 3-6 at 6-3.
Aminado ang Japanese tennis star na naging maganda ang laro at lagay ng bola ng kanyang kalabang si Agut na dahilan ng kanyang pagkatalo.
Ito ang pinakamaagang exit ng 9th Seed na si Nishikori mula sa isang major tournament mula sa kanyang first round defeat laban kay Benoit Paire sa 2015 US Open.
By Ralph Obina
Magsisimula na sa susunod na linggo ang promotional tour para sa kontrobersyal na bakbakan nina retired at undefeated boxer Floyd Mayweather Jr. at UFC star Conor McGregor.
Ito ay kung saan inaantabayanan din ang unang paghaharap ng dalawa na gaganapin sa Staples Center sa Los Angeles.
Layon nito na i-promote ang kanilang laban na itinakda sa Agosto 26 sa T-Mobile Arena sa Las Vegas.
Samantala, matapos ang press tour sa Los Angeles sunod namang pupuntahan ng dalawa ang New York at London.
By Ralph Obina
Ibinasura ng WBO o World Boxing Organization ang hirit ng Games and Amusement Board o GAB na imbestigahan ang naging gawi ng referee at istilo ng scoring ng mga judges sa laban nina Manny Pacquiao at Jeff Horn sa Australia noong Linggo.
Iginiit ng WBO na hindi na maaaring mabaligtad ang desisyon sa naturang laban, maliban na lamang kung may pandaraya at paglabag sa mga batas.
Inanunsyo naman sa Twitter account ni WBO President Paco Valcarcel na maaaring isagawa na lamang ang rematch dahil nakasaad naman ito sa kontrata.
Matatandaang nabigo si Pacquiao na depensahan ang WBO welterwight title makaraan siyang talunin ni Horn via unanimous decision.
By Meann Tanbio
Magre-relax muna si Fighting Senator Manny Pacquiao matapos ang laban kay Jeff Horn.
Ipinabatid ni Pacman na lulubusin niya ang quality time sa pamilya bago mag trabaho muli sa senado sa pagbabalik ng sesyon sa Hulyo 24.
Kahapon ay sinamahan naman ni Pacman ang Pangulong Rodrigo Duterte sa pagbisita sa military headquarters sa Malungon, Saranggani at bumalik din sa kanyang mansyon pagkatapos.
Una nang pinasalamatan ni Pacman ang Games and Amusement Board (GAB) sa pagpapadala ng sulat sa WBO o World Boxing Organization para i-review ang laban nila ni Horn.
By Judith Estrada – Larino
Wagi sa second round ng Wimbledon ang Spanish tennis star Rafael Nadal.
Ito ay makaraang walisin ni two-time Wimbledon champion ang Amerikanong si Donald Young sa iskor na 6-4, 6-2, 7-5.
Bahagyang nahirapan ang fourth seed na si Nadal kay Young ngunit sa bandang huli ay nanaig pa rin ang diskarte at lakas ng beterano.
Matatandaang pinakahuling napanalunan ni Nadal ang kanyang ika-sampung French Open title noong nakaraang buwan.
By Ralph Obina
Umapela si Fighting Senator Manny Pacquiao sa WBO o World Boxing Organization na aksyunan ang sulat na ipinadala ng GAB o Games Amusement Board.
Ito ay may kaugnayan sa kahilingan ng GAB na suriin ang posibleng mga pagkakamali sa desisyon ng referee at mga hurado sa katatapos na laban ni Pacquiao kontra kay Jeff Horn.
Ayon kay Pacquiao, wala na sana siyang balak maghabol pero marami aniya ang nadismaya sa resulta ng naging laban nila ni Horn.
Nilinaw ni Pacquiao na hindi rin niya intensyong mabaliktad pa ang resulta ng laban nila ni Horn kung saan naagaw na sa kanya ng Australian boxer ang WBO welterweight title.
Bagkus, nagpahayag ng pagkabahala ang Pambansang Kamao na masira ang kredibilidad ng boksing kung hindi maaaksyunan ang mga ganitong reklamo o kwestyon.
Binigyang diin ni Pacquiao na ayaw niyang dumating ang panahon kung saan mamatay ang boksing dahil sa kawalan ng patas na desisyon ng mga officiating team.
By Krista De Dios / Ralph Obina | With Report from Cely Bueno
