SPORTS

Napikon si Top Rank CEO Bob Arum sa pag-ungkat ni dating 8th Division World Champion Manny Pacquiao ukol sa premyo sa laban nila ni Australian boxer Jeff Horn.

Ayon kay Arum, hindi dapat maging isyu ang pera dahil nakahanda naman na aniya ang bayad para sa Pambansang Kamao.

Binigyang diin ni Arum na sa Australia ginawa ang laban at hindi sa Las Vegas kaya’t may mga proseso pa aniyang kailangan pagdaanan.

Kasabay nito, sinisi ni Arum si Coach Freddie Roach dahil umano sa pagiging madaldal nito at pagpapalaki sa isyu.

Matatandaang nasa sampung milyong dolyar ($10-M) ang money purse ni Pacquiao sa pagkatalo nito kay Horn.

- Ralph Obina

Inaasahang magiging bigatin ang bakbakang Floyd Mayweather Jr. at UFC Star conor McGregor.

Dahil bukod sa maglalaban, bigtime din ang mga manunuod sa laban na kinabibilangan ni US President Donald Trump.

Ayon kay UFC President Dana White, nagpahayag ng kagustuhan ang Pangulo ng Amerika na personal na masaksihan ang naturang bakbakan.

Gayunman, ipinag-aalala umano ni Trump ay baka pagkaguluhan siya sa naturang laban.

By   Ralph Obina   

Determinado ang Gilas Pilipinas na depensahan ang kampeonato sa 2017 William Jones Cup na bahagi ng preparasyon para sa FIBA Asia Cup na gaganapin sa August 8 hanggang 20.

Ayon kay Gilas Team Manager Butch Antonio, kumpiyansa silang masusungkit muli ng Pilipinas ang korona sa naturang torneyo dahil maituturing na solid ang kanilang line-up.

Mula sa labindalawang (12) player, labingpitong (17) member na ng team ang ipadadala sa Taiwan kabilang ang import na si Mike Myers at naturalized player na si Fil-German Christian Standhardinger.

Nakatakda namang bumiyahe ang Philippine National Basketball Team, bukas para sa paglarga ng 39th Jones Cup simula sa July 15 hanggang July 23.

By  Drew Nacino

Sa kabila ng nalinawan nang pagkatalo laban kay Australian boxer Jeff Horn, wala pa ring balak si dating 8th Division World Champion Manny Pacquiao na magretiro.

Ayon sa Pambansang Kamao, mahal niya ang boksing at patuloy aniya siyang lalaban hangga’t hindi nawawala ang kanyang passion dito.

Sinabi ni Pacquiao na siya ay lumalaban para sa Diyos, kanyang pamilya, mga fan at para sa bansa.

Matatandaang sa isinagawang review ng WBO, pinagtibay ng mga independent judges ang pagkapanalo ni Horn sa laban nila ni Pacquiao.

- Ralph Obina

Napuno ng tensyon at kantiyawan ang unang press conference para sa laban nina Floyd Mayweather Jr. at UFC star Conor McGregor.

Napuno ang Staples Center sa Los Angeles kung saan hiyawan ang isinalubong ng mga fan sa pagpasok pa lamang ng dalawang fighter.

Nagbanta si McGregor na kanyang patutulugin sa loob ng apat na oras ang kalabang si Mayweather.

Pero ayon naman sa US undefeated boxer, tinuturing niya lamang si McGregor na gaya ng kanyang mga nakalaban noon na madali niyang napatumba.

Ang salpukang Mayweather at McGregor ay gaganapin sa Agosto 26.

By  Ralph Obina

Dismayado si dating 8-Division World Champion at Senator Manny Pacquiao sa isinagawang review ng World Boxing Organization o WBO sa kanilang laban ng undefeated Australian fighter Jeff Horn.

Sa isinagawang review, pinagtibay ng WBO ang pagkapanalo ni Horn via unanimous decision laban kay Pacquiao, noong Hulyo 2.

Ayon kay Pacman, ipauubaya na niya sa taumbayan ang panghuhusga dahil saksi naman ang mga ito sa nangyari sa Brisbane, Australia.

Hindi naman aniya dapat ikagulat ang pasya ng WBO dahil maka-ilang beses ng minanipula ang mga resulta ng laban.

Samantala, nirerespeto naman ng Games and Amusement Board o GAB, ang government sports-regulatory body na nagpatawag ng review ang pasya ng WBO.

By Drew Nacino   

Nakasungkit ng tansong medalya ang UST Salinggawi Dance Troupe sa katatapos na International Youth Fellowship World Cultural Dance Festival na ginanap sa South Korea.

Ipinanalo ng grupo ang sayaw nilang mula sa konsepto ng Flores de Mayo.

Ito ang unang beses na sumali ang UST Salinggawi sa world cultural dance festival na dinaluhan ng siyam na iba pang teams mula sa Africa, China, India, Korea, Thailand at Ukraine.

Ayon kay UST Salinggawi Vice President Daryll Romero, mayroon lamang silang isang buwan para paghandaan ang naturang kompetisyon na napanalohan ng team USA at Finland.

Ralph Obina

Inilabas na ng World Boxing Organization o WBO ang resulta ng isinagawa nilang review o rescoring sa kontrobersyal na bakbakang Manny Pacquiao at Jeff Horn.

Ito’y kung saan tatlo sa limang independent judges ang pumabor sa Australian boxer dahilan upang pagtibayin ang pagkapanalo ni Horn sa naturang sagupaan.

Ayon sa WBO, nakuha ni Pacquiao ang 3rd, 8th at 9th round ng isandaang porsyento, 80 percent namang naipanalo ni Pacquiao ang 5th round habang 60 percent sa 11th round.

Habang si Horn naman ay isandaang porsyentong nakuha ang 1st , 6th at 12th round, walumpung porsyentong nangibabaw si Horn sa 2nd, 4th at 7th round habang animnapung porsyento ang napasakamay ni Horn sa 10th round.

Dahil dito, malinaw anila na si Horn ang nanalo dahil limang rounds ang nakuha ng Pambansang Kamao habang ang Australian boxer ay nanalo sa pitong rounds.

Ikinatuwa naman ni Horn ang resulta ng review at sinabi nitong handa siya para sa rematch kay Pacquiao.

Matatandaang ang Games and Amusement Board ang humiling sa WBO para sa naturang review ng laban nina Pacquiao at Horn.

By  Ralph Obina

Kinagat ng bagong WBO Welterweight Champion na si Jeff Horn ang hamong rematch ni fighting Senator at Pambansang Kamao Manny Pacquiao.

Ito’y makaraang talunin ni Horn si Pacquiao via unanimous decision sa kanilang laban noong Hulyo 2 sa tinaguriang Battle of Brisbane.

Sa panayam ng Australian Associated Press kay Horn, sinabi nito na mismong si Pacquiao na ang nagsabing masaya siya sa naging resulta ng laban.

Ngunit ngayong tila nagbabago na ang isip ng Pambansang Kamao, handa naman si Horn na pagbigyan si Pacquiao dahil sa paniniwalang may dahilan kaya ito mangyayari.

By Jaymark Dagala

Sold-out agad ang ticket para sa press conference para sa bakbakang Floyd Mayweather Jr. at UFC Star Conor McGregor.

Ayon kay UFC President Dana White, bukod pa ito sa mismong mga ticket para sa mismong laban.

Dahil dito, inilipat ang venue sa mas malaking lugar para mas makapag-accommodate ng mas marami pang boxing at mixed martial arts fan.

Ang mismong saguapaan sa pagitan nina Mayweather at McGregor ay gaganapin sa Agosto 26 sa Las Vegas.

By Ralph Obina