RONDA PROBINSYA

Hindi tatantanan ng Philippine National Police (PNP) ang mga miyembro ng Bangsamoro Islamic Freedom Fighters (BIFF) na umatake sa Datu Piang, Maguindanao kamakailan.

Ito ang pagtitiyak ng PNP kasunod ng nagpapatuloy pa ring pagtugis ng mga awtoridad sa mga nasabing bandido na walang habas na kumubkob sa bayan at nanunog pa ng police mobile sa lugar dalawang linggo na ang nakalipas.

Sa panayam ng DWIZ kay PNP Spokesman P/BGen. Ildebrandi Usana, mahigpit ang kanilang pakikipag-ugnayan sa Armed Forces of the Philippines (AFP) upang agad na mapanagot ang mga nasa likod ng nasabing pag-atake

Bagama’t nananatili sa floating status, nilinaw ni Usana itinuturing nilang bayani ang chief of police ng Datu Piang na si P/Capt. Israel Bayona dahil sa pagkakakaresto nito sa dalawang miyembero ng biff na sangkot sa iligal na droga.

Magugunitang paghihiganti ang nakikitang dahilan ng mga awtoridad kaya’t inatake ng BIFF ang nasabing bayan kung saan, nabatid na ang target ng mga ito ay si Bayona.

Ipinatawag ni Cebu Governor Gwendolyn Garcia ang mga opisyal ng Dito Telecommunity corporation gayundin ang contractor nito.

Bunsod ito ng paglala ng problema ng Metro Cebu sa daloy ng trapiko dahil sa ginagawang paghuhukay nito sa kahabaan ng highway na sakop ng bayan ng Consolacion.

Ayon kay Garcia, nabatid na ang ginagawang paghuhukay ng dito telco sa nasabing kalsada ay para maglagay ng fiber optic cables sa tabi mismo ng highway.

Subalit ang problema ayon kay Garcia, iniwanan lamang ang mga iyong nakatiwangwang na dahilan upang mag-embudo ang mga sasakyan sa tabi ng mga hukay na siyang nagpapabigat lalo sa daloy ng trapiko.

Giit ng gobernador, kung hindi tatakpan ng Dito telco ang mga hinukay na butas ng kanilang contractor ay sila na ang maglalagay ng steel plates subalit sisingilin nila rito ang dito dahil sa perhuwisyong dulot nito sa mga motorista.

Agad na binawian ng buhay si Alvin Loque, alyas Joaquin Jacinto, ang tagapagsalita ng National Democratic Front Mindanao and komisyun Mindanao at nahaharap din sa patung-patong na kaso,  makaraang manlaban at makipagpalitan ng putok sa mga otoridad habang inaaresto sa Surigao Del Sur.

Ayon sa Eastern Mindanao Command, ilang warrant of arrest na ang inisyu ng korte laban kay Loque noong nakalipas na Disyembre 10, 2020.

Pahayag ng EastMinCom, kasamang nasawi ng NPA leader ang kasamahan nito na patuloy pang kinilala ng mga otoridad.

Nabatid na isang mahalagang opisyal ng kommid si Loque dahil sa ibinibigay nitong liderato at direksyon sa kanilang grupo, at mayroon ring patong sa ulo na P6 milyong pabuya.

Sinabi ni EastMinCom, na ang kommid ang nasa likod ng pagsira ng buhay, kalayaan at pag-aari ng mga inosenteng indibidwal,  kabilang na ang pagpapakalat ng baluktot na ideolohiya.

Ipinaalala ng Department of Tourism sa lahat ng tourism establishment na mahigpit na ipatupad ang safety and health protocols.

Kasunod na rin ito ng social gathering na nangyari sa Blue Coral Beach Resort sa barangay Laiya sa San Juan, Batangas kung saan nag-party ang maraming tao na walang suot na face mask, face shield at hindi sumunod sa physical distancing.

Kumalat sa social media ang nasabing video ng pagtitipon at napatunayang nalabag ang guidelines na itinakda sa mga lugar na nasa ilalim pa rin ng general community quarantine kung saan ipinagbabawal ang pagdaraos ng party.

Kasabay nito pinuri ni Tourism Secretary Bernadette Romulo-Puyat ang pamahalaang lokal ng San Juan sa agarang pagbawi ng business permit at paghahain ng kaso laban sa nasabing establishment.

Nabatid na kalahating buwan sinuspinde ang operasyon ng Blue Coral Resort noong Setyembre dahil na rin sa paglabag sa health protocols.