RONDA PROBINSYA

Arestado ang isang security guard na sinasabing nasa likod ng pagpatay sa abogadong si Joey Luis Wee sa Cebu City noong nakaraang buwan.

Ayon sa National Bureau of Investigation-Laguna district office, nadakip ang salarin matapos nilang makatanggap ng impormasyon na nasa Cabuyao, Laguna ito naninirahan.

Magugunitang pinagbabaril si Wee ng mga hindi nakilalang salarin sa Barangay Kasambagan, Cebu City noong Nobyembre.

Isa si Wee sa mga abogado ng ilang opisyal ng DPWH na kinasuhan dahil sa overpriced lamposts na ikinabit sa Cebu City sa kasagsagan ng ASEAN Summit, 10 taon nang nakakaraan.

Patay ang hinihinalang sub-leader ng isang kidnap-for-ransom group matapos umano manlaban sa mga awtoridad sa barangay Mampang Zamboanga City.

Kinilala ang nasawing suspek na si Samad Awang alyas Ahmad Jamal na sinasabing sub leader ng Abdussalam Group.

Ayon kay Western Mindanao Command (Wesmincom) Commander Lt. General Corleto Vinluan Jr., naglabas ng baril at unang pinaputukan ni awang ang mga pulis at militar na nagsilbi ng warrant of arrest laban sa dito.

Dahil dito, gumanti ng putok ang mga awtoridad na nagresulta sa pagkamatay ni Awang.

Sinabi ni Joint Task Force Zamboanga Chief Col. Antonio John Divinigracia, nahaharap si Awang sa kasong paglabag sa article 267 ng revised penal code o serious illegal detention, kidnapping at hostake taking.

Nasa number 25 din aniya si Awang sa listahan ng mga wanted para sa kidnap for ransom at nanguna sa pagdukot sa mga biktimang sina Joel Endino, Italian Priest na si Giancarlo Bossi at Kathy Casipong.

Arestado ang anim na turista sa Boracay matapos magsumite ng pekeng RT-PCR COVID-19 test result.

Ayon kay acting Provincial Director Police Col. Esmeraldo Osia, galing sa Metro Manila ang anim na turista na hindi pinangalanan.

December 5 aniya ng dumating ang mga ito sa isla kung saan sila nagsumite ng RT-PCR test bilang pangunahing rekisitos sa mga turistang pumapasok.

Ngunit kahapon ay nakatanggap umano sila ng impormasyon na lima sa anim na turistang ito ang nagsumite ng pekeng RT-PCR test.

Dahil dito agad na pinuntahan ng mga otoridad at inaresto ang mga turista.

Isinailalim sa 14-day quarantine period ang mga ito at posibleng maharap sa kasong paglabag sa mga panuntunan tungkol sa pag-iingat laban sa COVID-19.

Patay ang isang drug suspek sa buy bust operation sa Naic, Cavite.

Kinilala ang suspek na si Ian Labangco, 42 anyos residente ng Barangay Halang sa bayan.

Batay sa impormasyon notoryus sa pagtutulak ng droga ang suspek sa iba’t-ibang barangay sa Naic.

Nakatunog ang suspek na ang ka-transaksyon nito ay mga pulis at dito na bumunot ng baril at  nauwi sa palitan ng putok.

Inaasahang mababawasan ang droga sa bayan bunsod ng ikinakasang operasyon.

Nagpositibo sa coronavirus disease 2019 (COVID-19) ang 18 construction workers sa Zambales na kauuwi pa lamang mula Antipolo, Rizal.

Dahil dito, ayon kay provincial health director Dr. Noel Bueno, pumalo na sa 679 ang kabuuang bilang ng mga tinamaan ng COVID-19 sa kanilang lalawigan.

Sinasabing ang mga umuwing construction workers ay pawang mga residente ng Barangay Taugtog sa bayan ng Botolan.

Naniniwala si Bueno na nakuha ng mga obrero ang sakit mula sa kanilang trabaho.

Walang nararamdamang sintomas ang mga pasyente pero kasalukuyan na silang naka-isolate habang pinaiigting na ang contact tracing, partikular sa construction site na pinasukan ng mga ito.

Nadagdagan ng 36 ang bilang ng mga nakarekober mula sa coronavirus disease 2019 (COVID-19) sa Region 12 o Soccsksargen region.

Ayon sa Department of Health–Region 12, sa mga bagong recoveries, nakapagtala ng tig-13 ang General Santos City at South Cotabato na sinundan ng Cotabato City (5), Sarangani (3) habang tig-isa naman ang North Cotabato at Sultan Kudarat.

Pahayag ni DOH-Soccsksargen spokesperson Arjohn Gangoso, umakyat na sa 87% ang recovery rate ng rehiyon matapos pumalo sa 3,550 ang kanilang total recoveries.

Pinalawig ni Laoag City Mayor Michael Keon ang pinatutupad na lockdown sa City Public Market and Commercial Complex.

Batay sa Executive Order ni Keon, epektibo nitong December 5 ang quarantine extension na layuning matapos ang isinasagawang contact tracing at COVID-19 testing sa lungsod.

Sa kasalukuyan, mayroon pang 159 na active cases sa Laoag City habang mahigit isang daang inmates naman sa Ilocos Norte Provincial Jail ang nagpositibo sa virus.

Kabilang sa mga tinamaan ng sakit ay ang ilang market vendors at empleyado ng city hall.

Arestado ang mahigit 300 dayuhan na sinasabing walang work visas at hinihinalang sangkot sa cybercrime operations sa bayan ng Bamban sa Tarlac.

Ayon kay Bureau of Immigration commissioner Jaime Morente, 323 sa mga nadakip ay Chinese, walong ang Malaysians, at isa naman ang Indonesian.

Aniya, hinuli ang mga suspek dahil sa sumbong na dawit ang mga ito sa online gambling, internet fraud, at cybercrime operations.

Nakatakdang i-deport ang mga nabanggit na dayuhan dahil sa umano’y paglabag sa Philippine Immigration Act.