RONDA PROBINSYA

Pumanaw na ang dating alkalde ng Pagbilao, Quezon na si Romeo Portes, Isang linggo matapos ito pagbababarilin sa harap ng bahay ng kanyang anak.

Ito ang kinumpirma ng lokal na pamahalaan ng Pagbilao sa kanilang Facebook page.

Labis anilang ikinalulungkot ang pagkamatay ng isa itinuturing na mabuting ama at mahusay na tigapaglingkod ng kanilang munisipalidad.

Ayon sa Quezon Police Provincial Office, nasawi si Portes noong Disyembre 3 habang ginagamot sa isang ospital sa Taguig.

Batay sa mga naunang ulat, alas-5 ng hapon ng Nobyembre 24 nang barilin si Portes ng mga salaring riding in tandem sa harap ng gusali kung saan nakatira ang kanyang anak.

Nagsilbi siPortes bilang alkalde ng Pagbilao mula 1998 hanggang 2006 at 2011 hanggang 2013.

Nagbanta ang Philippine National Police (PNP) na mahaharap sa patong-patong na kaso ang dalawang umano’y lider ng Bangsamoro Islamic Freedom Fighters (BIFF) at iba pa kasunod ng pag-atake sa bayan ng Datu Piang sa Maguindanao noong Huwebes ng gabi.

Ayon sa PNP, kabilang sa mga ihahaing kaso laban sa mga suspek ay attempted murder, arson, at grave threats.

Matatandaang kinumpirma ni Maj. Gen. Juvymax Uy, kumander ng 6th Infantry Division ng Philippine Army na nagkaroon ng dalawang oras na bakbakan nang lusubin ng BIFF ang Charlie Company ng 6th Infantry Battalion sa nabanggit na lugar.

Ang armadong grupo ay sinasabing pinangunahan ng umano’y kapatid ni BIFF leader Ustadz Karialan.

Laglag sa pinagsanib na puwersa ng pulisya at militar ang isang hinihinalang opisyal ng New People’s Army (NPA) sa Mexico, Pampanga.

Ayon sa Philippine National Police (PNP), ang suspek na si Jose Esperila Bernardino ay nasakote ng mga awtoridad sa Brgy. Sapang Maisac sa bayan ng Mexico.

Nakumpisa mula kay Bernardino ang isang kalibre .45 baril, isang granada, ilang piraso ng cellphone, sim cards at sari-saring mga dokumento.

Sinasabing dinakip si Bernardino sa bisa ng warrant of arrest na inisyu laban sa kanya ng isang korte sa Bayombong, Nueva Vizcaya dahil sa kasong rebelyon.

Samantala, ayon kay Criminal Investigation and Detection Group (CIDG) director Police Maj. Gen. Joel Napoleon Coronel, si Bernardino ay nagsisilbi bilang kalihim ng Central Luzon Regional Communist Party Committee, maliban sa ginagampanan nitong papel sa NPA sa rehiyon.

Dumanas ng panibagong dagok ang Abu Sayyaf Group (ASG).

Ito’y kasunod ng pagsuko sa tropa ng militar ng 36 pang miyembro ng bandidong grupo kung saan agad itong iprinesenta sa Naval Forces Western Mindanao Command (NFWM) at Joint Task Force sa Barangay Lahing-Lahing, bayan ng Omar sa Sulu.

Kasamang isinurender ng mga dating kasapi at tagasuporta ni Abu Sayyaf sub-leader Alhabsy Misaya ang pitong M1 Garand rifles at isang M653 rifle.

Sinasabing dating kumikilos ang mga ito sa mga bayan ng Omar, Banguigui at Old Panamao.

Nabatid na nagkawatak-watak ang pangkat ni Misaya nang mapatay ito sa pakikipagbakbakan sa mga Marines noong 2017.