RONDA PROBINSYA

Patay sa pamamamaril ang alkalde ng Los Baños, Laguna mag-aalas-9 kagabi.

Ayon sa Los Baños Police kakagaling lamang ng 66 na taong gulang na si Mayor Cesar Perez sa pagpapamasahe sa isang spa sa Barangay Baybayin at patungo ng munisipyo nang dalawang beses pagbabarilin ng suspek sa kaliwang bahagi ng likod nito habang nasa receiving area na.

Isinugod kaagad si Perez sa Health Service Medical Hospital sa Barangay Batong Malake subalit matapos ang 30 minutong bigong pag-revive dito ay idineklara nang patay ng mga duktor.

Hindi naman namukhaan ang mga suspek na biglang sumulpot mula sa hindi malamang direksyon at kaagad ding kumaripas ng takbo matapos yariin si mayor.

Tinuligsa ng iba’t ibang grupong maka kalikasan si Isabela Governor Rodito Albano.

Ito ay dahil sa pagsisinungaling umano ng gobernador na wala nang illegal minning at illegal logging sa kanilang lalawigan.

Kasabay na rin ito ng g pag-amin ni Cagayan Gov. Manuel Mamba na tuloy pa rin ang ganitong klase ng aktibidad sa kanilang lugar sa Cagayan.

Ayon kay Jaybee Garganera ng grupong alyansa tigil mina, ang mga residente mismo ng Isabela ang siyang magpapatunay na nagsisinungaling si Albano.

Giit ni Garganera, kung magkakasa lang ng aerial survey tulad ng ginawa nuon ng yumaong DENR Sec. Gina Lopez, tiyak na sasambulat ang malawakang pagkasira ng kalikasan at talamak na quarrying at minning sa mga nabanggit na lalawigan.

Naaresto na ng mga awtoridad ang isang lalaki na siya umanong responsable sa pamamaril sa grupo ng mga pulis habang nagsasagawa ng operasyon laban sa illegal logging sa Cagayan province.

Ayon kay Brig. Gen. Crizaldo Nieves, direktor ng Police Regional Office 2, nakilala ang suspek na si Ernest Sibbaluca ng Barangay Minanga sa bayan ng Peñablanca.

Matatandaang ipinag-utos ni Philippine National Police (PNP) Chief Gen. Debold Sinas ang pagtugis sa suspek na namaril sa grupo ni Lt. Randy Baccay, deputy chief of police ng Peñablanca Police Station.

Sinasabing rumesponde ang mga elemento ng Peñablanca PNP sa lugar nang makatanggap ng sumbong ukol sa mga nakatambak na troso sa Sitio Dalayat hanggang sa bigla na lamang umanong paputukan ang mga pulis kung saan tinamaan si Baccay.

Ayon kay Nieves, si Sibbaluca ay sasampahan ng mga kasong direct assault upon an agent of authority at frustrated murder.

Isa ang patay habang dalaw ang arestado sa ikinasang operasyon ng Criminal Investigation and Detection Group (CIDG) sa Daraga, Albay.

Kinilala ang napatay na si Rodel Llorera na most wanted person sa CALABARZON area at may outstanding warrant of arrest sa kasong murder.

Batay sa ulat, magsisilbi lang sana ng warrant ang mga operatiba sa pinagtataguan ng suspek sa Purok 4, Sitio Banacian sa Brgy. San Ramon nang biglang paputukan nito ang mga opisyal na aaresto sa kaniya.

Dahilan upang gumanti ng putok ang mga awtoridad dahilan ng kaniyang kamatayan habang naaresto naman sina Filemon Madridano at Honeybee Boneo.

Nakuha mula sa mga suspek ang isang kalibre 45 at 38  baril gayundin ang isang granada.

Dahil dito, mahaharap sa kasong paglabag sa Republic Act 9165 o Comprehensive Dangerous Drugs Act of 2002 laban kina Madridano at Boneo.

Nakapagtala ng tatlong volcanic earthquakes ang Philippine Institute of Volcanogy and Seismology (Phivolcs)sa Bulkang Kanlaon sa Negros sa buong magdamag.

Ayon sa Phivolcs, umabot sa 336 tonnes kada araw ang inilabas na sulfur dioxide ng Kanlaon noong Martes Nobyembre 24.

Simula rin noong Hunyo, naitatala ng Phivolcs ang bahagyang pamamaga sa ibaba at gitnang slope ng bulkan batay sa nakitang deformation sa lupa.

Sinabi ng Phivolcs, posibleng dahilan nito ang nangyayaring hydrothermal o magmatic processes sa ilalim ng bulkan.

Nananatili namang nakataas ang alert level 1 sa Bulkang Kanlaon na nangangahulugan ng patuloy na abnormal condition nito.