RONDA PROBINSYA

Sumuko sa binuong Special Investigation Task Group (SITG)  ang itinuturong mastermind sa pagpatay kay Atty. Eric Jay Magcamit sa lalawigan ng Palawan.

Batay sa impormasyong ipinarating sa Kampo Crame, kinilala ni Police Regional Office 4B Spokesperson P/Ltc. Imelda Tolentino ang suspek na si Mariano Quioyo.

Ayon kay Tolentino, sinabi ni Quioyo na may banta umano sa kaniyang buhay kaya’t ninais niyang magpasailalim sa kostudiya ng pulisya.

Dahil dito, ipinag-utos ni P/Col. Nicolas Torre na siyang pinuno ng SITG Magcamit na dalhin si Quioyo sa pangangalaga ng Criminal Investigation and Detection Group (CIDG) sa lalawigan ng Palawan.

Hindi pa tapos ang laban para sa Armed Forces of the Philippines (AFP) kahit nahatulan nang guilty ang mag-asawang NDF consultants na sina Benito at Wilma Tiamzon.

Ito’y dahil sa patuloy pa ring nakalalaya ang mag-asawa mula nang ibasura ni Pangulong Rodrigo Duterte ang usapang pangkapayapaan sa pagitan ng pamahalaan at ng CPP-NPA-NDF.

Gayundin ang pagpapawalang bisa sa joint agreement on safety and immunity guarantees (JASIG) na siyang ginagamit na lisensya ng mga lider komunista upang makapamuhay ng malaya.

Ayon kay AFP Spokesman Marine M/Gen. Edgard Arevalo, hindi sila titigil sa pagtugis sa mag-asawa hanggang sa maihatid muli sila sa rehas na bakal.

Kasunod nito, umapela si Arevalo sa iba pang lider komunista na talikuran na ang maling paniniwala at armadong pakikibaka.

Sa halip, hinikayat niya ang mga ito na yakapin ang dalisay na kapayapaan at kaayusan para sa bansang Pilipinas.

Tiwala ang Philippine National Police (PNP) na epektibong umiiral ang sistema ng katarungan sa bansa.

Ito ang rekasyon ng PNP kasunod ng iginawad na hatol laban sa mag-asawang sina Benito at Wilma Tiamzon dahil sa kasong kidnapping.

Ayon kay PNP Spokesman P/Bgen. Ildebrandi Usana, pinatunayan ng hukuman na nagkasala sa bayan ang mag-asawang Tiamzon na dapat nilang panagutan.

Pinapurihan din ng PNP ang mga taga-usig ng pamahalaan matapos makapaglatag ng mga ebidensyang nagdiriin sa mga akusado sa kanilang ginawa.

Hinatulang guilty ng Quezon City Regional Trial Court branch 216 ang mag-asawang sina Benito Tiamzon at Wilma Austria kaugnay ng kasong kidnapping na isinampa laban sa kanila.

Ito’y kasunod ng ginawang pagpapadukot umano ng mag-asawa sa apat na sundalo at isang miyembro ng Philippine Narcotics Command sa Quezon Province noong 1988.

Reclusion perpetua o pagkakakulong ng hindi bababa sa 40 taon ang iginawad na hatol ng korte laban sa mag-asawang Tiamzon maliban pa sa pagbabayad ng danyos sa mga biktima nito ng mahigit P200,000 kay Lt. Claro Asis.

Hunyo 1, 1988 nang dukutin sina lt. Clarito Santos, Oscar Singson, Rommel Salamanca at Abraham Claro Casis gayundin kay Sgt. John Jacob ng Philippine Narcotics Command na itinago ng 75 araw sa Mauban, Quezon.

Unang napalaya ang mag-asawang Tiamzon noong 2016 makaraang payagan ng korte sa Maynila na makapaglagak sila ng piyansa para makalahok sa usapang pangkapayapaan sa pagitan ng pamahalaan at ng CPP-NPA-NDF.

Tumatayo kasing consultant ng NDF ang mag-asawa na sakop ng joint agreement on safety and immunity guarantee (JASIG) na ipinawalang bisa rin matapos ibasura ng Pangulo ang peace negotiations sa mga komunista.

Sumampa na sa P12.19-B ang halaga ng school buildings at learning materials na napinsala dahil sa sunod-sunod na bagyong humagupit sa bansa.

Sa ginanap na Senate hearing, isiniwalat ni Education Undersecretary Nepomuceno Malaluan na umabot sa 1,650 classrooms na nagkakahalaga ng P6.6 bilyon ang nasira ng bagyong Rolly habang nasa P3.8-B naman sa bagyong Ulysses.

Dahil dito, nanawagan si Malaluan sa Senado na huwag tapyasan ang budget ng ahensya para sa school buildings sa susunod na taon.

Samantala, inihayag naman ni Senate Committee on Basic Education chair Sherwin Gatchalian na titiyakin ng Kongreso na maaayos ang mga napinsalang paaralan bago ang inaasahang pagbabalik ng physical classes sa 2021.

Nakitaan ng pagpapabaya ang lokal na pamahalaan ng boracay hinggil sa napaulat na malakihang halloween party sa isla nuong Oktubre a-31 na sinasabing lumabag sa COVID-19 health protocols.

Ayon kay Tourism Secretary Bernadette Romulo-Puyat, bigo ang LGU na imonitor ang isla pagdating sa pagsunod sa health protocols.

Dahil dito kinalampag ni Puyat ang LGU at alkalde na aniya’y kailangan seryosohin ang covid kung gusto nitong makabangon muli ang turismo sa Boracay.

Giit pa ng kalihim dapat ay maging istrikto ang mga ito sa pagpapatupad ng mga health protocols upang maiwasan ang pagkalat sa isla ng nakahahawang sakit at manganib na muling magsara ang Boracay.

Ipinadala sa DOT ang ilang video kung saan makikita sa naturang party ang paglabag ng mga dumalo rito sa physical distancing at wala ring suot na face mask at face shield.