RONDA PROBINSYA

Naghigpit pa lalo ng ipinatutupad na health protocols ang Davao City matapos isailalim muli sa general community quarantine kasunod ng pagtaas ng bilang ng kaso ng COVID-19.

Naglagay na ng quarantine control points bilang bahagi ng pinaigting na pagbabantay ng mga otoridad.

Dito hinahanapan ng food at medicine pass ang mga sasakyang dadaan mapa-pribado man o pampubliko.

Ngunit dahil din dito ay nakararanas na rin ng trapiko sa mga lugar sa lungsod.

Umabot na sa 5,994 ang bilang ng kaso ng COVID-19 sa Davao City.

Ayon sa Davao City Health Office, maituturing na second wave ang nangyari sa Davao simula kalagitnaan ng Oktubre dahil sa local transmission.

Iminungkahi ni Cagayan Gov. Manuel Mamba sa pamahalaan na ayusin ang Cagayan River para maisalba ang probinsya mula sa mapaminsalang baha na lubos na nakakaapekto sa takbo ng ekonomiya sa bahagi ng Northern Luzon.

Sa pagdinig ng senado kaugnay sa naranasang malawakang pagbaha nitong nakalipas na pananalasa ng mga bagyo, sinabi ni Mamba na kung maibabalik ang dating ganda ng Cagayan River, ang mga Pinoy mula sa Northern Luzon ay makikinabang mula sa turismo at pakikipagkalakalan mula sa kalapit na bansa.

Kaugnay nito, umapela si Mamba ng tulong upang masimulan na ang pagbangon ng probinsya aniya kahit man lang turistang mga Chinese sa kanilang lugar ay hindi na nila ito ma-enjoy ngayon.

Magugunitang inihayag ni Mamba sa mga una nitong panayam na natatambakan na ng lupa ang Cagayan River dahilan para malimitahan na ang “water holding capacity nito”.

Kinumpirma ng Department of Health (DOH) na walong detainee sa Davao City Jail male dormitory ang nagpositibo sa COVID-19 at isa rito ang pumanaw na.

Batay sa impormasyon ng Bureau of Jail Management and Penology (BJMP) 11, ang nasawing pasyente ay nadala pa sa Southern Philippines Medical Center matapos mahirapang huminga.

Dito siya na-diagnose na mayroong pulmonary congestion secondary to end stage renal failure hanggang sa binawian na ito ng buhay nuong November 19 at lumabas na tinamaan na rin ito ng COVID-19.

Nabatid rin na bago pa man siya na-ospital ay inihiwalay na siya sa iba pang nakapiit dahil kabilang umano siya sa itinuturing na vulnerable group.

Patuloy naman naka-quarantine ang pito pang inmate na positibo sa COVID-19.

Kaugnay nito, nagsagawa na ng health monitoring, screening at contact tracing ang jail nurses sa iba pang mga naging close contact ng mga nagpositibong inmate.

Patay ang tatlong hinihinalang miyembro ng Abu Sayyaf Group sa nangyaring engkuwentro sa Zamboanga City.

Kinilala ang mga nasawing suspek na sina Radi Nalul Tahirin, Hasan Alimin at Abdilla Aspalin.

Ayon kay Philippine National Police (PNP) Chief General Debold Sinas, naharang ng mga pulis ang mga bandido sa sinasakyang pumpboat sa bahagi ng barangay Taluksangay.

Sinabi ni Sinas, naganap ang engkuwentro matapos maunang paputukan ng baril ng tatlong suspek ang mga pulis.

Pinaniniwalaan naman aniyang magtutungo ang mga ito sa isang bombing mission.

Samantala, patuloy namang pinaghahanap ang isa pang suspek na nahulog sa dagat sa gitna ng engkuwentro.