RONDA PROBINSYA

Balik sa modified general community quarantine (MGCQ) ang Ilagan City sa Isabela matapos ang limang araw na pagpapatupad ng localized lockdown sa ilang barangay at purok sa lungsod.

Tuluyan nang inalis ng City Inter-Agency Task Force (CIATF) ang paghihigpit at paglilimita sa galaw ng mga residente sa Barangay Marana 1st at Purok 2 ng Barangay Alibagu matapos ang matagumpay na contact tracing sa mga nasabing lugar.

Mayroong 50 aktibong kaso ng coronavirus disease 2019 (COVID-19) sa Ilagan City kaya’t nakaalerto pa rin ang mga otoridad sa pagpapatupad ng health standards lalo na ngayong kapaskuhan.

Patuloy ang paalala ng CIATF na iwasan ang mass gathering at pagtungo sa mga matataong lugar kung hindi kinakailangan at ugaliing sundin ang mga panuntunang ipinatutupad ng mga kinauukulan para makaiwas sa COVID-19.

Mag-ingat laban sa mga bogus brokers.

Ito ang babala sa publiko ni Housing czar Secretary Eduardo del Rosario matapos madakip sa Alfonso, Cavite ang ilang indibidwal na umano’y dawit sa illegal real estate transactions.

Sina Joana Marie Cruzada, Joana Marie Viray, Felmarich Dagohoy, at Jovannie Cruz ay nahuli sa joint entrapment operation ng mga elemento ng National Bureau of Investigation (NBI) at Department of Human Settlements and Urban Development (DHSUD).

Sa imbestigasyon, nagpanggap ang mga suspek bilang mga empleyado ng 1Premier Land Marketing Company na umano’y marketing arm ng Alta Vista.

Nasagip ng search and rescue teams mula sa Bureau of Fire Protection at Local Disaster Risk Reduction and Management Office ang walo katao sa naganap na flash flood sa Pudtol, Apayao.

Sinasabing nagsimulang bumuhos ang malakas na ulan noon pang Sabado ng gabi na nakaapekto sa mga barangay ng Cabatacan, San Mariano, Alem at Imelda sa naturang bayan.

Nagpapastol umano ng kanilang mga alagang hayop ang dalawa sa mga na-stranded na residente ng Cabatacan nang biglang umapaw ang Malunog River.

Nakarating sa kaalaman ni Mayor Hector Ruel Pascua ang nangyari kaya’t nagpadala ito ng search and rescue team na siyang sumaklolo sa mga residente gamit ang motorized rubber boats.

Mahigpit na pinababantayan ni Environment Secretary Roy Cimatu ang umano’y pamumutol ng punong kahoy sa Barangay Don Panaca sa bayan ng Magpet sa Cotabato province.

Paliwanag ni Cimatu, doon din natuklasan ng mga awtoridad ang isang small-scale illegal mining operation.

Sinabi pa ni Cimatu na ang nasabing minahan malapit sa Mt. Apo Natural Park ay hindi lugar para sa mga small-scale miners kaya’t agad nila itong ipinasara.

Binigyang diin ng kalihim na hindi makapapayag ang Department of Environment and Natural Resources (DENR) na patuloy na magdurusa ang mamamayan sa baha at kalamidad na dulot ng pagkasira ng kagubatan.

Naaresto ng Bureau of Immigration (BI) ang isang amerikano sa Cebu na wanted dahil sa sex crime sa Estado Unidos.

Kinilala ang suspek na Donald Robert Tyler, 57 anyos na naninirahan sa barangay San Roque Ginatilan, Cebu.

Ayon kay Immigration Commission Jaime Morente, isinilni kay Tyler ang arrest warrant na ipinalabas ng korte sa Oregon dahil sa kasong sodomy noong nakaraang taon.

Aniya, napili ni Tyler na magretiro sa Pilipinas bagama’t itinuturing na itong undocumented alien matapos kanselahin ng US state department ang pasaporte nito.

Pansamantalang ikukulong ang suspek sa warden facility ng BI sa Taguig City habang hinihintay ang resulta ng kanyang deportation case.