RONDA PROBINSYA

Limang sundalo ang sugatan matapos muling makasagupa ng bandidong Abu Sayyaf na una nang naka-engkuwentro sa Brgy. Pansul, bayan ng Patikul sa lalawigan ng Sulu.

Ayon kay Joint Task Force Central Commander M/Gen. William Gonzales, nagsasagawa lamang blocking operations ang mga tropa ng 3rd Scout Ranger Battalion ‘di kalayuan sa unang pinangyarihan ng engkuwentro.

Tumagal ng 30 minuto ang bakbakan kung saan, may nasugatan din sa panig ng mga kalaban batay sa bakas ng dugo subalit hindi pa matukoy kung ilan.

Nakatakas muli ang mga bandido bitbit ang mga sugatan nilang kasamahan habang nakuha ruon ang mga bala ng 5.56 mm carbine at magazine nito gayundin ang mga personal na gamit ng mga kalaban.

Kasalukuyan nang nagpapagaling sa Kuta Heneral Teodulfo Bautista Station Hospital sa sulu ang mga sugatang sundalo na nasa ligtas nang kundisyon.

Umani ng batikos ang apat na konsehal sa Roxas City sa Capiz matapos mag-viral sa social media ang kanilang larawan na walang suot na damit pang-itaas.

Ito’y kasunod ng pagkakapasa ng sangguniang lungsod ang ordinansang nagbabawal naman sa paglabas ng tahanan na walang damit pang itaas o half naked ordinance.

Nakasaad sa ordinansa na papatawan ng multa na nagkakahalaga ng P500.00 para sa sinumang mahuhuling residente na nakahubad sa pampublikong lugar.

Maliban dito, sinita rin ng mga netizen ang tila paglabag ng apat na konsehal sa COVID-19 quarantine protocols dahil bukod anila sa dikit-dikit ang mga ito ay wala ring suot na facemask at face shield.

Pagpapaliwanagin naman ng Department of the Interior and Local Government (DILG) ang apat na konsehal.

Ayon kay DILG Usec. Jonathan Malaya, ang mga halal na opisyal ay dapat magsilbing mabuting halimbawa sa kanilang nasasakupan hinggil sa tamang pagsunod sa COVID-19 protocols.

Ang mga konsehal aniyang gumawa ng batas o ordinansa ang siya dapat mangunang sumunod at hindi lumabag sa kanilang ipinasang panuntunan.

Napatay ng mga tauhan ng Philippine National Police Anti-Kidnapping Group (PNP-AKG) ang miyembro ng isang kilabot na special operating unit ng Abu Sayyaf Group.

Kinilala ni PNP-AKG Director P/BGen. Jonnel Estomo ang napatay na bandido na si ibrahim anduhol na mas kilala sa alyas na Tongtong na kasapi ng grupong Barahama Ali at nago-operate sa Zamboanga, Sibugay.

Sisilbihan lamang sana ng warrant of arrest ng pulisya si Anduhol dahil sa kasong pagpatay sa upper pangi sa bayan ng Ipil nang makatunog sa presensya ng mga awtoridad at agad niyang pinaputukan ang mga ito.

Dagli namang gumanti ng putok ang mga awtoridad na siya namang nagresulta sa agarang pagkamatay ng aarestuhing kriminal.

Ayon pa kay Estomo, pang-apat si Anduhol sa mga most wanted person sa lalawigan dahil sa pagkakasangkot nito sa kidnapping at pagpatay sa sundalong si SSgt. Juan Ablao ng Philippine Army nuong 2018 gayundin kay Pat. Arthur Decena ng station drug enforcement team nito lamang Disyembre 6.

Agad dinala sa kaniyang pamilya ang labi ni Anduhol upang maisailalim sa paglilibing salig na rin sa tradisyon ng relihiyong Islam.

Pinatawan ng anim na buwang preventive suspension ng Office of the Ombudsman ang general manager ng Mactan-Cebu International Airport Authority (MCIAA).

Ito’y matapos akusahan si Steve Dicdican na kaniya umanong pinapayagang mag-manage ng paliparan ang ilang dayuhan.

Batay sa reklamong inihain ng National Bureau of Investigation (NBI)  sa Office of the Ombudsman nuong Disyembre 14, nahaharap sa kasong grave misconduct, gross neglect of duty at conduct prejudicial to the best interest of the service si Dicdican.

Sinasabing matibay ang “evidence of guilt” na inihain laban sa opisyal.