RONDA PROBINSYA

Sinunog ng mga operatiba ng Police Regional Office Cordillera ang nakumpiska nilang marijuana sa Benguet noong nakaraang Linggo na nagkakahalaga ng mahigit sa P1.3 milyong.

Ayon sa Philippine National Police (PNP), aabot sa 6,700 halaman ng marijuana plants at mahigit 3,000 seedlings ang kabuuang winasak.

Sa bilang na ito, 2,800 na halaman ang nadiskubre sa 700 metro kuwadradong marijuana farm sa Sitio Bulisay, Kayapa, Bakun, Benguet noong Huwebes.

Nitong Biyernes, nasabat naman ng pulisya ang nasa 1,400  halaman ng na may na nagkakahalaga ng P280,000 sa Sitio Wasan sa nabanggit na lugar.

Nasamsam naman ang 2,500 halaman ng marijuana at mahigit 3,200 marijuana seedlings sa Barangay Badeo, Kibungan, Benguet nitong Sabado.

Ibinabala ng PAGASA ang posibilidad ng malawakang pagbaha sa bahagi ng Cagayan Valley Region.

Ito ay dahil nasa above critical level na ang upper, middle at lower portions ng Cagayan River, gayundin ang mga tributaries nito.

Sa pagtaya ng PAGASA, posibleng magtuloy-tuloy pa ang pagtaas ng tubig sa ilog ng Cagayan bunsod na rin inaasahang katamtaman hanggang sa malakas na ulang dala ng bagyong Vicky at tail-end of a frontal system.

Samantala, nananatili namang bukas ang anim na gates ng Magat dam sa Isabela at patuloy na nagpapakawala ng tubig, matapos ang naranasang malakas na pag-ulan sa lugar.

Sa pinakahuling tala kaninang alas sais ng umaga, umaabot na sa 191.32 meters ang lebel ng tubig sa Magat dam, ilang metro na lamang sa spilling level na 193 meters.

Arestado ng mga tauhan ng Philippine National Police Anti-Kidnapping Group (PNP-AKG) ang isang lalaking pitong beses na gumahasa sa sariling anak sa Inabanga, Bohol.

Kinilala ni PNP-AKG Director P/Bgen. Jonnel Estomo ang suspek na si Ruben Nestor Millanes Genita na naaresto sa tinutuluyan nitong bahay sa Brgy. Lutao sa nabanggit na bayan sa bisa ng warrant of arrest dahil sa kasong incestous rape at sexual assault.

Batay sa reklamo ng biktima, maka-ilang beses umano siyang ginahasa ng kaniyang sariling ama mula pa nuong 2015 hanggang nito lang isang taon.

Dahil dito, kasalukuyan humihimas na ng rehas na bakal ang suspek sa Bohol Provincial Police Office at isinailalim na ito sa proper booking and documentation bago iharap sa korte na naglabas ng warrant laban sa kaniya.

Patay ang limang miyembro ng New People’s Army (NPA) kabilang na ang kanilang spy at revolutionary tax collector sa katimugang Luzon sa nangyaring shootout sa Brgy. San Juan, Baras, Rizal.

Kinilala ang mga nasawi sa mga alyas na Sandra na asawa ni alyas Luis na secretary naman ng Guerilla Front Cesar at taga-kolekta ng revolutionary tax gayundin ang isang alyas Onli na intelligence officer naman ng grupo.

Ayon kay 2nd Infantry Division Spokesman Capt. Jayrald Ternio, isisilbi lamang sana ng pinagsanib na puwersa ng militar at pulisya ang warrant of arrest laban sa isang Antonio Cule alyas Dad na nahaharap sa kasong murder nang bigla silang paputukan ng mga rebelde.

Nakatakas naman ang target ng operasyon na si alyas Dad na ngayon ay mahigpit na tinututukan ng mga pulis at sundalo sa kanilang hot pursuit operations.