RONDA PROBINSYA

Naibalik na ng National Electrification Administration (NEA) ang suplay ng kuryente sa halos lahat ng mga lugar na matinding naapektuhan ng bagyong Vicky noong nakaraang linggo.

Batay sa monitoring report ng Disaster Risk Reduction and Management Department ng NEA, patuloy naman ang kanilang pagsasaayos sa nalalabing lugar na sineserbisyuhan ng tatlong electric cooperative.

Anila, naibalik na ng Surigao Del Sur 1 Electric Cooperative (SURSECO 1) ang buong suplay ng kuryente sa mga bayan ng Hinatuan at Barobo habang partially restored naman sa Bislig City at mga bayan ng Lingig at Tagbina.

Dagdag ng NEA nakumpleto na rin ng agusan Del Sur Electric Cooperative Inc. ang pagsasaayos sa serbisyo ng kuryente sa Bayugan City, Esperanza, La Paz, Loreto, Prosperidad, Rosario, San Francisco, San Luis, Santa Josefa, Sibagat, Talacogon, Trento at Veruela.

Samantala, sinabi ng NEA na ilang lugar na lamang sa Tuguegarao City, mga bayan ng Alcala, Amulung, Enrile at Solana na siniserbisyuhan ng CAGELCO 1 ang bahagya pa lamang naibabalik ang suplay ng kuryente.

Patay ang apat katao habang anim na iba pa ang patuloy na pinaghahanap matapos ang nangyaring landslide sa isang minahan sa Toledo City, Cebu.

Ayon sa carmen pit ng Carmen Copper Corporation, pasado alas 4:15 ng hapon, kahapon, December 21 nang maganp ang pagguho ng lupa sa kanilang mine operation site.

Anila, apat katao ang agad na napaulat na nasawi sa insidente.

Tiniyak naman ng kumpanya na patuloy ang kanilang ginagawang pagsisikap para mahanap ang anima pang nawawala.

Mahigpit din aniya silang nakikipag-ugnayan sa pamilya ng mga naapektuhang pamilya habang patuloy ang ipaaabot nilang tulong.

Nasagip ng mga elemento ng Philippine Coast Guard (PCG) ang 14 na health workers matapos lumubog ang sinasakyan nilang bangkang de motor sa karagatang sakop ng bayan ng Rapu-Rapu sa Albay.

Ayon kay Gremil Naz, tagapagsalita ng Office of Civil Defense (OCD)-Bicol, kabilang sa mga na-rescue ang dalawang tripulante ng bangka, 13  nurses, at isang midwife na pawang mga health personnel sa ilalim ng Nurse Deployment Program (NDP) ng Department of Health (DOH) sa lalawigan.

Sinabi ni Naz na pabalik na sana ng Legazpi City ang grupo mula Rapu-Rapu island nang hampasin ng malakas na hangin at malalaking alon ang bangka na sinasakyan nila na naging dahilan ng paglubog nito.

Dead on the spot ang isang pulis makaraang pagbabarilin ng ‘di pa nakikilang salarin habang bumibili ng sorbetes sa isang tindahan sa Ormoc City, Leyte.

Ayon sa pulisya, ang biktimang si Police Corporal Ruffy Pepito, 38 taong gulang, ay nakatalaga sa Silago Municipal Police Station.

Sa paunang imbestigasyon, bumibili ng ice cream si Pepito nang may dumating na sasakyan bago bumaba ang isang lalaking naka-camouflage at niratrat ang biktima.

Iniimbestigahan pa rin ng mga awtoridad ang naturang krimen.

Patay ang magkapatid na wanted dahil sa umano’y pagkakasangkot sa organized crime activities makaraang makasagupa ng mga pulis sa Bukidnon, Northern Mindanao.

Kinilala ni Police Brigadier General Jonnel Estomo, hepe ng PNP Anti-Kidnapping Group (PNP-AKG), ang mga nasawi na sina Erwin at Emelito Torrejas, pawang mga miyembro ng Batistil Group.

Ayon kay Estomo, sisilbihan sana ng warrant of arrest si Erwin dahil sa kasong murder na nakahain laban dito sa isang korte nang makita nila ang dalawa na magkaangkas sa motorsiklo sa Brgy. San Carlos, Valencia City.

Bigla na lang umanong nagpaputok ng baril ang magkapatid kaya’t napilitan ang mga awtoridad na gumanti ng putok na ikinasawi ng mga ito.

Narekober sa pinangyarihan ng insidente ang dalawang kalibre .45 baril, ilang magasin, at isang motorsiklo.