RONDA PROBINSYA

Inihayag ng Philippine National Police (PNP) na kasabay ng 52^nd anniversary ng Communist Party of the Philippines (CPP), 32 namang miyembro ng New People’s Army (NPA) sa Agusan Del Norte ang nagbalik loob sa pamahalaan.

Ayon sa PNP, ilan sa mga sumukong NPA members ay mga squad leaders, militia ng bayan, at mass supporters ng CPP-NPA na mula sa ibat-ibang lugar ng Agusan Del Norte.

Sinabi ni PNP Chief Police General Debold Sinas, na resulta ng pinaigting na localized peace advocacy ng gobyerno ang matagumpay pagsuko ng mga dating miyembro ng NPA.

Pahayag ni Sinas, bukas ang pambansang pulisya para sa mga CPP-NPA members na magbabalik – loob sa pamahalaan at handa nang mapabilang sa malayang lipunan.

Samantala, itinurn-over naman ng mga mga surrenderees ang isang submachine gun, isang M14 rifle, 11  12-gauge shotguns, at anim na handguns.

Inatasan naman ni Sinas ang mga tauhan nito na ibigay sa 32 returnees ang government benefits na para sa kanila sa ilalim ng enhanced comprehensive local integration program.

Base sa impormasyon ng PNP, marami pang kasapi ng NPA ang nagnanais na sumuko at muling makapamuhay ng normal kasama ang kanilang mga pamilya.

Patuloy na nakabantay ang National Disaster Risk Reduction and Management Council (NDRRMC) sa pagdating ng kalamidad kahit ngayong panahon ng kapaskuhan.

Ito’y makaraang yanigin ng magnitude 6.3 na lindol ang bahagi ng Calatagan, Batangas mag-aalas otso ng umaga sa mismong araw ng Pasko kahapon.

Ayon kay Office of the Civil Defense at NDRRMC Spokesman Mark Timbal, may napaulat sa kanilang tatlong kabahayan ang bahagyang napinsala ng lindol sa Lubang, Occidental Mindoro.

Subalit hanggang sa ngayon, wala pang naiuulat sa kanilang anumang casualties ng lindol bagama’t patuloy pa rin silang nangangalap ng ulat mula sa kanilang mga tanggapan sa field.

Nalaglag na sa kamay ng mga awtoridad ang pangunahing suspek sa nangyaring pagdukot at pagpatay sa ilang dayuhan sa isla ng Samal nuong 2015.

Kinilala ni Philippine National Police (PNP) Chief P/Gen. Debold Sinas ang naarestong suspek na si Jehan Aklul alyas Khalid Akhalul o Abu Khalid.

Naaresto si Abu Khalid sa tinutuluyan nitong bahay sa lungsod ng maynila nitong araw ng Huwebes, bisperas ng Pasko sa bisa.

Mayruong outstanding warrant of arrest si Aklul na inilabas ng Panabo City Regional Trial Court dahil kasong kidnapping with homicide.

Magugunitang naging biktima ni Aklul sina John Ridsdel at Robert Hall na pawang Canadian citizen, Kjartan Sekkingstad na isang Norwegian at ang Pinay na si Marites Flor.

Pinugutan ng ulo sina Ridsdel at Hall matapos mabigo ang pamilya nito na magbayad ng ransom habang napalaya naman sina Sekkingstad at Flor sa pagitan ng mga buwan ng Hunyo at Setyembre ng taong 2016.

Malaya namang nakalilibot sa buong lungsod ng Baguio ang mga menor de edad o mga batang nasa edad 15 anyos pababa.

Sa kabila ito ng pagbabawal ng ilang mga lokal na pamahalaan sa mga nabanggit na kabataan na lumabas ng kanilang tahanan dahil sa banta pa rin ng COVID-19 sa bansa.

Ayon sa Baguio City Tourism Office, tinatayang aabot sa 200,000 turista kabilang na ang mga kabataan ang pinayagang makapagdiwang ng Pasko sa lungsod matapos sumailalim sa mahigpit na health at safety protocols bago makapasok.

Dahil dito, enjoy ang mga pamilyang nagdiwang ng Pasko sa Baguio City habang ninanamnam ng mga ito ang napakalamig na temperatura ruon na naglalaro sa 14 degrees celcius.

Dinagsa pa rin ng maraming bakasyunista ang lungsod ng Tagaytay sa mismong araw ng Pasko sa kabila ng umiiral pa ring pandemya ng COVID-19 sa bansa.

Nabatid na halos hindi na nasunod ang health protocols ng COVID-19 partikular na ang social distancing dahil sa dami ng tao sa lugar.

May ilang pamilya pa na pilit pa ring inilusot ang kanilang mga menor de edad na anak sa kabila ng ordinansang nagbabawal sa mga ito na tumungo sa mga pampublikong lugar.

Gayunman, agad pinauwi ng mga awtoridad ang mga nahuli nilang menor de edad na pagala-gala upang hindi na maging bantad pa sa hawaan ng COVID-19.

Nagpositibo sa COVID-19 ang isang manggagawa sa isla ng Boracay.

Sa isang pahayag sinabi ni Malay, Aklan Acting Mayor Frolibar Bautista, ang naturang COVID-19 patient ay isa sa 59 na mga manggagawang isinailalim sa swab testing.

Ani Bautista, ang naturang manggagawang nagpositibo sa COVID-19 ay araw-araw na umuuwi sa kanyang pamilya matapos ang trabaho kaya’t mas mabilis itong dinapuan ng virus.

Kasunod nito, agad nagsagawa ng contact tracing ang lokal na pamahalaan ng Malay, Aklan para matukoy kung sino-sino ang mga nakasalamuha ng naturang COVID-19 patient.