RONDA PROBINSYA

Nakubkob ng militar ang isang hinihinalang kuta ng New People’s Army (NPA) kasunod ng sagupaan sa Barangay Tigmarabo, Miagao, Iloilo.

Ayon sa 61st Infantry Battalion ng Philippine Army, habang nagsasagawa ng security patrol operation ang mga sundalo ay naka-engkwentro nila ang tinatayang apat napung mga rebelde na pinamumunuan ng isang Joven Ceralvo alyas Ka Lex.

Makaraan ang dalawampung minutong bakbakan, nadiskubre ng militar ang hideout ng NPA kung saan narekober mula rito ang isang 12-gauge shotgun, isang homemade shotgun, isang projector, ilang binoculars, granada, sampung backpacks, dalawang cellphone, anti-personnel mines at ilang subversive documents.

Samantala, inihayag ni Iloilo Police Provincial Office (IPPO) director Col. Gilbert Gorero na mananatiling vigilant o mapagmatyag ang mga Ilonggo cops matapos ang naturang sagupaan.

Nadagdagan pa ang mga rebeldeng mas pinili na lamang magbalik loob sa pamahalaan.

Ito’y makaraang sumuko ang dalawang miyembro ng New People’s Army (NPA) sa militar sa bayan ng Lake Sebu, South Cotabato nitong Sabado.

Kinilala ni Western Mindanao Command (WesMinCom) Chief Lt/Gen. Corleto Vinluan Jr. ang mga sumukong rebelde na sina Abraham Arida at Bryan Dusa.

Kapwa miyembro ng platoon central ng Guerilla Front Musa, Far South Mindanao Region ang dalawang sumukong rebelde.

Ayon kay Vinluan, napilitang sumuko ang dalawa dahil sa walang katiyakan, gutom at hirap sa bundok lalo’t mas pinaigting pa ang operasyon ng militar laban sa NPA.

Patay matapos tambangan ng mga hindi pa tukoy na salarin ang isang pulis sa Cagayan De Oro City, hapon nitong Sabado.

Kinilala ang biktima na si Patrolman Roy Aguas na naka-destino sa regional personnel holding and accounting unit ng Northern Mindanao Police Regional Office.

Batay sa paunang imbestigasyon, pauwi na sana si Aguas mula sa kaniyang duty sa Camp Alagar sakay ng kaniyang motorsiklo.

Pagsapit nito malapit sa isang vulcanizing shop sa bahagi ng national highway sa Brgy. Lapasan ay doon na siya pinaputukan ng salarin.

Nagtamo ng limang tama ng bala ng baril sa ulo si Aguas na nagresulta sa agaran nitong kamatayan habang tinangay naman ng salarin ang kaniyang service firearm.

Nabatid na nagsilbi ring bodyguard si Aguas ng pinaslang na alkalde ng Clarin, Misamis Occidental na si David Navarro.

Nasabat ng mga awtoridad ang may 800 gramo ng hinihinalang shabu at nagkakahalaga ng mahigit sa P5-M.

Ito’y kasunod ng ikinasang drug buy bust operations sa Angeles City sa Pampanga nitong sabado kung saan, tatlo ang naaresto.

Nakilala lamang ang mga naaresto sa alyas na Bert na nasa drug watchlist, alyas Ton na dati nang nakulong dahil sa iligal na droga at Conan na itinuturing na isang high value target.

Dahil dito, ikinakasa na ang mga kasong paglabag sa Republic Act 9165 o Comprehensive Dangerous Drugs Act of 2002 laban sa mga naaresto.

Arestado ng pulisya ang dalawang leader komunista sa bayan ng Atimonan, lalawigan ng Quezon.

Kinilala ng Quezon Provincial Police Office ang mga suspek na sina Ruel Custodio alyas Baste at Ruben Istokado alyas Oyo at Miles na kapwa tinutugis dahil sa kasong kidnapping at pagpatay.

Ayon kay Quezon Police Provincial Director P/Col. Audie Madrideo, tumatayong finance officer si Custodio ng Southern Tagalog Regional Party.

Habang political instructor naman si Istokado para sa komiteng probinsya uno ng Bicol Regional Party Committee.

Sangkot si Custodio sa pagdukot at pag-iingat ng armas noong 2019 habang double murder naman ang kasong kinahaharap ni Istokado mula pa noong 2014.

LOOK: 2 NPA Leader, arestado sa Atimonan, Quezon (courtesy: Quezon PPO) | via @jaymarkdagala pic.twitter.com/auExZB5orB

— DWIZ Newscenter (@dwiz882) December 27, 2020

Labis na ikinatuwa ng Philippine National Police (PNP) sa Caraga Region ang pagsuko ng may 32 kilabot na mandirigma ng New People’s Army (NPA).

Ito’y matapos pormal na manumpa sa watawat ng Pilipinas ang mga naturang rebelde mula sa iba’t-ibang bahagi ng Agusan Del Norte  kasabay ng ika-52 anibersaryo ng Communist Party of the Philippines (CPP).

Personal na tinanggap ni PNP Caraga Regional Director P/Bgen. Romeo Caramat Jr. ang mga sumukong rebelde sa simpleng seremoniyang isinagawa sa Butuan City.

Kasamang isinuko ng mga dating rebelde ang kanilang mga armas tulad ng isang sub machinegun, M14 rifle, 11 at 12 gauge shotguns at anim na pistola.

Sinunog din ng mga nagbalik loob na dating rebelde ang watawat ng mga komunista na simbulo ng tuluyan nilang pagtalikod sa maling ideyolohiya at armadong pakikibaka.

Humingi na ng tulong ang provincial government ng Sulu sa Inter-Agency Task Force on Emerging Infectious Diseases (IATF-EID) upang mapigilan ang pagpasok ng new COVID-19 strain sa kanilang lalawigan kasunod ng ulat na nakapagtala na ng kaso ng new variant sa kalapit nitong lugar na Sabah, sakop ng bansang Malaysia.

Sa ipinatawag na post-Christmas meeting na ipinatawag kagabi ni Pang. Duterte, sinabi nito, na inatasan na ni Sulu Governor Abdusakur Tan at ang kanyang mga staff na makipag-ugnayan na sa task force hinggil sa mga kinakailangang ipatupad upang hindi makapasok sa bansa ang new variant ng virus mula Sabah, na napakalapit lamang sa Sulu.

Tiniyak naman ng Punong Ehekutibo na ibibigay ng national government ang tulong na kinakailangan ng lokal na pamahalaan ng Sulu  para masigurong maayos na maipatutupad ang mga safeguards at preemptive measures doon.

Kaugnay nito, inihayag ng Pangulo na una nang nanawagan ang Sulu task force COVID-19 sa publiko na manatiling kalmado at sumunod sa mga advisory na magmumula sa mga opisyal ng gobyerno.