Isasailalim ng lokal na pamahalaan sa lockdown ang Sulu para mapigilan ang pagpasok ng bagong coronavirus variant sa lugar.
Ayon kay Wesmincom Chief Lt. General Corleto Vinluan, epektibo ang lockdown mula January 4 hanggang 17, 2021.
Nakakabahala kasi aniya ang napaulat na pagpasok ng bagong strain ng COVID-19 sa Sabah.
Dahil dito pansamantala na ring ipinagbabawal ang pagpapapasok ng mga magmumula sa Sabah upang maiwasan ang paglala ng sitwasyon.
Kumikilos na ang pamahalaang panlalawigan ng Puerto Princesa para pigilan ang posibleng pagpasok ng bagong variant ng COVID-19.
Ayon kay Palawan Gov. Jose Alvarez, mahigpit na nilang pinababantayan ang mga pantalan sa lalawigan matapos na maiulat ang bagong variant ng COVID-19 sa Sabah.
Kaya naman nang marinig umano niya ito, agad niyang pinakilos ang kanilang tauhan para bantayan ang mga pantalan lalo na ang malapit sa Sabah.
Tinatayang nasa 300,000 hanggang 500,000 undocumented Filipino ang nakatira sa Sabah na kapwa inaangkin ng Pilipinas at malaysia ang naturang teritoryo.
Wala nang low pressure area (LPA) na binabantayan ang PAGASA sa loob ng bansa.
Sinabi ng PAGASA na nakalabas na ng bansa ang LPA na nasa bahagi ng West Philippine Sea at ngayo’y namataan sa layong 55-kilometro timog ng Pag-asa Island.
Nalusaw naman na ang isa pang LPA na nasa silangan ng northern Luzon.
Samantala, isa pang LPA ang binabantayan ng PAGASA sa labas ng bansa na huling namataan sa layong mahigit 1,000-kilometro, silangan ng Mindanao.
Ayon sa PAGASA, ang nasabing LPA ay inaasahang papasok ng bansa sa mga susunod na araw.
Nakatanggap ng hindi bababa sa 50,000 expired na RT-PCR testing kit para sa COVID-19 ang Baguio City.
Ayon kay Baguio City Mayor Benjamin Magalong, mula sa Research Institute for Tropical Medicine (RITM) ang mga naturang expired na testing kit.
Ipinamahagi aniya ang mga ito sa isang pribadong testing laboratory sa Baguio City.
Kaugnay nito, ipinabatid na ni Magalong sa RITM at Inter-Agency Task Force for the Management of Emerging Infectious Diseases (IATF-EID) ang insidente.
Kinakailangan din aniya itong maimbestigahan dahil posibleng naipamahagi rin sa iba pang local government units ang mga katulad na expired RT-PCR testing kits.
Patay ang dalawang hinihinalang miyembro ng New People’s Army (NPA) sa engkwentro sa Jabonga, Agusan Del Norte.
Ayon kay Capt. Joash Pramis, Civil Military Operation Officer ng 901st infantry brigade ng Philippine Army, naka engkwentro ng 29th infantry battalion ang NPA matapos makatanggap ng impormasyon hinggil sa kanilang presensya sa Sitio Tinago, Barangay Baleguian.
Sinasabing pinamumunuan ng isang Marvin Bugas alyas Eman ng sandatahang yunit pampropaganda ng guerilla front 16 ang naturang grupo ng NPA.
Maliban sa dalawang namatay, may dalawang sundalo ring sugatan na ngayo’y nasa mabuting kalagayan na.
Maaaring makakuha ng 50% diskwento sa RT-PCR test para sa COVID-19 ang mga lokal na turista.
Ito ang inihayag ng Department of Tourism (DOT) sa pakikipag-tulungan kasama ang Philippine Children’s Medical Center (PCMC).
Ayon kay Tourism Secretary Bernadette Romulo-Puyat, mula sa orihinal na presyong P1,500 na COVID-19 test sa PCMC magiging P750 na lamang ito.
Layon aniya ng programang ito na palakasin muli ang turismo sa mga lugar na binuksan na at ideklarang ligtas ng Inter-Agency Task Force and Management of Emerging Infectious Disease (IATF-EID) at Local Government Units.
Kabilang sa mga destinasyong ito ay Manila, Boracay, Palawan, Cebu, Bohol, Baguio at Ilocos Norte.
Patuloy na binabantayan ng PAGASA ang tatlong Low Pressure Area (LPA) na namataan sa labas ng Philippine Area of Responsibility (PAR).
Ayon sa PAGASA, isa sa tatlong nabanggit na sama ng panahon ang inaaasahang papasok na ng PAR sa loob ng 36 na oras.
Batay sa pinakahuling pagtaya ng PAGASA, huling namataan ang unang LPA sa layong 250 kilometro kanluran hilagang kanluran ng Puerto Princesa City Palawan.
Nasa layong 111 kilometro hilaga-hilagang silangan naman ng Casiguran Aurora ang pangalawang LPA.
Habang nasa layong 1,500 kilometro silangan ng Mindanao naman ang pangatlo.
Bagama’t sinabi ng pagasa na mababa ang tsansang maging ganap na bagyo ang tatlong lpa, makaaapekto pa rin ito sa lagay ng panahon sa bansa.
Inaasahang makararanas ng katamtaman hanggang malakas na pag-ulan ang bahagi ng Northern at Eastern Cagayan kabilang ang Babuyan Islands, eastern portion ng Isabela at Kalayaan Islands dahil sa mga LPA.
Mahina hanggang katamtamang lakas naman ng ulan ang inaasahan sa nalalabing bahagi ng Cagayan Valley, Apayao, Kalinga, Mountain Province, Ifugao, Aurora, Northern portion ng Quezon, Palawan, Eastern Visayas at Caraga Region.
Nais ng pamahalaang panlalawigan ng Sulu na suspendihin muna ang pagbabalik bansa ng mga Filipino mula sa Sabah, Malaysia.
Ito ay matapos na maitala sa naturang teritoryo ang bagong variant ng COVID-19.
Ayon kay Sulu Governor Abdusukur Tan, ito ang dahilan kaya humihingi sila ng tulong sa national government partikular na sa Inter-Agency Task Force on the Management of Emerging Infectious Diseases (IATF-EID).
Ani Tan, kanilang hinihiling sa pamahalaan na makipag-ugnayan sa Malaysian government para pansamantala munang suspendihin ang repatriation ng mga undocumented na Filipino sa Sabah.
Bukod dito, sinabi ni Tan na masyadong malawak ang karagatang sakop at nakapalibot sa Sulu na halos umaabot na sa Sabah kaya mahihirapan silang bantayan ang border nito.
Batay sa pinakahuling tala, tinatayang nasa 300,000 hanggang 500,000 mga hindi dokumentadong Filipino ang naninirahan sa Sabah.
Limang tama ng bala sa ulo ang tumapos sa buhay ng isang pulis makaraang pagbabarilin ng hindi pa nakikilalang mga salarin sa Cagayan de Oro City.
Kinilala ang biktima na si Patrolman Roy Aguas, nakatalaga sa Northern Mindanao Police, at dating bodyguard ni dating Clarin, Misamis Occidental Mayor David Navarro na napatay din sa ambush noong nakaraang taon.
Sa imbestigasyon, nasa tapat ng isang vulcanizing shop si Aguas at pasakay na sa kanyang motorsiklo nang lapitan ng hindi pa nakikilalang mga lalaki at pinagbabaril sa Barangay Lapasan.
Bago tumakas ang mga salarin ay kinuha pa ang service firearm ng biktima.
Iniimbestigahan pa rin ang naturang pamamaslang.
Patuloy ang pagbaba ng bilang ng mga aktibong kaso ng coronavirus disease 2019 (COVID-19) sa Bataan.
Katunayan, ayon sa Provincial Health Office, 98 na lamang ang actives cases sa kanilang lugar.
Sinasabing umakyat na sa 3,472 ang total recoveries sa Bataan habang 3,648 naman ang confirmed cases.
Nananatili naman sa 78 ang death toll sa naturang probinsya.