RONDA PROBINSYA

Patay ang isang tatlong taong gulang na batang lalaki habang nasa dalawa naman ang napaulat na nawawala sa Bicol.

Ito’y dulot ng mga nararanasang pag-ulan sa rehiyon dahil sa umiiral na tail end of a cold front.

Ayon sa Provincial Disaster Risk Reduction and Management Office (PDRRMO) ng Camarines Sur, nalunod ang nasabing bata matapos tumaob ang sinasakyan nitong bangka sa bayan ng Canaman.

Nagmula naman ang mga napaulat na nawawala sa bayan ng Garchitorena matapos tumaob din ang sinasakyan nilang bangka sa bisperas ng Bagong Taon.

Himas rehas ang nasa 16 katao sa mismong araw ng Bagong Taon matapos silang maaresto dahil sa iba’t ibang paglabag.

Batay sa ulat ng Bulacan Provincial Police Office, 14 sa mga ito ang nahuli dahil sa iligal na sugal sa Marilao at San Jose Del Monte City.

Isa namang guwardya ang dinampot dahil sa alarm and scandal sa bayan ng Balagtas dahil sa pagpapautok ng baril dulot ng kalasingan.

Sa Plaridel naman, isang most wanted ang naaresto matapos ang ikinasang manhunt operations ng pulisya dahil sa iligal na droga.

Hawak na ng pulisya ang mga nabanggit na suspek habang ikinakasa na ang mga kasong isasampa laban sa kanila.

Dalawa ang patay matapos bumangga ang isang motorsiklo sa kasalubong nitong kotse sa Calamba City sa Laguna sa unang araw ng Bagong Taon.

Kinilala ni Laguna Provincial Police Office Spokesperson P/LtC. Chitadel Gaoiran ang isa sa mga nasawi na sina Rafael Base, driver ng motorsiklo at angkas nito na hindi pa tukoy ang pagkakakilanlan.

Nangyari ang aksidente dakong alas-5 ng madaling araw sa national highway na nasa bahagi ng Brgy. Parian sa nasabing lungsod.

Nag-counter flow ang kotseng minamaneho ng isang Ryan Sapian nang bumangga rito ang motorskilong minamaneho naman ni base.

Tumilapon si base at angkas nito at nasagasaan pa ng kotse na nagresulta sa agaran nilang pagkasawi.

Sa lakas ng pagkakabangga, tumilapon din ang motorsiklong minamaneho ni base at tumama sa isa pang motorsiklong minamaneho naman ni Santiago Battaliones.

Mahaharap naman sa kasong reckless imprudence resulting to homicide, physical injuries at damage to properties si Sapian.

Magdamag na bumuhos ang malakas na ulan na may kasamang malakas na hangin sa Southern Quezon.

Pasado alas 2:00 kaninang madaling araw nang umapaw ang ilog sa barangay Sta. Cecilia sa Tagkawayan, Quezon kaya’t binaha ang ilang bahagi ng lugar kung saan pinasok din ng baha ang ilang bahay.

Binaha rin ang ilang lugar sa bayan ng bayan ng Lopez, sa Maharlika Highway sa Gumaca nagkaroon naman ng pagguho ng lupa at bato na kaagad nalinis ng lokal na pamahalaan.

Kanselado naman ang biyahe ng mga pampasaherong bangka patungo sa mga isla ng Alabat at Polillio samantalang may mga pasaherong stranded sa Atimonan Port at Real Port.

Nagpatuloy ang sama ng panahon hanggang kaninang umaga.