RONDA PROBINSYA

Patay ang isang construction worker matapos barilin ng isang pulis nang mapagkamalan umanong holdaper sa bayan ng Sta. Rita sa Pampanga.

Kinilala ni Pampanga Police Director Col. Arnold Thomas Ibay ang biktima na si Federico Pineda habang isinailalim na sa restrictive custody si Cpl. Eframe Ramirez.

 Ipinag-utos din ni Gov. Dennis Pineda ang pagdis-arma kay Ramirez, gayundin ang pagsasampa ng mga kasong kriminal at administratibo laban dito.

Ayon kay Michelle Pagauisan, napagkamalan ng pulis ang kanyang kapatid na siyang humoldap at nanaksak sa isang mag-asawa sa Sunny Side Subdivision sa Barangay San Matias.

Sinasabing inakala ng pulis na si Pineda ang holdaper dahil kakulay ng damit nito ang damit ng suspek batay sa kuha ng CCTV camera hanggang sa mabaril niya ito na ikinasawi ng lalaki.

Patuloy ang imbestigasyon sa naturang insidente.

Patay ang tatlo katao habang nasa 34 na iba ang naospital sa naganap na diarrhea outbreak sa munisipalidad ng Jose Abad Santos sa Davao Occidental.

Ayon kay Roger Deloy ng Jose Abad Santos Municipal Disaster Risk Reduction and Management Office, nagmula lahat ng 34 na naospital sa barangay Butuan.

Kanila naman aniyang hinihinala na ang suplay ng tubig sa lugar ang dahilan ng diarrhea outbreak lalo’t karamihan aniya sa mga residente ay sa kalapit na sapa o poso kumukuha ng inuming tubig.

Sinabi ni deloy, kasalukuyan nang sinusuri ng regional health unit ang kalidad ng tubig sa lugar.

Arestado ang dalawang turista na nagpresenta ng pekeng COVID-19 RT-PCR test results sa isla ng Boracay.

Ayon sa lokal na pamahalaan ng bayan ng Malay, dumating ang dalawa noong December 29 ng nakalipas na taon.

Agad namang tinawagan ng mga otoridad ang clinic na nag-isyu daw ng RT-PCR tests, kungsaan dito na natuklasan na fake documents ang iprinisenta ng mga ito.

Nakatakdang sampahan ng kaukulang kaso ang dalawang turista na sumasailalim na ngayon sa quarantine sa Aklan training center habang hinihintay ang resulta ng kanilang RT-PCR.

Tumanggi namang magbigay ng anumang pahayag ang mga ito.

Ilang lugar sa Visayas ang nakaranas ng mga pagbaha sa kasagsagan ng pagsalubong ng bagong taon.

Una nang sinabi ng PAGASA, na dahil sa tail end of a cold front kaya nakaranas ng sama ng panahon ang ilang mga lalawigan sa bansa.

Base sa ulat, 10 barangay ang naapektuhan ng pagbaha sa bahagi ng Victorias, Negros Occidental.

Aabot naman sa 400 pamilya ang kinailangang ilikas doon, kung saan ang iba sa mga residente ay umakyat na sa bubong habang naghihintay ng rescue.

Samantala, nasa 100 pamilya naman sa Silay City ang pansamantalang nananatili sa evacuation center matapos na tumaas ang tubig sa kanilang mga lugar.

Dalawa ang nasawi at apat na iba pa ang nawawala kasunod ng nangyaring pagbaha sa Bicol Region na epekto ng tail-end of a cold  front.

Ayon sa Sorsogon Provincial Disaster Risk Reduction and Management Office, isang 28 anyos ang pinakahuling nasawi sa bahagi ng Pilar, Sorsogon.

Noong biyernes, isang tatlong taong gulang naman na bata ang nalunod matapos na tumaob ang sinasakyang bangka sa Canaman, Camarines Sur.

Bunsod nito, isasailalim sa beripikasyon ng mga kinauukulan ang ulat na ito na pangungunahan ng Department of the Interior and Local Government Regional Office 5.

Samantala, apat pang indibidwal ang sinasabing nawawala sa rehiyon ng Bicol kung saan nagpapatuloy parin hanggang sa ngayon ang mga isinasagawang search and rescue operation ng mga otoridad.

Nagbabala ang pagasa sa posibleng pagbaha at pagguho ng lupa bunsod ng katamtaman hanggang sa matinding pagbuhos ng ulan.

Ito’y ayon sa weather bureau ay bunsod ng pag-iral ng frontal system sa silangang bahagi ng bansa partikular na sa Bicol Region.

Kaugnay nito, aabot sa mahigit 450 pamilya o katumbas ng mahigit sa 1,200  indibiduwal ang inilikas.

Batay pa sa ulat ng Provincial Disaster Risk Reduction and Management Office ng Camarines Sur, nakapagtala sila ng 55 mga pagbaha mula sa 22 bayan at dalawang lungsod.

Labing walo (18) ang naitala nilang pagguho ng lupa mula sa 10 bayan at isang lungsod sa nasabing lalawigan.