RONDA PROBINSYA

Lalagda ng kasunduan si Bacolod City si Mayor Evelio Leonardia sa AstraZeneca Pharmaceuticals, upang makakuha ng bakuna kontra coronavirus ang lungsod.

Ayon kay Leonardia, ito ay malaking hakbang para makakuha kaagad ng COVID-19 vaccine kapag maaprubahan ito ng pamahalaan.

Hindi naman nabanggit ni Leonardia, kung ilang doses ng bakuna ang kukunin nila sa AstraZeneca.

Magugugnitang noong Diseyembre, bumuo si Leonardia ng LCP Committee on Vaccine Availment na pinamumunuan ni Iloilo City Mayor Jerry Treñas, para siguraduhin na maagang makakuha ang mga city mayor ng abot-kayang at murang COVID-19 vaccine. —sa panulat ni John Jude Alabado 

Magpapatupad ng liquor ban ang lokal na pamahalaan ng Binmaley, Pangasinan upang paigtingin pa ang laban nila kontra sa coronavirus disease 2019 (COVID-19).

Sa Executive Order (EO) ni Mayor Simplico Rosario, pinagbabawal ang pagtitinda, pagbili at pag-inom ng alak simula ala-1 ng madaling araw, ika-7 ng Enero.

Ayon kay Mayor Rosario, isa ang liquor ban ang inirekomenda ng municipality’s task force against COVID-19 para maiwasan ang paglobo ng kaso ng coronavirus sa bayan.

Hindi naman nabanggit sa abiso kailan magtatagal ang nasabing kautusan.

Samantala, ang business establishments naman lalabag sa kautusan ay maalisan ng business permits. — sa panulat ni John Jude Alabado 

Ikinukunsidera ng pamunuan ng Philippine Military Academy (PMA) ang pagpapatupad ng lockdown dahil sa pagdami pa ng mga dinadapuan ng coronavirus disease 2019 (COVID-19) sa Fort Del Pilar sa lungsod ng Baguio.

Ayon kay Armed Forces of the Philippines (AFP) Spokesman Major General Edgard Arevalo, pumalo na sa 50 mga kadete at ilang tauhan nito ang tinamaan ng virus.

Giit ni Arevalo, kung magpapatuloy ang pagsipa ng bilang ng mga dinadapuan ng virus, maaari silang magpatupad ng lockdown sa buong kampo.

Kaugnay nito, lumabas sa isinagawang contact tracing, nagkaroon ng transmission ng virus sa PMA bubble dahil sa mga naghahatid ng pagkain sa mga kadete at sundalo.

Kasunod nito, agad namang dinala sa quarantine facility and mga dinapuan ng COVID-19, habang nagpadala naman ng test kits si National Task Force Against COVID-19 chief implementer Secretary Carlito Galvez Jr. para sa mass testing sa PMA.

Isang linggo munang isasara ang operating rooms ng isang public hospital sa Cebu City para sa kaukulang disinfection.

Ayon kay Dr. Helen Madamba, coronavirus disease 2019 (COVID-19) chief implementor ng Vicente Sotto Memorial Medical Center, nagpositibo sa COVID-19 ang 18 health workers ng ospital at naka-isolate na ang mga ito.

Isang operating room lamang aniya ang binuksan nila for emergency cases at nakikipag-ugnayan na sila sa iba pang ospital sa Central Visayas na maaaring pagdalhan sa iba pang pasyente kailangang ma-operahan.

Ipinabatid ni Madamba na naglalaro sa halos 20 kaso ng COVID-19 ang naitatala nila araw-araw sa nasabing ospital.

Patay ang isa katao at sugatan ang apat na iba sa pag-atakeng hinihinalang target ang alkalde ng South Upi sa Maguindanao.

Ayon sa mga otoridad, nakaligtas si South Upi Mayor Reynalbert Insular sa nasabing pag-atake na mahigpit nang iniimbestigahan ng mga otoridad.

Ang pampasabog ay isinabay sa convoy ni Insular sa vicinity ng Barangay Pandan at Barangay Pilar sa South Upi, alas-2 ng hapon, kahapon.

Mabilis namang nailikas ng mga otoridad sa ligtas na lugar ang grupo ni Insular.

Sinasabing nanunog din ang mga hinihinalang miyembro ng Bangsamoro Islamic Freedom Fighters  (BIFF) ang ilang kabahayan sa lugar. —ulat mula kay Jaymark Dagala (Patrol 9)

Prayoridad ng Aklan Provincial Health Office ang staff ng Kalibo International Airport para sa coronavirus disease 2019 (COVID-19) testing.

Kasunod na rin ito nang pagpapatigil sa mass testing ng hotel workers sa Boracay Island matapos magpositibo sa COVID-19 ang walong empleyado ng Kalibo International Airport.

Una nang naisalang sa mass testing ang 80% ng 1,400 hotel workers sa Isla ng Boracay.

Ang Aklan ay nakapagtala ng 451 infections, 66 rito ay active cases samantalang 15 ang nasawi.

Naaagnas na ang bangkay ng isang pulis nang matagpuan sa isang ilog sa Aglipay, Quirino.

Kinilala ni Cagayan Valley regional police director, Police Brig. Gen. Crizaldo Nieves ang biktima na si Police Chief Master Sergeant Dexter Manicap Altre na nakatalaga sa Maddela police station sa lalawigan.

Babala ni Nieves, hindi sila titigil hangga’t hindi nila nalalaman ang katotohanan sa likod ng pagkamatay ni Altre na noong Disyembre 29 pa ini-ulat na nawawala.

Nabatid na nadiskubre ng isang residente ang katawan ni Altre na lumulutang sa Addalam River sa Barangay Cabugao na agad naman nitong ipinarating sa mga awtoridad.

Sinasabing may mga tama ng bala sa iba’t ibang parte ang biktima pero isasailalim pa ang labi nito sa awtopsiya.