RONDA PROBINSYA

Binaha at nakapagtala ng maliliit na landslide sa ilang lugar sa Bicol Region dahil sa pag-ulang dala ng hanging amihan.

Ayon kay Office of Civil Defense (OCD) Region 5 Public Information Officer Gremil Naz, karamihan sa mga nakaranas ng pagbaha at maliliit na pagguho ng lupa ang mga isolated at malalayong lugar sa rehiyon.

Maliban lamang aniya sa bahagi national road sa Catanduanes.

Gayunman, sinabi ni Naz na mabilis ding bumaba ang tubig baha sa mga naturang lugar.

Patuloy din aniya ang pagbabantay ng OCD 5 sa posibleng pagdaloy ng lahar mula sa Bulkang Mayon.

Nasabat ng pinagsanib na puwersa ng Bureau of Customs (BOC), Philippine Drug Enforcement Agency (PDEA) at NAIA Iner-Agency Drug Interdiction Task Group ang nasa limang kilo ng kush o high grade marijuana

Kasunod ito ng pagkakaaresto sa dalawang indibiduwal na tumangggap sa nasabing iligal na kontrabando na nagkakahalaga ng P8.2 milyong.

Kinilala ang mga naaresto na sina Van Joshua magpantay at Johnyengle Hernandez na dinakip sa loob ng isang vape shop sa Lipa City, Batangas.

Batay sa ulat ng BOC, dumating ang kontrabando sa pamamagitan ng courrier company na Fedex sa central mail exchange center sa Pasay City na nakapangalan sa isang nina manual na taga-California, USA.

Idineklara ang nasabing parcel bilang musical instrument na ipinadala sa isang Dimitria Escalona na residente ng batangas subalit nang buksan ito, tumambad ang mga high grade marijuana na nakasilid sa vacuum sealed na transparent plastic bag.

Nanganganib masibak sa serbisyo ang isang pulis mula sa Caraga Regional Police Office matapos magpositibo sa iligal na droga.

Kinilala ni Philippine National Police (PNP) Chief P/Gen. Debold Sinas ang naturang pulis na si Cpl. John Rey Ibasco na naka-assign sa regional logistics and research development division.

Kabilang si Ibasco sa 332 pulis na isinailalim sa surprise drug test kung saan, tanging ang nabanggit lamang ang nagpositibo sa paggamit ng bawal na gamot.

Dahil dito, ipinag-utos na ni Sinas ang imbestigasyon at pagsasagawa ng summary dismissal proceedings laban kay ibasco.

Nagbanta pa ang PNP chief sa iba pang mga pulis na gumagamit ng iligal na droga na tumigil na o magpaalam na sa kanilang uniporme.

Napasakamay na ng Lanao Del Sur Provincial Government ang 40 bed capacity na bagong healthcare facility sa Marawi City.

Ito’y ayon kay Public Works and Highways Secretary at Isolation Czar Mark Villar ay sa kabila ng pagbaba ng mga naitatalang bagong kaso ng COVID-19 sa bansa.

Ayon sa kalihim, magsisilbing quarantine quarters para sa COVID-19 cases ang Sagongsongan Multi-Purpose Bldg. sa Brgy. Sagongsongan relocation site.

Dagdag pa ni Villar, kayang makapag-accommodate ng nasabing pasilidad ng mga magpopositibo sa COVID-19 mula asymptomatic hanggang sa may mild cases nito.

Sa kasalukuyan, mayruon nang limandaan at siyam na mga pasilidad ang nakumpleto na ng pamahalaan kung saan, mayruon itong 19,083 bed capacity.

Arestado ang isang ama sa Pangil, Laguna, dahil sa panghahalay umano sa kanyang menor de edad na anak.

Ayon sa ulat noong 2018 pa nangyari ang nasabing insendente sa kanilang bahay sa Binangonan, Rizal.

Nangyayari raw ang panghahalay kapag ang anak niya lang kasama nito sa bahay.

Nahaharap ang suspek sa two counts of rape at act of lasciviousness.

Itinanggi naman ng suspek ang isinampang kaso laban sa kanya. — sa panulat ni John Jude Alabado

Arestado ang isang kilabot umanong tulak ng droga sa ikinasang buy-bust operation ng mga awtoridad sa Pavia, Iloilo.

Ayon sa pulisya, ang suspek na si Mark John Wendam ay nabilhan ng isang pulis na nagpanggap na buyer ng isang bag ng marijuana na nagkakahalaga ng P3,000.

Maliban dito, nasabat din mula kay Wendam ang isang kilo ng damo na nagkakahalaga ng P150,000.

Tatlo pang umano’y kasabwat ni Wendam ang nadakip sa isinagawang follow-up operation ng pulisya.

Mahaharap ang mga suspek sa kasong paglabag sa Comprehensive Dangerous Drugs Act of 2002.