RONDA PROBINSYA

Hindi titigil ang pinagsanib na puwersa ng militar at pulisya na tugisin at panagutin sa batas ang mga nasa likod ng naganap na pamamaril sa Lanao Del Norte, kahapon, ika-14 ng Enero.

Ito’y ayon kay Joint Task Force Zampellan Commander M/Gen. Generoso Ponio makaraang kundenahin nito ang ginawang pagpatay ng armadong grupo sa 4 katao kabilang na ang 3 sundalo at 1 sibilyan.

Ayon naman kay Army’s 2nd Mechanized Infantry Brigade Commander B/Gen. Facundo Palafox, patuloy pa nilang inaalam ang pagkakakilanlan ng nasawing sibilyan.

Habang hindi muna isasapubliko ang pagkakakilanlan ng 3 nasawing sundalo hangga’t hindi pa naipaaalam sa kani-kanilang pamilya ang sinapit ng kanilang kaanak.

Magugunitang nangyari ang insidente ng pamamaril kahapon ng umaga sa detachment ng militar sa Brgy. Tangclao, Poona Piagapo sa naturang lalawigan. — ulat mula kay Jaymark Dagala (Patrol 9)

Posibleng nakararanas na ng “surge” o pagsirit sa kaso ng coronavirus disease 2019 (COVID-19) ang Davao City matapos ang holiday season.

Ayon kay Dr. Ashley Lopez, focal person ng COVID-19 task force ng Davao City, nagsimulang tumaas ang bilang ng COVID-19 infections noong January 7 kung saan naitala ang 131 kaso.

Sinabi ni Lopez, ito na ang epekto ng tinatawag na Christmas surge o pagdami ng kaso nitong holiday kasunod ng pagdagsa ng mas maraming tao para mamili o dumalo sa mga party.

Kasunod nito, inatasan na aniya sila ni Vaccine Czar Carlito Galvez Jr. na suriin kung nakapasok na rin ang bagong variant ng COVID-19 sa lungsod kasunod ng paglobo ng kaso.

Batay sa tala ng Department of Health, nadagdagan ng 100 ang kaso ng COVID-19 sa Davao City noong January 1; 143 na bagong kaso noong January 9; 140 na bagong kaso noong January 11 at 137 na bagong kaso noong January 12.

Natagpuan ang isang putol-putol na katawan ng lalaki sa Los Baños, Laguna.

Ayon sa ulat, nasa apat na trash bag nakalagay ang chop-chop na katawan ng matagpuan ng dalwang residente ng bayan.

Batay sa dalawang residenteng nakakita sa katawan hiwa-hiwalay daw ang binti, kamay, katawan at ulo ng biktima.

Sa inilabas na police report, maputi at singkit ang biktima, na tinatayang may edad 30 hanggang 40 taon at mayroong tattoo na Chinese character sa likod.

Sa ngayon, inaalam na ng pulisya ang pagkakakilanlan ng biktima. — sa panulat ni John Jude Alabado

Pansamantalang ipinatigil ang lahat ng misa sa Basilica Minore del Sto. Niño sa Cebu City, ngayong araw.

Matapos tumaas ang kaso ng coronavirus disease 2019 (COVID-19) sa lungsod.

Ayon kay Fr. Pacifico Nohara Jr., sa lahat ng deboto maaaring pa rin silang lumahok sa novena masses at ipagdiwang ang pista ng Señor 2021 sa kanilang live streaming sa pamamagitan ng Facebook, Youtube channel at iba pang nilang broadcast partners.

Batay sa magkahiwalay na abiso, sabi ni Nohara, na bukas pa rin ang Basilica mula alas-6 ng umaga hanggang alas-5 ng hapon para makabisita ang mga deboto sa simbahan.

Samantala, ayon sa ulat ikinansela rin ang mga ritwal na dance competition sa Sinulog 2021 para malabanan ang pagkalat ng coronavirus. —sa panulat ni John Jude Alabado

Muling isinailalim sa general community quarantine ang Laoag City sa Ilocos Norte.

Ito ay makaraang sumirit muli ang kaso ng coronavirus disease 2019 (COVID-19) sa lugar.

Isinailalim din sa “total lockdown” ang Barangay San Lorenzo at Caaoacan, gayundin ang maraming sitio sa lugar.

Sa ngayon, batay sa pinakahuling tala ng lokal na pamahalaan ng Laoag City, pumapalo na sa 424 ang kabuuang kaso ng virus sa lugar, kung saan 124 sa mga ito ang aktibo, habang 297 na ang nakarerekober.

Walang pasok sa trabaho, gayundin sa mga pampubliko at pribadong eskwelahan sa buong Bataan bukas, ika-11 ng Enero.

Ito’y dahil sa pagdiriwang ng 264th founding anniversary ng lalawigan matapos itong ideklara bilang hiwalay na probinsya mula sa Pampanga noong Enero 11, 1757.

 Matatandaang idineklara ni Pangulong Rodrigo Duterte noong 2018 ang ika-11 ng Enero bawat taon bilang special non-working holiday at tinawag itong Bataan Foundation Day.

Binalot ng frost o yelo ang mga tanim sa atok Benguet.

Ito ay matapos maitala sa 6 °C  ang temperatura sa lugar kaninang umaga.

Karaniwang nangyayari ito sa Benguet tuwing Enero hanggang Pebrero dahil sa pagbaba ng temperatura dala ng hanging amihan.

Sinabi ng PAGASA, asahan nang magpapatuloy ang mababang temperatura o malamig na klima sa lugar hanggang susunod na buwan.

Samantala, nasa 10.4 °C  naman ang temperatura sa Baguio City kaninang umaga na siyang pinakamababang temperaturang naitala ng pagasa magmula noong nakalipas na ber months.