RONDA PROBINSYA

Ipinasara ng Department of Environment and Natural Resources (DENR) ang anim na ektaryang open dumpsite sa Barangay Sahud-Ulan sa Tanza, Cavite.

Ito’y ayon sa DENR ay dahil sa paglabag ng nasabing dumpsite sa ecological solid waste management act of 2000.

Ayon kay DENR Undersecretary Benny Antiporda, mayroong tatlong metrong taas o 180,000 metriko kubiko ang naturang dumpsite na may halo-halong solid waste materials at walang kaukulang permiso mula sa DENR.

Kabilang sa mga tambak ng basura na nakita sa operasyon ay nagmula sa industrial parks, malls, supermarkets, food chains, restaurants at food product manufacturers.

Kinumpiska rin ang dalawang dump trucks at isang backhoe na naabutan sa lugar na itinurn-over sa DENR-PENRO sa Cavite.

Kinastigo ng pamunuan ng Philippine National Police (PNP) ang apat nilang tauhan na naaresto sa ikinasang drug buy bust operations sa Zambales kahapon.

Ayon kay PNP Chief P/Gen. Debold Sinas, inatasan na niya ang Police Regional Office 3 na isailalim sa restrictive custody ang apat na pulis na sina p/Lt. Reynato Basa Jr, P/Cpl. Gino Dela Cruz, P/Cpl. Edesyr Alipio at P/Cpl. Godfrey Parentela.

Ayon kay Sinas, kaniya na ring inatasan ang Directorate for Investigative and Detective Management (DIDM) na pakatutukan ang pagsasampa ng kaso laban sa mga ito.

Lumabas sa imbestigasyon na nakatalaga ang apat na naarestong pulis sa drug enforcement unit ng Olongapo City Police na nagsilbing lookout sa sinalakay na shabu laboratory sa finback street, Subic Freeport.

Pagtitiyak pa ng PNP chief, masisibak sa serbisyo ang apat na pulis sa sandaling mapatunayang sangkot din sila sa kalakalan ng iligal na droga at operasyon ng sinalakay na shabu laboratory sa lungsod.

Nasawi ang isang abogado sa Malaybalay City, Bukidnon matapos pagbabarilin.

Ayon sa ulat, kinilala ang biktima na si Atty. Winston Intong.

Batay sa police report, limang basyo ng bala mula sa kalibre .45 na baril ang nakita sa lugar na pinangyarihan ng krimen.

Sa ngayon, inaalam pa kung anong motibo sa krimen at pagkakakilanlan ng mga salarin.

Samantala, iimbestigahan din ang ulat na sangkot sa ilegal na droga si Intong at nakasama sa drug list ni Pangulong Duterte. —sa panulat ni John Jude Alabado

Kalaboso ang isang Sangguniang Kabataan (SK) chairman na suma-sideline umano sa pagtutulak ng ipinagbabawal na droga matapos madakip ng mga awtoridad sa bayan ng San Pascual, Batangas.

Ayon kay Police Maj. John Eric Antonio, acting chief of police ng San Pascual police, nahuli sa buy-bust operation ang SK chair na si Lloyd Vincent Jumarang ng bayan ng Cuenca at ang kasama nitong si Marcelino Cabsag.

Nasabat mula kina Jumarang at Cabsag ang tinatayang nasa P20,000 na halaga ng hinihinalang shabu at isang motorsiklo.

Nakakulong na ang dalawa at nahaharap sa kasong paglabag sa Comprehensive Dangerous Drugs Act.

Ipinag-utos na ng isang korte sa Sulu ang pag-aresto sa siyam na pulis na nasibak dahil sa pagkakasangkot sa pamamaril sa apat na Army intelligence operatives sa Jolo noong June 2020.

Bukod dito, ayon kay Prosecutor Honey Delgado ng Office of the Prosecutor General, nasa proseso na ng pagdinig ang korte kaugnay ng hirit na hold departure orders laban sa mga akusado upang hindi makalabas ng bansa ang mga ito.

Matatandaang nakakita ng sapat na basehan ang prosekusyon laban kina Senior M/Sgt. Abdelzhimar Padjiri; M/Sgt. Hanie Baddiri; S/Sgt. Iskandar Susulan; S/Sgt. Ernisar Sappal; Cpl. Sulki Andaki; Pat. Moh Nur Pasani; S/Sgt. Almudzrin Hadjaruddin; Pat. Alkajal Mandangan; at Pat. Rajiv Putalan para sa apat na bilang ng kasong murder at planting of evidence.

Samantala, umaasa si Philippine National Police (PNP) spokesperson, Brig. Gen. Ildebrandi Usana na susuko na sa lalong madaling panahon ang mga naturang pulis.