RONDA PROBINSYA

Isang milyong pisong halaga ng hinihinalang shabu ang nasabat ng mga awtoridad mula sa isang umano’y high-value target sa ikinasang operasyon sa Zamboanga City.

Kinilala ni Brig. Gen. Ronaldo Genaro Ylagan, Police Regional Office-9 o PRO-9 director, ang suspek na si Nurhan Ismula na nadakip sa buy-bust operation sa Barangay Arena Blanco.

Halos 100 gramong droga ang nakuha mula sa kanya na tinatayang nagkakahalaga ng P1.1 million pesos.

Mahaharap ang suspek sa kasong paglabag sa Comprehensive Dangerous Drugs Act of 2002.

Isa na namang umano’y miyembro ng Communist Party of the Philippines-New People’s Army (CPP-NPA) na wanted sa mga kasong murder at frustrated murder ang naaresto ng mga awtoridad sa Toboso, Negros Occidental.

Kinumpirma ng Philippine Army’s 3rd Infantry Division, ang pagkakaaresto kay Alberto “Berting” Pandacan, 70 taong gulang, at sinasabing kasapi ng Northern Negros Front Komiteng Rehiyon-Negros ng NPA.

Si Pandacan ay nahuli ng mga pulis at sundalo sa kanilang bahay sa Sitio Seraje, Barangay San Isidro sa bisa ng warrants of arrest na inilabas ni Presiding Judge Danilo Amisola ng Regional Trial Court Branch 58 sa San Carlos City.

Tinambangan umano ng grupo ni Pandacan ang mga sibilyan habang lulan ang mga ito ng isang utility truck sa Toboso noong Hulyo 13, 2009.

Nakatanggap ng cash assistance ang mga health care workers na tinamaan ng COVID-19 sa Zamboanga Peninsula o Region 9.

Ayon kay Dr. Dennis Dacayanan ng Department of Health-Region 9 (DOH-9), naglaan ng P5.1 million ang kanilang tanggapan para sa mga medical front-liners na dinapuan ng virus bilang bahagi ng benefits package sa ilalim ng Bayanihan to Recover as One Act.

Sinabi ni Dacayanan na mula nang mag-umpisa ang pandemya noong nakaraang taon ay nasa 467 health care workers na ang naghain ng benefit claims pero 244 lamang sa mga ito ang inaprubahan ng DOH.

Patay ang tatlong sundalo matapos tambangan ng mga hinihinalang miyembro ng New People’s Army (NPA) sa Legazpi City kaninang umaga.

Batay sa ulat ni Capt. John Paul Belleza, tagapagsalita ng Army’s 9th Infantry Division, magka-angkas sa dalawang motorsiklo ang apat na sundalo nang walang sabi-sabing paulanan sila ng bala sa bahagi ng Brgy. Banquerohan.

Dead on the spot ang tatlo sa mga sundalo habang nakaligtas naman ang isa sa kanila at nakahingi ng tulong mula sa kanilang mga kasamahan.

Dagdag pa ni Belleza, patungo sana ang mga biktima sa banquerohan public market para mamili ng kanilang makakain nang isakatuparan ang krimen.

Pawang nakatalaga sa community support program ng militar ang apat na sundalo sa Brgy. Bariis at Banquerohan.

Agad namang nagkasa ng hot pursuit operations ang militar laban sa mga rebeldeng nasa likod ng naturang pananambang.

Nakumpiska ang nasa P421,000 halaga ng shabu mula sa dalawang suspek sa San Fernando, Pampanga, kahapon.

Batay sa ulat, kinilala ang mga suspek na sina alyas “Pogi” at alyas “Kalbo,” isang menor de edad na parehong residente ng Barangay Bulaon ng lungsod.

Ayon sa police report, nakuhan ang mga suspek ng 13 sachet ng shabu na may bigat na 62 gramo.

Haharap ang dalawang suspek sa paglabag ng Comprehensive Dangerous Drugs Act of 2002. —sa panulat ni John Jude Alabdo

Idinaan na lang sa throwback ng Cebu City government ang kanilang magarbong Sinulog festival sa pamamagitan ng online viewing.

Ito ang naging hakbang ng pamahalaang lokal ng Cebu City matapos kanselahin ang lahat ng pisikal na aktibidad nito dahil sa nagpapatuloy na banta ng COVID-19 sa bansa.

Ayon kay Sinulog organizer chairman at Cebu City Vice Mayor Michael Rama, tampok sa Sinulog rewind ang lahat ng magagandang ritual, street dancing, puppeteer at iba pa.

Isang misa rin ang idinaos kaninang alas 9:00 ng umaga sa Pilgrim center na nasa harap ng basilika ng Senyor Sto. Niño De Cebu subalit sa limitadong kapasidad lamang.

Mahigpit din ang pagpapapasok ng pulisya sa basilika grounds kung saan, maaari lamang manatili ng 15 hanggang 30 segundo ng isang deboto upang makapag-alay ng panalangin.

Patay ang pitong pasahero ng isang UH-1H helicopter matapos na bumagsak o mag-crash sa barangay Bulonay, Bukidnon.

Ayon sa Philippine Air Force, maghahatid lamang sana ng suplay para sa  8th infantry battalion ng Philippine Army ang military chopper nang bigla itong bumagsak.

Agad namang nagtungo sa crash site ang 8^th IB upang magsagawa ng search and retrieval operation.

Sinabi ni 4th Infantry Division Spokesperson Major Rodulfo Cordero Jr., “engine trouble” ang dahilan ng nangyaring pagbagsak ng chopper.

Dagdag ni Cordero, sinubukan ng apat na aircrew ng UH-1H helicopter na magcrash-land ngunit nabigo umano ang mga ito.

Kapwa binawian ng buhay sa insidente ang apat na crew at tatlong pasahero na kinabibilangan ng isang sundalo at dalawang cafgu.

Tiniyak naman sa publiko ng Phil. Air Force na sumasailalim sa masusing pag-iinspeksyon ang lahat ng kanilang air asset bago at matapos itong gamitin sa flight mission.

Nagpaabot naman ng pakikiramay sa mga naulilang pamilya ang buong hanay ng hukbong panghimpapawid ng Pilipinas at sinigurong maipagkakaloob sa kanila ang kinakailangang assistance at pinansyal na tulong ng pamahalaan.

Tatlong bangkay ang natagpuan sa gilid ng kalsada ng Bustos, Bulacan.

Ayon sa inisyal ng imbestigasyon ng Bustos Police, kapwa nakaposas at may tama ng bala sa ulo ang mga biktima na isang babae at dalawang lalake.

Inaalam pa ng mga otoridad kung anong armas ang ginamit sa pagpatay sa tatlong indibidwal.

Samantala, kinilala na ng kanilang mga kaanak ang mga biktima, kung saan ang babae umano ay isang RTW businesswoman, habang tindero at tricycle driver naman ang dalawang lalake.

Tumanggi namang magbigay ng anumang pahayag ang pamilya ng mga nasawi.

Sa ngayon, nagpapatuloy pa ang isinasagawang imbestigasyon ng mga otoridad.