RONDA PROBINSYA

Niyanig ng magnitude 7.1 na lindol ang bayan ng Jose Abad Santos sa Davao Occidental pasado alas-8:23 ng gabi.

Ayon sa Phivolcs, natukoy ang epicenter ng pagyanig sa layong 231 kilometer, katimugan ng Jose Abad Santos.

May lalim itong isang 216 na kilometro at tectonic ang pinagmulan.

Batay sa inilabas na earthquake information ng Phivolcs, naramdaman ang intensity 5 sa General Santos City, intensity 4 sa Davao City, intensity 2 sa Bislig City Surigao Del Sur.

Habang instrumental intensity 5 sa Kiamba Sarangani; instrumental intensity 4 sa General Santos City, Alabel Sarangani at Koronadal City South Cotabato.

Instrumental intensity 3 sa kidapawan City, Bislig City Surigao Del Sur, Gingoog City Misamis Oriental; instrumental intensity 2 sa Cagayan De Oro, Surigao City Surigao Del Norte, Borongan Eastern Samar at instrumental intensity 1 sa Catbalogan City Samar.

Samantala, sinabi ng Phivolcs na walang banta ng tsunami sa anumang parte ng Pilipinas ang naturang malakas na lindol.

Plano ng lokal na pamahalaan ng Antipolo City na bumili ng iba’t-ibang brand ng bakuna kontra COVID-19.

Ayon kay Mayor Andrea Ynares, ito’y para magkaroon ng kalayaan makapamili ang mga residente ng bakunang ituturok sa kanila.

Ani Ynares, aabot sa P300-M ang naitatabi nang pondo ng lokal na pamahalaan para sa pagbili ng bakuna.

Dahil aniya pera naman ito ng bayan kaya’t binibigyan ang bawat isa ng karapatang makapamili ng bakuna ngunit magiging “first come, first serve” basis umano ang mangyayari sa pagpaparehistro.

Kasabay nito, inihahanda na rin umano ng lungsod ang kanilang local cold storage facilty para sa mga bakuna na nasa barangay Mayamot.

Nahaharap sa panibagong reklamo ang 3rd TelCo ng bansa na DITO Telecommunity Corp. kaugnay sa umano’y ilegal na pagtatayo nito ng cell towers.

Ito’y makaraang maglabas ng show cause order ang National Commission on Indigenous People – Cordillera Administrative Region (NCIP-CAR) laban sa DITO TelCo dahil sa umano’y paglabag sa  mga karapatan ng mga katutubo para sa kanilang ancestral domains (ADs) ng Benguet province.

Nanindigan ang mga katutubo sa kanilang mga karapatan para sana free and prior informed consent (FPIC) na itinatakda sa ilalim ng Section 59 ng Republic Act 8371 o ang “Indigenous Peoples Rights Act (IPRA)”

Nakatakda na sana sa darating na Marso ang Commercial Rollout ng DITO kung saan nangako ito na seserbisyuhan ang nasa 37 porsiyento ng populasyon ng bansa na may 27 megabits per second (mbps).

It has come to our attention that your company has undertaken or is currently undertaking fiber-optics laying in the various ADs in Benguet province without securing the FPIC [from] concerned indigenous cultural communities/indigenous peoples (ICCs/IPs) and paying just and fair compensation for damages [that] they may sustain as consequence thereof,” nakasaad sa show-cause order ng NCIP-CAR sa Dito mula kay Regional Director Marlon Bosantog.

Section 7 (b) of the IPRA [also] recognizes, protects and promotes, among others, the rights of the ICCs/IPs to an informed and intelligent participation in the formulation and implementation of any project, government or private, that will affect or impact upon the ancestral domains and to receive just and fair compensation for any damages [that] they may sustain as a result of the project.” nakasaad pa sa itinatakda ng IPRA.

Binigyan ng 15 araw ang DITO para tumugon at ilatag ang mga kadahilanan kung bakit hindi sila dapat papanagutin sa paglabag sa IPRA.

Una rito, may nakabimbing aplikasyon sa NCIP-CAR ang naturang TelCo para sa pagtatayo ng telecommunication towers sa La Trinidad, Benguet at kasalukuyang nasa preliminary stages pa rin ng FPIC process.

Kamakailan, kinasuhan ng Pamahalaang Lokal ng Malabon ang DITO Telco dahil sa paglabag sa Section 301 ng Presidential Decree 1096 o ang National Building Code of the Philippines sa o ang iligal na pagtatayo ng cell site sa lungsod.

May isyu rin sa DITO ang LGU sa lalawigan ng Cebu laban sa road engineering works nito na isinasagawa sa main thoroughfares sa isang commercial district na nagdulot ng mabigat na daloy ng trapiko.

Nanawagan ang League of Provinces of the Philippines (LPP) sa national government na payagan na ang mga local government unit (LGU) na direktang bumili ng bakuna kontra COVID-19 sa mga manufacturer.

Ayon kay Marinduque Governor Presbitero Velasco Jr., LPP President, kailangan ng LGU ng malinaw na otorisasyon mula sa gobyerno para makabili ng bakuna para sa kanilang mamamayan.

Wala naman aniyang problema kung may ilan pang bagay na kailangan ng koordinasyon sa gobyerno, ngunit hiling lang umano nila ang patunay na pinapayagan na ang LGU na direktang makakuha ng bakuna sa mga manufacturer.

Ang panawagan na ito ay kasabay ng hirit din ng ilang mambabatas na suportahan ang mga LGU sa layon nilang makabili ng sariling bakuna.