RONDA PROBINSYA

Limang hinihinalang hijackers ang patay sa engkwentro nito sa Highway Patrol Group sa Tuba, Benguet kaninang umaga.

Ayon kay PNP-HPG Dir. P/Bgen. Alexander Tagum, nangyari ang engkwentro sa pagitan ng kaniyang mga tauhan at mga suspek sa bahagi ng Marcos Highway dakong alas-4 kaninang umaga matapos makatanggap ng sumbong hinggil sa umano’y insidente ng hijacking.

Agad rumesponde ang mga awtroridadd kung saan, huli sa aktong ninanakaw ng may 5 lalaki ang isang van na may plakang adh 3116 at isa pang kulay gray na suv na walag plaka na nagresulta sa pagsiklab ng enkuwentro na ikinasawi ng mga salarin.

Nagpapatuloy ang ginagawang imbestigasyon ng mga tauhan ng Scene of the Crime Operatives (SOCO) sa pinangyarihan ng engkuwentro habang inaalam pa rin ang pagkakakilanlan ng mga napatay na salarin.

Hinahanap ni Iloilo City Mayor Jerry Treñas ang libu-libong bakuna na umano’y bahagi ng kabuuang supply na ibinigay dito ng Department of Health (DOH).

Ayon kay Treñas, nasa 66,000 lamang na bakuna ang natanggap nila mula sa 84,000 vaccines na ipinadala umano ng DOH sa lungsod.

Sinabi ni Treñas na sumulat na siya kay DOH Western Visayas Director Emilia Monicimpo para tanungin sa vaccine supply sa Iloilo City subalit wala pa siyang natatanggap na sagot mula rito.

Inihayag ni Treñas na hindi nagtatagal sa kanila ang bakuna kung saan walong libo ang naituturok sa kanilang residente araw-araw.

Kaugnay nito muling umapela si Treñas sa national government para magpadala ng dagdag na bakuna at huwag namang ibigay ang malaking bahagi ng supply sa Metro Manila at walo pang lalawigang kalapit nito.

Inihayag ni Cebu Governor Gwen Garcia na susunod na ang lokal na pamahalaan sa panuntunan na inirekumenda ng IATF sa mga returning Filipinos.

Ayon kay Garcia, susundin na nila ang pagsasailalim sa mga balikbayan sa 10-day quarantine sa mga accredited hotel sa probinsya.

Una nang ipinatupad ng lokal na pamahalaan ang maagang pagpapauwi sa mga nag-negatibong returning Filipinos sa swab test sa airport na labag sa guidelines ng IATF.

Ngunit nandigan naman si Garcia na patuloy na ipapatupad ang swab-upon-arrival policy, maging ang isa pang swab test sa ika-pitong araw ng kanilang quarantine.

Sinabi pa ng gobernador na nakatakda silang magpulong ng IATF kasama si Health Secretary Francisco Duque sa Hunyo 28 upang talakayin ang mga health protocols. —sa panulat ni Hyacinth Ludivico

Hiniling ni House Deputy Speaker at Cagayan De Oro Second District Representative Rufus Rodriguez sa Department of Health na magpadala ng 24 na ventilators sa pitong ospital sa CDO sa gitna ng pagtaas ng kaso ng COVID-19.

Sa ipinadalang liham ni Rodriguez kay Health Secretary Franciso Duque, iginiit niya na umabot na sa 10,107 ang kaso ng sakit sa lalawigan.

Patuloy din aniya ang pagdami ng mga pasyente sa mga ospital, kung saan nasa 74.56% na ang healthcare utilization rate.

Paliwanag pa ng mambabatas, ang karagdagang ventilators ay maaaring kunin mula sa natitirang 63 units na inanunsyo ng ahensya na naka-standby at handang ipadala sa mga rehiyon.

Bukod dito, humiling din si Rodriguez ng dagdag na COVID-19 vaccines para sa lalawigan. —sa panulat ni Hyacinth Ludivico