RONDA PROBINSYA

Malaking dagok sa illegal drug trade ang pagkakaaresto ng mga awtoridad sa 5 drug personality at pagkakasabat ng 58 milyong pisong halaga ng shabu sa ikinasang buy – bust operations sa Imus, Cavite.

Ito’y ayon kay Philippine National Police o PNP Chief P/Gen. Guillermo Eleazar nang ibunyag nito na konektado ang 5 naaresto kay Talitay, Maguindanao Mayor Montasir Sabal na napatay matapos mang-agaw ng baril habang siya’t ibinibiyahe patungong Kampo Crame.

Magugunitang naaresto sa pinagsanib na operasyon ng Manila Police District o MPD Drug Enforcement Unit, PDEA at Cavite Police ang mga suspek na sina Tamano Daud, Ismael Daud, Norma Maguid, Bainor Maguid at Omar Rediya sa Brgy. Bayang Luma III sa nabanggit na lugar.

Nasabat sa mga suspek ang malaking bulto ng shabu na nagkakahalaga ng 58 milyong piso, isang Glock17 9mm na pistola, isang Kossnor London Chrome Caliber .45 pistol, samu’t saring mga bala at ilang drug paraphernalia.

Maliban sa pagkakabilang sa National Drug Watchlist, si Sabal din ang nagsusuplay ng mga armas sa Bangsamoro Islamic Freedom Fighters o BIFF na siyang ginagamit sa paghahasik nila ng karahasan sa Mindanao.

Pagtutulungan ng mga awtoridad at ng taumbayan ang susi upang mapagtagumpayan ang kampaniya laban sa terrorismo.

Ito ang binigyang diin ni Joint Task Force Central Commander M/Gen. Juvymax Uy kasunod ng matagumpay na pagkakapatay ng mga Sundalo sa 3 miyembro ng Bangsamoro  Islamic Freedom Fighters o BIFF sa Maguindanao.

Nangyari ang engkuwentro habang nagsasagawa ng focused operation ang Militar sa Brgy. Linantangan, bayan ng Shariff Saydona Mustapafa kung saan, hindi bababa sa 10 bandido ang nakasagpa ng mga Sundalo.

Kinilala ni LtCol. Benjamin Cadiente, Commanding Officer ng 33rd Infantry Battalion ang mga nasawing BIFF na sina Dhen Dhen Haron alyas Kirim, Ali Amil Hasim at Buhari Bualan.

Sila ay pawang mga miyembro ng BIFF Karialan Faction sa ilalim ng pamumuno ni Muslimin Amilil alyas “Mus” na siyang responsable sa mga pag-atake, pagpatay at panununog sa Maguindanao at mga karatig lugar nito.

Muling nanawagan ang pamunuan ng Bureau of Jail Management and Penology o BJMP sa mga Lokal na Pamahalaan na ikonsidera ang mga bilanggo sa kanilang vaccination rollout kontra COVID-19.

Ito ang inihayag ni BJMP Chief J/Dir. Allan Iral kasunod ng isinagawang pagbabakuna ng Pamahalaang Bayan ng Bocaue sa Bulacan sa kanilang 148 na Persons Deprived of Liberty o PDL at 19 na BJMP personnel sa Bocaue Municipal Jail.

Ayon kay Dir. Iral, 2 sa mga nabakunahang PDL ay pawang mga nakatatanda o Senior Citizen habang 10 sa mga ito ay may comorbidities o iniindang karamdaman.

Target ng BJMP na matiyak na protektado rin ang lahat ng mga bilaggo mula sa banta ng virus sa ilalim ng kanilang kampaniyang “Magkaisa para sa bakuna laban sa pandemiya” lalo’t ang mga PDL na ito ay nakakulong sa enclosed spaces.

Sa kasalukuyan, mayruon nang 10,459 na mga tauhan ng BJMP at 1,766 na mga PDL na karamihan ay mga Senior Citizen at may comorbidities ang nabakunahan na.

Isinailalim sa state of calamity ang bayan ng Banga sa South Cotabato dahil sa naranasang malawakang pagbaha sa lugar.

Labing isang barangay ang binaha dahil sa tuloy-tuloy na pag-ulan dala ng Tropical Depression Dante.

Kabilang sa mga nasira ng baha ang mga maisan, sagingan at ilang kabahayan.

Inaasahan pa rin ang kalat-kalat na pag ulan bunsod ng localized thunderstorms kaya’t nagbabala sa posible pang pagbaha at landslide.

Umapela ng karagdagan pang suplay ng bakuna kontra COVID-19 ang Iloilo City dahil sa patuloy na pagtaas ng kaso ng nasabing sakit sa lugar.

Ayon kay Mayor Jerry Trenas, napupuno na ang mga ospital gayundin ang mga ICU beds at emergency rooms dahil sa tumataas na kaso ng COVID-19.

Ani Trenas, dapat na maunawaan na ang Iloilo City ang nagsisilbing regional center at halos lahat ng referral hospital ay dito matatagpuan.

Aniya, nag-hire na ang local, provincial at national government ng karagdagan pang nurses, nursing aides at utility workers na ipapadala sa mga pampubliko at pribadong ospital.

Naipasok na sa Enhanced Comprehensive Local Integration Program o ECLIP ang 7 miyembro ng New People’s Army o NPA at Militia ng Bayan para makapagbagong buhay.

Ito’y makaraang magbalik-loob sa gobyerno ang mga dating rebelde sa ilalim ng Guerilla Front16 C1 ng North Eastern Mindanao Regional Committee sa Surigao del Norte.

Kinilala ng Army’s 30th Infantry Battalion ang mga nagsisuko na sina alyas Jerson na vice squad leader ng grupo; alyas Daylan, political guide; alyas Gelai; alyas JimJim at alyas Robert.

Habang kinilala naman ang mga sumukong Militia ng Bayan member sa mga alyas na Remon at  Bernie.

Kasamang isinuko ng mga ito ang ilang armas, bala, anti-personnel mine at electrical wire para gawing pampasabog. —ulat mula kay Jaymark Dagala (Patrol 9)