RONDA PROBINSYA

Dalawang sundalo ang tinambangan sa Pikit,Cotabato.

Maswerteng nakaligtas sa pananambang si Private first class Jerot Baraon habang sugatan naman si Corporal Mariano Warren Dela Pena.

Pawang nakatalaga ang mga ito sa 90th Infantry battalion Philippine Army.

Ayon kay Pikit Chief Of Police Major Mautin Pangandigan, lulan ang mga biktima sa isang motorsiklo at bigla silang dinikitan ng magkaangkas na suspek.

Dito na sila pinagbabaril gamit ang kalibre kwarentay singko na pistola.

Mabilis naman nakatakas ang mga suspek.ss

Isang radio commentator ang patay matapos pagbabarilin sa labas mismo ng istasyon na kaniyang pinagtatrabahuhan sa Cebu City.

Ayon kay Cebu City Councilor Dave Tumulak, katatapos lang ni Rey Cortes sa kaniyang programa at pasakay na ito ng SUV.

Dito siya biglang kinaladkad ng dalawang lalake at saka pinagbabaril.

Nagtamo ng tama ng bala sa braso at puso ang biktima. Idineklarang dead on arrival sa ospital si Cortes.

Kwento ni Tumulak, hindi na rin niya nagawang tapusin ang kaniyang programa na sumunod kay Cortes dahil pinuntahan niya ito at nakita na niyang nakahiga at duguan.

Nabatid na dati na ring binaril sa Cortes ngunit siya ay naka-survive.

Tinatayang 50 pamilya o mahigit 130 katao ang inilikas dahil sa pagbaha dulot ng pag-ulang dala ng Habagat na pinaigting ng Bagyong Fabian sa Occidental Mindoro.

Ayon sa MIMAROPA Police, pawang residente ng bayan ng Sablayan ang mga apektadong pamilya.

Pansamantalang dinala ang mga evacuee sa isang warehouse sa barangay Ibud at covered court sa barangay Claudio Salgado.

Nagpatuloy ang rescue operations sa mga apektadong residente hanggang kagabi.  —sa panulat ni Drew Nacino

Patay ang tatlong drug suspek habang nasabat naman ng mga tauhan ng pulisya ang hindi bababa sa 350 gramo ng mga hinihinalang shabu sa ikinasang buy-bust operation sa Oas, Albay.

Kinilala ni Police Regional Office 5 o Bicol PNP Director P/B Gen. Jonnel Estomo ang isa sa mga napatay na suspek na si Ramon Mutuc alyas “Omar” habang patay din ang dalawa pang kasamahan nito.

Ayon kay Estomo, nagpanggap na bibili ng shabu ang isa sa kanilang mga tauhan sa halagang P40,000  subalit nakatunog ang target na si Mutuc at agad na bumunot ng baril, saka nakipagbarilan sa mga pulis na nagresulta sa pagkamatay ng tatlo.

Nakuha mula sa mga salarin ang nabanggit na dami ng iligal na droga na nagkakahalaga ng P1.7-M, isang kalibre .45 pistola at dalawang kalibre .38 revolver na siyang gamit ng mga napatay na suspek.

Arestado ang dalawang hinihilang notoryos na drug pusher na nasa watch list ng pulisya.

Kinilala ang naaresto na sina Ohyda Azur, 41-anyos at Ferdinand Vargas, 41-anyos pawang residente ng Lucena City.

Ayon kay P/Lt. Col. Romulo Albacea, Lucena Police Chief, naaresto ng operatiba ang dalawa matapos magbenta ng P500 halaga ng shabu sa isang police agent sa Barangay 5 dakong alas-6 ng umaga.

Nasabat sa mga suspek ang limang plastic sachet ng shabu na nagkakahalaga ng mahigit P16,000.

Malapit nang matapos ang pagbabayad ng Agriculture Department (AD) sa unang bahagi ng hog raisers na naapektuhan ng African Swine Fever (ASF) sa Cagayan De Oro (CDO).

Sinabi ng AD na nasa 84 na hog raisers sa apat na barangay ng Cagayan De Oro ang nakatanggap ng bayad pinsala.

Una nang pinaglaanan ng ahensya ng pondo ang financial assistance na aabot sa P785,000.

Dahil sa tulong ng City Local Government, naibigay na ang indemnity payment sa mga magbabababoy sa iba’t ibang barangay ng CDO.