IDINEKLARANG dead on arrival sa ospital ang isang binatilyo matapos mahulog sa kanal ang minamaneho nitong motorsiklo sa Roxas City, Capiz.
Kinilala ang biktima na si alyas “Bonbon”, labimpitong taong gulang, at nakatira sa Barangay Dayao. Ayon sa mga awtoridad, nakipagkarera umano sa iba pang motorsiklo ang biktima hanggang sa nawalan ito ng kontrol at nalaglag sa kanal sa gilid ng kalsada.
Patuloy ang imbestigasyon sa nasabing insidente.
Bunga ng malalakas na alon at masamang panahong dala ng hanging Habagat, nasa 23 bahay ang napinsala sa tabing-dagat ng Tanza, Cavite.
Ayon sa Municipal Disaster Risk Reduction and Management Office, tinatayang 700 indibidwal o katumbas ng 200 pamilya ang inilikas dulot ng pagbaha at malalakas na alon.
Kabilang sa mga apektado ay ang mga bahay sa tabi ng dagat sa Capipisa, Calibuyo at Barangay Amaya 5.
Naglunsad na umano ng malawakang COVID-19 testing sa mga evacuation centers matapos mabatid na ilan sa mga bakwit ay may iniindang sakit tulad ng ubo at lagnat.
Apat ang sugatan makaraang araruhin ng isang dump truck ang isang bahay at mga nakaparadang motorsiklo sa Almeria, Biliran.
Ayon sa Almeria Police, kabilang sa mga nasugatan ang tatlong pahinante at truck driver na agad namang sinaklolohan ng mga residente at dinala sa pagamutan.
Nawalan umano ng preno ang truck habang pababa ng barangay proper kaya’t nasalpok nito ang dalawang motor at isang bahay sa Barangay Caucab.
Iniimbestigahan pa rin ng mga awtoridad ang nasabing aksidente.
Bibigyan umano ng ayuda ang tatlong mangingisdang nasagip ng mga awtoridad makaraang lumubog ang sinasakyan nilang bangka sa karagatang sakop ng Ternate, Cavite.
Hindi naman tinukoy ng Ternate Municipal Disaster Risk Reduction and Management Office ang pagkakakilanlan ng mga biktima.
Kasabay nito, nagbabala ang Philippine Coast Guard (PCG) na bawal munang pumalaot ang mga mangingisda dahil sa masamang panahon.
Nabatid napilitan umanong mamalakaya ang mga biktima dahil wala naman silang ibang mapagkakakitaan.
Sugatan ang dalawang forest rangers na nakatalaga sa Masungi Georeserve Foundation sa Rizal matapos pagbabarilin ng ‘di kilalang mga salarin.
Ayon kay Masungi Managing Trustee Billie Dumaliang, ang isang park ranger ay tinamaan sa ulo habang sa leeg naman nasapol ang isa pa ngunit stable na umano ang kalagayan ng mga ito.
Matatandaang inirekomenda ng Department of the Interior and Local Government (DILG) ang pagsasampa ng mga kaukulang kaso laban sa ilang local officials at establisimyento sa baras dahil sa umano’y encroachment sa Upper Marikina River Basin Protected Landscape.
Samantala, inihayag naman ni DENR CALABARZON Director Nilo Tamoria na nagpadala na sila ng mga environment officers sa lugar para imbestigahan ang naturang insidente.
Sumampa na sa halos P8-M ang halaga ng pinsala ng baha sa agrikultura at imprastruktura sa bayan ng Baco sa Oriental Mindoro.
Bunga nito, inihayag ng Baco Local Government Unit (LGU) na pinag-aaralan na ngayon ang pagdedeklara ng State of Calamity sa nasabing bayan dulot ng kalamidad.
Samantala, nasa 800 pamilya naman mula sa 18 barangay ang apektado ng mga pagbaha.
Tinitingnan pa ni Oriental Mindoro Baco Mayor Reynaldo Marco ang pagdedeklara ng local state of calamity sa nasasakupan nito.
Ayon kay Marco, nakatakda itong magkipagpulong bukas upang pag-aaralan at silipin ang kabuuang pinsalang dulot ng hanging habagat sa naturang bayan.
Batay sa tala, 800 pamilya ang naperwisyo ng pag-ulan, habang nasa P8 milyon ang halaga naman ng nasirang mga agrikultura at establisyemento sa Baco.
Matatandaang, tumaas ang lebel ng tubig sa nasabing lalawigan matapos ang ang walang humpay na pagbuhos ng ulan.
Isang doktor na nagmamay-ari ng ospital ang patay matapos pagbabarilin sa bayan ng Pikit, North Cotabato.
Kinilala ang biktimang si Dr. Robert Cadulong, Retired Municipal Health Officer ng mga bayan ng Pagalungan at Datu Montawal, Maguindanao at may-ari ng Cadulong Medical Hospital sa Barangay Poblacion.
Ayon kay Pikit Municipal Police Chief, Maj. Mautin Pangandigan, nagjo-jogging si Cadulong nang pagbabarilin ng mga hindi nakilalang salarin.
Dead on arrival sa nabanggit na paggamutan ang biktima dahil sa mga tama ng bala sa iba’t ibang bahagi ng katawan.
Narekober naman sa crime scene ang ilang basyo ng caliber 45 pistol.
Inaalam na ang motibo sa pamamaslang habang nagsasagawa na ng manhunt operations ang mga otoridad. —ulat mula kay Drew Nacino
Halos 40 residente sa bayan ng Naujan, Oriental Mindoro ang inilikas bunsod ng hanggang baywang na baha dulot ng walang tigil na ulan.
Kabilang sa mga inilikas ng Philippine Coast Guard ang 35 residenteng naninirahan sa mga mababang lugar at malapit sa ilog sa Barangay Aurora at Mulawin.
Karamihan sa mga ito ay bata na na-trap sa kanilang bahay dahil sa mabilis na pagtaas ng baha.
Samantala, nag-deploy na ang DPWH Regional Office-4B ng mga equipment at maintenance crew para sa clearing operations sa araang bridge sa Mindoro West Coastal road. —sa panulat ni Drew Nacino
Tatlumpu’t anim (36) na barangay sa limang bayan sa Bulacan ang nalubog sa baha bunsod ng walang tigil na ulang dala ng habagat na pina-igting ng bagyong Fabian.
Ayon sa Bulacan Provincial Disaster Risk Reduction and management office, 18 barangay sa Paombong, siyam sa Hagonoy at tig-tatlo sa Guiguinto, Balagtas at Marilao ang nakaranas ng hanggang tatlong metrong lalim ng baha.
Nakadagdag sa problema ng mga residente ang pagpapakawala ng tubig ng Bustos Dam matapos umabot ito sa spilling level na mahigit 17 meters, kahapon. —sa panulat ni Drew Nacino