RONDA PROBINSYA

Patay ang isang lalake na nagpapa-refill ng tubig matapos pagbabarilin sa Ermita, Maynila.

Batay sa nakunan ng CCTV sa Barangay 667 bandang alas-3:30 ng hapon,  makikitang nakatayo sa harap ng water refilling station malapit sa kanto ng Guerrero Street ang 36 anyos na biktima na hindi pinangalanan.

Maya-maya ay may tumigil na motorsiklong may magka-angkas, bumaba ang dalawa at naghintay na makatyempo sa biktima.

Nang magkaroon na ng pagkakataon ay nilapitan na ng rider ang biktima at binaril sa ulo mula sa likod bago tumakas kasama ang kaangkas.

Iniimbestigahan pa ng homicide section ng Manila Police District ang motibo sa pamamaril.

Isang lalaking construction worker ang nasakote sa buy-bust operation sa Zamboanga City.

Nasabat mula sa hindi pinangalanang suspek ang sampung malalaking pakete ng shabu na nagkakahalaga ng P3.4 milyon.

Ayon sa Philippine Drug Enforcement Agency, natiklo ang suspek sa parking lot ng isang mall, kagabi.

Napag-alaman ng PDEA na may koneksyon ang lalaki sa isang pulis na nakatakas sa nakaraang operasyon ng mga otoridad.

Mahaharap naman sa kasong paglabag sa Comprehensive Dangerous Drugs Act of 2002 ang suspek.—sa panulat ni Drew Nacino

Iniimbestigahan na ngayon ng mga awtoridad ang kaso ng pagpatay sa isang babaeng abogado at kaniyang asawa sa Davao City.

Kinilala ang mga biktima na si Sitti Gilda Mahinay-Sapie at asawang si Muhaimen Mohammad Sapie na kapwa pinagbabaril ng di pa nakikilalang salarin sa labas ng kanilang opisina.

Pinaniniwalaan ng mga awtoridad na posibleng isang snipper ang pumaslang sa mag-asawa dahil wala umanong nakitang armadong indibidwal sa pinangyarihan ng krimen.

Inaasahan namang makatutulong sa imbestigasyon ang nakuhang CCTV footage ng mga awtoridad.

Tinitingnan anggulo sa pamamaslang sa mag-asawa ang mga kasong hinahawakan ng abogada kabilang na ang away sa lupa.

Nakaligtas sa pananambang ang isang lokal na opisyal ng Calamba City, Laguna.

Kinilala ang opisyal na si Public Order and Safety Office Chief Jeffrey Rodriguez, na nakatutok sa local ordinance implementation kabilang ang COVID-19 safety protocols.

Ayon sa Police Regional Office 4-A, base sa CCTV footage, inabangan ng gunman na nakasuot ng stripe na damit sa tapat ng isang tindahan,si Rodriguez na noo’y nakasakay sa puting pick-up.

Dito na pinaulanan ng bala ang sasakyan ng biktima na masuwerteng hindi tinamaan pero nasugatan naman ang kanyang bodyguard, driver at isang sibilyan.

Agad nakatakas ang gunman lulan ng isang motorsiklo na minamaneho ng isa pang hindi nakilalang lalaki.

Naglunsad na ng manhunt operation ang CALABARZON habang sinibak na sa pwesto ang hepe ng Calamba City Police. —sa panulat ni Drew Nacino