Ipinag-utos ni Philippine National Police (PNP) Chief P/Gen. Guillermo Eleazar sa pamunuan ng Police Regional Office 11 o Davao PNP na magkasa ng malalimang imbestigasyon.
Ito’y may kaugnayan sa pagpaslang ng mga hindi pa tukoy na salarin sa abogadong si Atty. Hilda Mahinay – Sapie at asawa nitong si Muhaimen Mohammad Sapie nuong Huly 14.
Ayon sa PNP Chief, kasalukuyan nang inaalam ng mga awtoridad ang posibleng motibo sa krimen at pagtukoy sa kung sino ang mga posibleng nasa likod nito.
Nabatid na walang habas na pinagbabaril ang mag-asawa sa harap mismo ng kanilang tahanan matapos naman ang kanilang programa sa radyo na nagbibigay ng libreng payong legal.
Sinabi pa ni Eleazar na kanila na ring sinisilip kung may kinalaman sa mga kasong kanilang hinahawakan ang krimen kabilang na ang away sa lupa kaya’t kumpiyansa siyang mareresolba agad ang kaso sa lalong madaling panahon. — ulat mula kay Jaymark Dagala (Patrol 9)
