RONDA PROBINSYA

Patay sa pamamaril ang tatlong indibidwal kabilang na ang isang pulis at barangay kagawad sa Barangay Cubay South, Bugasong, Antique.

Kabilang sa mga nasawi ang suspek na si Roy Jalipa, 33-anyos at ang dalawang biktima na sina Barangay Kagawad Efren Florendo, 60-anyos at Staff Sergeant Elvin Agting, 42-anyos, police personnel ng Bugasong Municipal Police Station.

Ayon sa mga rumespondeng mga pulis, nakakaranas ng nervous breakdown ang suspek base sa pahayag ng pamilya nito.

Agad silang nakipag negosasyon pero mabilis na pinaputukan ng baril ng suspek ang mga biktima dahilan para gumanti ang mga pulis.

Dito na binawian ng buhay ang suspek na ngayon ay inaalam pa ng mga awtoridad kung totoong nakakaranas ito ng nervous break down na una nang inihayag ng pamilya ng suspek. —sa panulat ni Angelica Doctolero

Patay ang isang konduktor ng bus matapos pagbabarilin ng tatlong pasahero sa Cotabato City.

Kinilala ang biktima na si Norodin Tigkanan.

Nakuha umano ng mga suspek kay tigkanan ang P10K.

Naisugod pa sa ospital ang biktima ngunit kalaunan ay binawian din ito ng buhay.

Patuloy naman ang imbestigasyon ng mga otoridad sa insidente.—sa panulat ni  Hyacinth Ludivico

Malapit na maabot ng Baguio City ang target na bilang ng populasyon na dapat bakunahan kontra COVID-19.

Ayon kay Mayor Benjamin Magalong, umabot na sa 207, 626 indibidwal o 73.86% na ang nakatanggap ng unang dose ng bakuna habang 163, 554 indibidwal o 57.80%  ang kumpleto na ng bakuna mula sa kabuuang populasyon na 281,000.

Samantala, inabisuhan ni Vaccine Czar Carlito Galvez Jr. Si Magalong na maaaring magsimula ang Pediatric Vaccination sa Nobyembre. —sa panulat ni Airiam Sancho

Patay ang dalawang pulis matapos pagbabarilin sa magkaibang lugar sa siyudad ng Naga.

Ayon sa report ng Police Regional Office 5, pinalo sa ulo at binaril ng suspek na si Jerico Cano, 33 taon gulang ang biktimang si Police Master Sergeant Romeo Padua ng PS1 habang naglalakad pauwi ng bahay.

Samantala, nadaanan naman ng suspek sa Barangay Tabuco at agad binaril ang isa pang biktima na si Police Corporal Juarez Del Valle ng PS5.

Kalaunan ay napatay rin si Cano matapos makipagbarilan sa mga rumespondeng mga pulis. —sa panulat ni Airiam Sancho

Pinaiimbestigahan ng PNP ang mga nasa likod nang paggawa ng mga pampasabog.

Kasunod na rin ito nang pagkaka aresto sa umano’y mastermind at mga kasabwat nito na supplier ng mga sangkap sa paggawa ng pampasabog sa magkahiwalay na operasyon sa General Trias, Cavite at Lucena City sa Quezon.

Ayon kay PNP Chief Police General Guillermo Eleazar, unang naaresto si Charlito Tenorio na supplier ng controlled explosive substances sa Cavite sa ikinasang buy-bust operation at sumunod na naaresto sa ikinasang follow-up operations ng CIDG sa Lucena City ang itinuturong mastermind ni Tenorio na si Jr Suson .

Nakumpiska sa naturang operasyon ang nasa 750 kilos ng ammonium nitrate na nakasilid sa 30 sako at 1,000 piraso ng improvised blasting cap na naka karga sa isang container van na nagkakahalaga ng P200,000. —sa ulat ni Jaymark Dagala (Patrol 9)

Naglunsad ng incentive program ang lokal na pamahalaan ng Cebu para sa mga nabakunahan nang residente.

Ayon kay Acting Mayor Michael Rama, kabilang sa programang ito ang pa-raffle sa Oktubre 18 kung saan maaaring manalo ng house and lot at sasakyan ang mga residenteng bakunado na.

P100,000 halaga ng gift certificates ng hotel accommodation, P100,000 halaga ng scholarships at groceries.

Ani Rama, layon nito na mahikayat pa ang ibang residente ng magpabakuna na kontra COVID-19.

Hinimok ng Mindanao Consortium ng Ateneo ang COMELEC na magbukas ng mas marami pang voter registration sites.

Kasunod na rin ito nang pagbubukas ng Ateneo De Davao University, Xavier University sa Cagayan De Oro at Ateneo De Zamboanga University ng kani-kanilang campus sa registration ng mga botante para sa 2022 National Elections.

Umapela rin ang mga nasabing unibersidad sa COMELEC na ipalabas ang election guidelines bago ang deadline ng voter registration at i-prioritize ang mga kabataan lalo na ang mga out of school youth na mga first time voter.

Isang kagawad ang patay matapos pagbabarilin habang nakikipag-pulong sa kanyang mga constituent sa Barangay Rosario, Pasig City.

Kinilala ang biktimang si Niki Cruz, na nakikipag-usap sa mga residente nang biglang sumulpot ang isang gunman at pinagbabaril sa ulo.

Ayon sa Pasig City Police, agad nakatakbo ang hindi nakilalang salarin kasama ang isang lookout.

Bago ang krimen ay nakatanggap umano ng mga death threat si Cruz dahil umano sa kampanya nito kontra iligal na droga.

Patuloy na iniimbestigahan ng pulisya ang nasabing krimen.—sa panulat ni Drew Nacino