Isa pang pasyente ang pumanaw dahil sa COVID-19 sa lalawigan ng Batanes.
Ayon sa Provincial Government, isang 65-ayos na lalaki mula sa bayan ng Basco ang ika-limang COVID-19 death sa lalawigan.
Binawian ng buhay ang pasyente noong Lunes at nabatid na kabilang din ito sa mga inilipat sa Cagayan Valley Medical Center noong Oktubre 3.
Sa ngayon ay may 225 active cases sa Batanes kung saan pinakamaraming naitala sa bayan ng Basco na mayroong 196 aktibong mga kaso. —sa panulat ni Hya Ludivico
Aabot sa 150 permanenteng pabahay ang ipinagkaloob ng Japanese Goverment para sa mga residente ng Barangay Makilala sa Marawi City.
Ito’y bilang bahagi ng tulong ng Japan sa mga naapektuhan ng sumiklab na kaguluhan noon sa Marawi City.
Pinangunahan ni Ambassador Koshi-Kawa Kazu-Hiko ang virtual turnover ceremony at iba pang opisyal ng gobyerno kabilang na ang Task Force Bangon Marawi at si Department of Human Settlements and Development Chairman Secretary Eduardo Del Rosario.
Ang naganap na turnover ay ikatlong bahagi ng Collaboration Project sa pagitan ng Japanese Government at UN Habitat Philippines.
Inihayag ng Private Hospital Association of the Philippines (PHAP) na umabot na sa P884-M ang utang ng PhilHealth sa mga pribadong ospital sa General Santos City.
Pangamba ni Dr. Renato Diagan, Pangulo ng lokal na sangay ng PHAP sa Gensan, kung hindi ito mababayaran sa lalong madaling panahon ay maaaring magsara na ang mga ospital sa kanilang lugar.
Ani Diagan, nagrereklamo na ang mga ospital dahil posibleng mahinto ang mga operasyon nito.
Sa ngayon umano ay inaalalayan ng pamahalaan ng sarangani ang ilang mga pribadong ospital gaya ng pagsagot sa gastusin ng ilang mga pasyenteng ipinasok doon.
Nahuli sa CCTV ang suntukan ng dalawang grupo ng kabataan sa bayan ng Makilala, Cotabato.
Base sa CCTV, apat na kabataan ang nasa gitna ng kalsada at nagsuntukan na tila nagkampihan ng dalawa laban sa dalawa.
Habang nasa gitna ng gulo, nahulog sa kanal ang isa sa mga sangkot.
Matapos ang gulo’y umalis agad ang mga kabataan na tila walang nangyari.
Hinala naman ng may-ari ng CCTV na initiation ng gang ang nakuhang insidente. —sa panulat ni Airiam Sancho
Natanggap na ng Oriental Mindoro ang limang truck ng medical oxygen tank mula sa Department of Health.
Nakinabang dito ang Oriental Mindoro Provincial Hospital kung saan nakakuha ito ng 204 oxygen tanks, habang 40 tanks naman ang napunta sa Oriental Mindoro Central District Hospital, 22 sa Oriental Mindoro South District Hospital, 20 sa Pinamalayan Doctors Hospital, 12 sa R. Umali Hospital, at maging ang mga Rural Health Unit.
Sa kabila nito, sinabi ni Oriental Mindoro Provincial Hospital Chief Dr. Dante Nuestro na hindi pa rin sapat ang dumating na suplay ng oxygen tanks.
Inaasahan namang dadating ngayong linggo ang 1,000 medical oxygen tank na binili ng pamahalaang panlalawigan. —sa panuiat ni Hya Ludivico
Pinamamadali na ni Pangulong Rodrigo Duterte ang proyektong pabahay para sa mga residenteng naapektuhan ng Marawi Siege matapos ang pag-atake ng mga Maute Group noong taong 2017.
Nabatid na hindi na pinapayagang makabilik sa kanilang mga tirahan ang mga naapektuhan ng giyera dahil malapit umano ito sa lawa at idineklara na itong danger zone.
Sa tulong ng Pamahalaan ng Japan ay mabibigyan ng libreng pabahay ang mga nawalan ng tirahan matapos mawasak o masira sa naganap na giyera.
Ayon sa Task Force Bangon Marawi, binigyan sila ng cash assistance ng pamahalaan upang tulungan ang mga apektadong residente.
Sa naging pahayag naman ni Pangulong Duterte, gumagawa na ng paraan ang Gobyerno upang matulungan at mapunan ang mga kulang para sa Marawi Rehabilitation Projects.
Samantala, siniguro naman ni Task Force Bangon Marawi (TFBM) Secretary Eduardo Del Rosario na matatapos ang proyekto ng pamahalaan bago matapos ang termino ni Pangulong Duterte. —sa panulat ni Angelica Doctolero
Niyanig din ng magnitude 3.6 ang Tinaga Island sa Camarines Norte 12:32 kaninang madaling araw at namataan sa layong 75-km Northwest ng nabanggit na lugar.
Naitala ang instrumental intensity 1 sa bahagi ng Mercedes, Camarines Norte.
Nilindol din ng magnitude 3.8 ang bahagi Sarangani, Davao Occidental na namataan sa layong 138-km Southeast ng nabanggit na lugar.
May lalim ang lindol na 32-km at tectonic ang pinanggalingan nito.
Wala namang naitalang damage at aftershock sa lugar pero pinag-iingat ng PHIVOLCS ang mga residenteng nakatira malapit sa kabundukan at dagat. —sa panulat ni Angelica Doctolero
Niyanig ng magnitude 4.2 na lindol ang probinsya ng Camarines Sur 6:51 kagabi.
Namataan ang lindol 5-km ang layo sa Southeast ng bayan ng Canaman sa nabanggit na probinsya na may lalim na 4-km.
Ayon sa PHIVOLCS, nasundan pa ito ng dalawa pang pagyanig ala-una kaninang madaling araw sa nasabing lugar.
Dahil dito, naitala ang intensity 5 sa Canaman, Camarines Sur ; City of Naga; intensity 4 – Calabanga, Camaligan, Milaor, Pili and San Fernando, Camarines Sur; intensity 3 – Sipocot, Camarines Sur.
Habang nakapagtala din ng instrumental intensity 5 – Pili and Sipocot, Camarines Sur; intensity 2 sa Mercedes, Camarines Norte; Iriga City, Camarines Sur at intensity 1 naman sa Daet, Camarines Norte. —sa panulat ni Angelica Doctolero
Isa ang nasawi habang kritikal naman sa ospital ang tatlong iba pa matapos ang karambola ng tatlong sasakyan sa bahagi ng Sinaragan Bridge, National Road, Barangay Sinaragan, Matanao, Davao Del Sur.
Sa impormasyong nakuha ng mga awtoridad, sangkot sa nasabing aksidente ang isang Toyota Fortuner na minamaneho ng isang Mohammad Jameel Salasal Ibrahim, 26-anyos na may 3 sakay at sinasabing nawalan ng kontrol.
Sangkot din ang isang Suzuki Ertiga na minamaneho naman ng isang Teofilo Guilot Bulawan, 67-anyos at isang Multicab na sakay naman ang tatlong kritikal kabilang na ang 2 menor de edad at ang kanilang Ina na si Geraldine Coma, 37-anyos habang nasawi naman ang kaniyang asawa na si Joel Pulvera Coma, 48-anyos.
Ayon sa mga awtoridad, madulas umano ang kalsada nang maganap ang insidente.
Patuloy pang iniimbestigahan ng mga awtoridad ang nasabing aksidente. —sa panulat ni Angelica Doctolero
Binawi na ng Navotas City Government ang liquor ban na ipinatupad sa kanilang lungsod sa ilalim ng Alert level 4.
Nabatid na pormal nang pinirmahan ni Navotas City Mayor Toby Tiangco ang City ordinance no. 2021-56 kasunod ng pagbaba ng Alert level system sa National Capital Region.
Sa ilalim nito, maari na ulit makapagbenta at bumili ng alak pero ipinagbabawal parin ang pag-inom sa mga pampublikong lugar sa ilalim naman ng Municipal ordinance no. 2002-06 sa loob ng kanilang lungsod. —sa panulat ni Angelica Doctolero