RONDA PROBINSYA

Walang awang pinatay matapos pagnakawan ang isang 62-anyos na lola sa Purok 1 Barangay Mamatid Cabuyao City, Laguna.

Nagtamo ng sugat sa kanang bahagi ng mata na hinihinalang pinalo ng isang matigas na bagay dahilan ng agarang pagkamatay ng biktima.

Sa imbestigasyon ng mga tauhan ng Cabuyao City Police Station, wala nang buhay ang biktima nang matagpuan sa loob ng bahay ng kanyang anak na si Cherry Emboltorio Faulmino.

Napaglaman ng mga otoridad na ang mga suspek ay pumasok umano sa harap ng pinto at lumabas sa likod ng pintuan ng bahay ng biktima upang magnakaw kung saan, nakuha ang limang libong piso at isang banga na naglalaman ng mga barya.

Sa ngayon, patuloy ang pagsisiyasat ng Cabuyao City PNP at mga tauhan ng SOCO sa pagkasawi ng biktima matapos ang krimen. —sa panulat ni Angelica Doctolero

Nahaharap sa kasong paglabag sa Republic Act 9165 o Comprehensive Dangerous Drugs Act of 2002 ang isang kandidato sa pagka-alkalde sa bahagi ng Barangay Upper Glad 1 na sakop ng Maguindanao.

Kinilala ang suspek na si Tom Nandang o mas kilala bilang si Datuko na isang mayoralty candidate pero hinuli matapos maglabas ang search warrant ang anti-narcotics agent, mga pulis at mga military.

Nakuha sa suspek ang sampung sachet ng suspected shabu na nagkakahalaga ng limang milyong piso kasama ng isang kalibre .45 na baril.

Sa ngayon ay nasa kustodiya na ngayon ng PDEA-Region 12 ang suspek na si Nandang. —sa panulat ni Angelica Doctolero

Winasak ng mga otoridad ang aabot sa mahigit 23 milyong pisong halaga ng marijuana matapos madiskubre sa Mt. Chumanchil, Loccong, Tinglayan, Kalinga.

Ayon sa mga otoridad, aabot sa 90,000 fully grown marijuana plants o 45,000 gramo ng marijuana dried leaves ang nasamsam mula sa tatlong marijuana plantation sites.

Sa ngayon, patuloy pang iniimbestigahan ng kalinga Police Provincial Office ang nabanggit na lugar. —sa panulat ni Angelica Doctolero

Natagpuan ng mga otoridad ang aabot sa limang mga galon na may lamang mga bigas sa Sitio Tagcar, Barangay Isca, Gonzaga sa probinsya ng Cagayan.

Base sa imbestigasyon, ang mga naka-imbak na bigas ay pagmamay-ari umano ng mga miyembro ng CPP-NPA na napadaan lamang sa lugar.

Nabatid na ang mga natagpuang bigas ay ninakaw umano ng New Peoples Army sa mga mayayaman at pinaniniwalaang sinadya itong iwan sa lugar.

Muli namang nanawagan ang mga otoridad sa lahat ng CPP-NPA na magbalik-loob sa pamahalaan kapalit ng kanilang tulong upang makapag simulang muli. —sa panulat ni Angelica Doctolero

Nadakip ng Antipolo City Police ang isa sa most wanted drug suspects ng Central Luzon.

Pitong taon umano nagtago ang suspek na si Harley Viray.

Natunton ng mga otoridad si Viray nitong Martes sa pamamagitan ng kanyang social media account.

Nasa kustodiya na ngayon ng Candelaria police station sa Zambales ang suspek.—sa panulat ni Hyacinth Ludivico

Arestado ang isang lalaki matapos mahulihan ng marijuana sa Tondo, Maynila.

Ayon sa imbestigasyon, nagsagawa ng oplan sita ang mga tauhan ng Moriones Tondo Police Station sa Asuncion Street, Recto Avenue kung saan nadakip ang suspek na si Judem Alleck Padilla, residente ng Brgy. 14.

Samantala, nakuha sa suspek ang limang MP3 wireless speakers nanaglalaman ng pitong bloke ng marijuana at tinatayang nagkakahalaga ng higit P300,000. —sa panulat ni Airiam Sancho

Handa na ang lokal na pamahalaan ng Navotas sa pagbabakuna ng mga menor de edad o 12 hanggang 17 taon gulang sa Biyernes.

Isasagawa ito sa Navotas City Hospital kung saan Moderna at Pfizer Vaccine ang gagamitin.

Ayon sa abiso ng nasabing pamahalaan,maari na ring sumabay ang mga magulang na hindi pa bakunado, kailangan lamang na magparehistro online at dumako sa naturang ospital. —sa panulat ni Airiam Sancho

Arestado ang mag-ina na umano’y mga drug pusher sa ikinasang buy-bust operation ng Philippine Drug Enforcement Agency NCR sa Caloocan City noong Lunes.

Kinilala ang mga naaresto na sina Omaima Malaco Lindaganan, 39-anyos at anak nitong si Hakhim, 18-anyos.

Ayon sa ulat, pinagbentahan ng mga suspek ang poseur buyer ng hinihinalang shabu na aabot sa 50 gramo na nagkakahalaga ng P340,000.

Walang piyansa ang pagbebenta ng iligal na droga na isasampa sa mga suspek. —sa panulat ni Hya Ludivico

Dumami ang naitatalang daily COVID-19 deaths sa loob ng dalawang linggo sa Zamboanga City.

Ayon sa  Zamboanga City Medical Center, umaabot sa anim hanggang pito ang average na bilang ng nasasawi kada araw dahil sa COVID-19 sa lugar.

Sa ngayon ay nasa 805 na ang kabuuang bilang ng mga nasawi sa naturang siyudad.

Sinabi naman ng Zamboanga City LGU na kapos na rin sila sa hospital beds at oxygen supply, at maging ng mga kabaong.

Sa datos ng Department of Health-Zamboanga Peninsula hanggang nitong Oktubre 13, umabot na sa 2,687 ang mga aktibong kaso sa Zamboanga City. —sa panulat ni Hya Ludivico