RONDA PROBINSYA

Arestado ang 2 drug suspek habang aabot sa humigit kumulang 1 kilo ng hinihinalang shabu ang nasabat naman ng mga awtoridad.

Ito’y sa ikinasang drug buy-bust operations ng pinagsanib na puwersa ng Philippine Drug Enforcement Agency (PDEA) at Philippine National Police (PNP) sa Mall of Asia Complex sa Pasay City kagabi.

Kinilala ni PDEA Dir/Gen. Wilkins Villanueva ang naarestong drug suspek na sina Jake Hernandez, 21 anyos at Lorieben Delos Santos, 18.

Pinangunahan ng PDEA MIMAROPA ang nasabing operasyon katuwang ang Provincial Offices ng Romblon, Oriental Mindoro at Marinduque PNP.

Nakuha mula sa mga suspek ang nabanggit na dami ng shabu na nakasilid sa isang malaking plastic sachet at tinatayang nagkakahalaga ng humigit kumulang na P6 milyon.

Nasa kostudiya na ng pulisya ang mga suspek at ikinakasa na ang mga kasong paglabag sa Republic Act 9165 o ang Comprehensive Dangerous Drugs Act of 2002 laban sa kanila. —sa ulat ni Jaymark Dagala (Patrol 9)

Patay ang limang pinaniniwalaang mga miyembro ng New Peoples Army (NPA) kabilang na umano ang tumatayong lider nito matapos makaengkwentro ang mga pulis sa isang liblib na lugar sa bahagi ng barangay sa Mandaon, Masbate, ayon sa Southern Luzon Command (SolCom).

Ayon sa mga otoridad, magsisilbi sana sila ng warrant of arrest sa mga rebelde dahil sa kasong murder at attempted murder nang magpaulan ang mga ito ng putok ng baril.

Dito na dumipensa ang mga pulis laban sa limang rebelde na tumagal ng tatlumpung minuto na ikinasawi ng limang suspek.

Narekober sa operasyon ang tatlong M16 Armalite Rifles, dalawang Cal.45 pistol at Improvised Explosive Device (IED). —sa panulat ni Angelica Doctolero

Nasawi ang isang 12-anyos na babae at ang kasama nitong lalaki matapos mahulog sa kanal ang sinasakyan nilang bus sa San Carlos, Negros Occidental.

Base sa imbestigasyon ng mga otoridad, puno ng mga pasahero ang naturang bus na patungo sana sa libing ng kanilang lola nang biglang mawalan ng preno ang bus dahilan para mahulog ito sa kanal sa bahagi ng Sitio Docog-Docog, Brgy. Rizal.

Hindi na umabot sa ospital ang dalawa matapos magtamo ng matinding pinsala sa ulo at katawan.

Ayon kay San Carlos Police Chief, Lt. Ruby Aurita, overloaded ang posibleng dahilan ng aksidente dahil lumagpas sa 38 ang seating capacity ng mga pasahero sa loob ng bus.

Gayunpaman, hindi naman kakasuhan ang driver ng mga pamilyang naiwan ng mga nasawi. —sa panulat ni Angelica Doctolero

Sinunog ng mga otoridad ang nasa 60 container shipment na naglalaman ng mga smuggled na gulay na nagkakahalaga ng P360-M.

Kasunod ito ng muling pagkakakumpiska ng mga tauhan ng Bureau of Customs-Port sa Subic sa mga smuggled agricultural products na nakapangalan sa Zhenpin Consumer Goods Trading, Duar Te Mira Non-Specialized Wholesale, Gingarnion Agri Trading, at Thousand Sunny Enterprise.

Nabatid na ang mga nasabing mga shipment ay idineklarang mga frozen bread, frozen jam, at yell out onion pero nang siyasatin ang loob ng mga container ay dito na napag-alaman na mga carrots, broccoli at sibuyas ang mga  laman nito.

Ayon kay Agriculture Asec. Federico Laciste Jr. Ng Wide Field Inspectorate, hindi sigurado ang mga konsyumer kung ligtas itong kainin dahil hindi umano ito dumaan sa legal na facilitation at walang import permit.

Sa ngayon, tinutugis na ang mga salarin sa pag-import ng mga smuggled na gulay. —sa panulat ni Angelica Doctolero

Nasunog ang isang bahay sa bahagi ng Summerwind Subd., Brgy Burol Main, Dasmarinas City, Cavite na inuupahan umano ng isang Indian National na kinilalang si Narindas Banwait, 40-anyos at pagmamay-ari naman ni Arthur Quijano.

Sa imbestigasyon ng mga awtoridad, napag-alaman na naiwanang nakasaksak na plantsa ang dahilan ng sunog.

Inaalam pa ng mga tauhan ng Bureau of Fire Protection kung magkano ang halaga ng pinaslang naabo matapos ang sunog. —sa panulat ni Angelica Doctolero

Nagkaroon ng pagbaha at pagguho ng lupa ang ilang bahagi ng Samar, Aklan dahil sa malakas at walang tigil na pag-ulan bunsod ng nararanasang Low Pressure Area (LPA).

Nabatid na lumambot ang lupa sa bahagi ng Calbayog-Catarman Road at Barangay Canlapwas sa Catbalogan City dahilan para mahulog sa isang drainage ang isang lalaki.

Nakapagtala naman ng baha at minor landslide sa mga Bayan ng Banga, Batan, Makato, Malinao, Numancia at Kalibo sa Aklan.

Samantala, hindi naman madaanan ng mga maliliit na sasakyan ang kalsada sa Brgy. Torralba, matapos umabot sa lagpas tuhod ang tubig-baha.

Ayon sa Information Officer ng Office of Civil Defense (OCD-Western Visayas), inaalam pa nila ang kabuoang bilang ng mga pamilyang lumikas dahil sa landslide.

Sa kabila ng masungit na panahon ay nagpapatuloy pa rin ang operasyon ng mga airport at seaport sa nabanggit na probinsiya.  —sa panulat ni Angelica Doctolero

Dead-on-arrival ang isang pulis na sangkot sa iligal na pagbebenta ng baril matapos makipagbarilan sa mga tauhan ng Masbate Police Station.

Kinilala ang suspek na si Staff Sgt. Grafilo Pahilino Jr. Na nakadestino sa Cataingan Municipal Police Station.

Ayon sa mga tauhan ng Bicol Police Station, agad silang nagkasa ng entrapment operation matapos makatanggap ng report mula sa isang concerned citizen kaugnay sa iligal na aktibidad.

Nabatid na tatlong kalibre .38 revolver at isang kalibre .45 na baril ang ibinenta umano ng suspek sa isang poseur-buyer kapalit ng halagang P25, 000.

Nakuha din sa suspek ang isang government-issued 9mm pistol at 2 extra na magasin kung saan, matapos ang palitan ng item ay agad na napansin ng suspek ang papalapit na mga pulis kaya agad na binunot ng pulis ang kaniyang baril at pinaputukan ang nasabing poseur-buyer na tinamaan sa braso.

Agad namang gumanti ng putok ng baril ang mga awtoridad dahilan ng agarang pagkamatay ng suspek.

Napag-alaman na ang nasawing suspek ay matagal na umanong sangkot sa pagbebenta ng mga hindi lisensyadong baril sa nasabing lugar.  —sa panulat ni Angelica Doctolero

Nananatiling sarado sa publiko ang mga establisyimento sa bahagi ng Puerto Galera na sakop ng Oriental Mindoro bunsod parin ng COVID-19 pandemic.

Bagsak parin ang kanilang turismo dahil sa maliit na porsyento ng kapasidad na ibinigay ng Pamahalaan sa kanilang lugar.

Ayon sa mga negosyante, madalang o matumal ang mga turistang nagpupunta sa kanilang lugar dahil sa pangamba dulot ng banta ng COVID-19.

Kabilang sa mga establisyimentong patuloy na nalulugi ay ang mga kainan, mga souvenir shops, hotels maging ang mga vendor na hirap na sa gitna ng pandemiya.

Ayon kay Puerto Galera Mayor Rocky Ilagan, nasa 300 hanggang 400 turista pa lang ang dumadating sa Puerto Galera tuwing weekend dahil hindi umano pinapayagang makapasok ang mga turistang hindi fully vaccinated.

Sa ngayon, umaasa ang mga residente ng Puerto Galera na mas magiging maluwag pa ang restriction sa kanilang lugar para mas mapaangat ang turismo sa kanilang lugar maging ang ekonomiya ng bansa. —sa panulat ni Angelica Doctolero

Ginulantang ng pagsabog ang isang Army Checkpoint sa Bayan ng Guindulungan, Maguindanao, kagabi.

Dakong 6:30 nang maganap ang insidente sa National Highway sa Barangay Macasampen.

Ayon kay Joint Task Force Central Spokesman, Lt. Col. John Paul Boldomar, ilang miyembro ng lawless elements ang naghagis ng granada sa Army Detachment.

Dumaraan anya sa naturang lugar ang convoy ni Maguindanao Rep. Esmael “Toto” Mangudadatu nang maganap ang pagsabog.

Wala namang nasugatan sa insidente habang inaalam na kung anong grupo ang naglunsad ng pag-atake.  —sa panulat ni Drew Nacino