RONDA PROBINSYA

Patay ang mag-ina matapos mabangga ng isang fuel tanker truck ang sinasakyan nilang motorsiklo sa bahagi ng Quirino, Quezon Province.

Base sa imbestigasyon ng mga awtoridad, pauwi na sana ang mag-inang sina Dionisia Tagarino, 50 at Joel Tagarino, 20 anyos nang masalpok ng nabanggit na truck.

Naisugod pa sa ospital ang mag-ina, pero idineklara silang dead-on-arrival ng mga doktor.

Nasa kustodiya na ng pulisya ang driver ng fuel tanker truck na si Rhonel Tampos, 35-anyos na nahaharap sa kasong reckless imprudence resulting in multiple homicide matapos sumuko sa mga awtoridad.—sa panulat ni Angelica Doctolero

Arestado ang dalawang high-value drug personality matapos magkasa ng operasyon ang pinagsanib pwersa ng mga tauhan ng Philippine National Police (PNP) Anti-Illegal Drug Operation, Philippine Drug Enforcement Agency-Cordillera (PDEA) at National Bureau Of Investigation (NBI) sa magkahiwalay sa bahagi ng Baguio at La Trinidad sa Benguet.

Unang hinuli ang suspek na kinilalang si Fernand Leo Vergara Quitlong sa Barangay Victoria Village, Baguio City sa bisa ng search warrant na inilabas ni Judge Maria Ligaya Itliong-Rivera, ng Branch 61, Regional Trial Court, Baguio City.

Nakuha kay Vergara ang dalawang plastic sachet ng shabu na nagkakahalaga ng P20.4K; isang glass vial na naglalaman ng 5 ml liquid meth na nagkakahalaga ng mahigit P31K kasama ng mga drug paraphernalias.

Samantala, nahuli din sa operasyon ang isa pang drug suspect na kinilala namang si Eddie Chowogna Afuyog, 39-anyos,matapos makuhanan ng P34K halaga ng iligal na droga.

Paglabag sa Republic Act 9165 o Comprehensive Dangerous Drugs act of 2002 ang kasong kakaharapin ng suspek.—sa panulat ni Angelica Doctolero

Patuloy na nakikipag-ugnayan ang National Disaster Risk Reduction and Management Council (NDRRMC) sa lokal na pamahalaan ng Davao City.

Ito’y kasunod ng nangyaring malawakang pagbaha sa lugar dulot ng walang patid na pag-ulan nitong nakalipas na mga araw bunsod ng Inter-Tropical Convergence Zone (ITCZ).

Dahil dito, ini-ulat ng NDRRMC na aabot sa 586 na pamilya o katumbas ng 2,215 na indibidwal ang apektado ng mga pagbaha sa nabanggit na lungsod.

Sa nabanggit na bilang, 142 pamilya o katumbas ng 415 na indibiduwal ang nananatili sa mga evacuation center habang ang iba naman ay nakituloy muna sa kanilang mga ka-anak. —sa ulat ni Jaymark Dagala (Patrol 9)

Tinutugis pa rin ang mga tinuturong may-ari ng tatlong planta ng marijuana sa lalawigan ng Cebu.

Ayon sa Philippine Drug Enforcement Agency (PDEA) Region 7 mahigit 11,000 ng marijuana na tinatayang nagkakahalaga ng higit P4.6-M ang pinagbubunot ng mga otoridad sa barangay Gaas, Balamban.

Kasunod nito, nasamsam nila ang halos 40,000 ng nasabing droga na tinatayang nasa P16-M sa barangay General Climaco.

Sa kabuuan, mahigit P20.6-M ang halaga ng mga nasirang pananim. —sa panulat ni Airiam Sancho

Isang 64-anyos na lolo ang nasawi matapos mabangga ng isang fighter truck closed van sa Barangay San Vicente, General Luna, Quezon.

Kinilala ang biktima na si Braul Cataytay na patawid sana nang aksidenteng mahagip ng naturang sasakyan.

Dahil dito, nagtamo ng mga sugat sa kaniyang katawan ang biktima dahilan ng kaniyang agarang pagkasawi habang wala naman natamong tama ang driver ng closed van.

Sa ngayon, patuloy pa ang ginagawang imbestigasyon ng mga awtoridad hinggil sa nasabing aksidente.—sa panulat ni Angelica Doctolero

Sumuko din sa mga awtoridad ang 2 miyembro ng Private Arm Group at 5 miyembro ng Bangsamoro Islamic Freedom Fighters (BIFF) – karialan faction sa Maguindanao.

Dala ng mga rebelde sa kanilang pagsuko ang isang kalibre .45 na baril, isang .38 revolver, dalawang M79 grenade launcher, isang M79 Gl na may kasamang tatlong live ammunition, isang RPG, at isang improvised explosive device (IED) fashioned na may kasamang 81mm mortar.

Ang mga sumuko ay pormal na tinanggap ni Pro-Bar Regional Director Brig. Gen. Eden Ugale sa camp SK Pindatun, Parang, Maguindanao kung saan, nabigyan sila ng bigas at cash assistance.

Layunin ng mga sumuko na makapamuhay ng mapayapa kasama ang kanilang mga pamilya.

Hinikayat naman ng mga awtoridad ang iba pang miyembro ng BIFF, Armed Lawless Group, mga terorista at PPGS na sumuko na para sa mapayapang bansa.—sa panulat ni Angelica Doctolero

Sumuko sa mga awtoridad ang 29 na miyembro ng New Peoples Army (NPA) sa probinsya ng Cotabato.

Ayon sa mga pulis at 34th Infantry Battalion Philippine Army na pinamumunuan ni Lieutenant Colonel Edgardo Vichez Jr., sumuko ang mga rebeldeng grupo dahil sa panloloko ng makakaliwang grupo at hindi umano natupad ng kanilang lider ang mga pangako sa kanila.

Bukod pa dito, inabot lang umano sila ng kagutuman at nais na nilang makapamuhay ng mapayapa.

Kasabay nito, isinuko din ng mga NPA ang matataas na uri ng mga armas, pampasabog, mga bala, magasin at mga mahahalagang dokumento.

Dahil dito, nakatanggap ng bigas at cash assistance mula sa LGU-Libungan Cotabato ang mga sumukong rebelde na kasalukuyang isinailalim sa custodial debriefing bilang bahagi ng proseso na sila’y mapabilang sa Enhanced Comprehensive Local Integration Program (E-clip) ng National Government.  —sa panulat ni Angelica Doctolero

Nakumpiska ng mga tauhan ng Naga City Police Office (NCPO ang nasa 1.7-M halaga ng shabu sa dalawang bigtime drug personalities sa Greenfield St. Zone 5B, Barangay Penafrancia sa nabanggit na lalawigan.

Kinilala ang mga suspek na sina Jonathan Fabi, 32-anyos at Herber Endaya na inaresto matapos magpanggap ang isang poseur buyer na bibili ng dalawang piraso ng heat sealed transparent plastic sachet sa mga suspek sa halagang P150-K.

Nakumpiska sa mga suspek ang tig-isa pang knot tied ice plastic bag na pinaniniwalaang naglalaman ng shabu at may timbang na tig-100 gramo na may street value na 680-K.

Nahaharap ngayon sa kasong paglabag sa Repulic Act 9165 o Comprehensive Dangerous Drugs Act of 2002 ang mga nahuling suspek. —sa panulat ni Angelica Doctolero

Sumuko sa mga awtoridad ang nasa 15 indibidwal na sangkot sa iligal na droga sa bahagi ng Bauko, Mountain Province.

Sa pahayag ng Bauko Municipal Police Station (MPS), boluntaryong sumuko ang mga drug personalities kasabay ng paglulunsad ng programang may temang “sagip kapatid, kasangga sa pagbabago.”

Nabatid na dinaluhan ng mga kinatawan ng Department of Interior and Local Government (DILG), Philippine Drug Enforcement Agency (PDEA), Municipal Anti-Drug Abuse Council (MADAC), Barangay Anti-Drug Abuse Council (BADA) maging ang mga kamag-anak ng mga sumuko.

Sakop sa naganap na programa ang panunumpa o pangako ng mga sumuko na hindi na gagamit pa ng iligal na droga at patuloy na susuportahan ang ibat-ibang programa ng Pamahalaan para puksain ang katiwalian, krimen at mga sangkot sa iligal na droga. —sa panulat ni Angelica Doctolero

Isa ang patay habang apat ang naaresto makaraang masabat ang nasa P6.9 milyon na halaga ng shabu sa magkakahiwalay na operasyon sa Albay at Camarines Sur.

Kinilala ni Col. Bernardo Perez, Hepe ng Camarines Sur Provincial Police ang napatay na si Alvin Baldoza, 36 anyos, sa inilunsad na buy-bust operation sa Barangay Palestina, sa bayan ng Pili.

Isang undercover agent ang pinagbentahan ni Baldoza ng aabot sa P300,000 na halaga ng shabu.

Narekober naman sa suspek ang isang Caliber 45 pistol na kargado ng bala, digital weighing scale at isang kilo ng shabu na nagkakahalaga ng P6.8 milyon.

Sa lagonoy naman, natiklo naman ang Barangay Captain na si Chiz Navea nang madiskubre sa kanyang bahay ang nasa 25 grams ng shabu na nagkakahalaga ng P170,000.

Timbog din sina Redentor Agna, ng libmanan sa pagbibitbit ng walong sachet ng shabu na nagkakahalaga ng P8,000; Kim Cherriely Rojo ng Camarines Norte at Jasser Samporno ng Legazpi City, Albay dahil pa rin sa droga.—sa panulat ni Drew Nacino