Nasa ilalim na ng state of calamity ang Bayan ng Makato, Aklan dahil sa flashfloods dulot ng malakas na pag-ulang dala ng inter-tropical convergence zone, simula noong isang linggo.
Tinaya na ng Makato Disaster Risks Reduction Management Office sa 3-k residente ang apektado ng kalamidad.
Mahigit P132M naman ang halaga ng pinsala sa agrikultura at imprastraktura.
Nagpapatuloy ang pag-ayuda ng Lokal na Pamahalaan sa mga naapektuhan ng pagbaha. —sa panulat ni Drew Nacino
Arestado ang isang hinihinalang big-time drug suspect kung saan nasabat mula rito ang 1 kilo ng umano’y cocaine na nagkakahalaga ng P5.3 million sa Pundohan Tapis, Barangay Sipangkot, Sitangkai sa Tawi-Tawi.
Kinilala ni Sitangkai Police Chief Capt. Alberto Bartolome, ang suspek na si Basir Daud, 49 taong gulang.
Sinabi ni Bartolome na ilang araw muna nilang isinailalim sa surveillance ang suspek bago nasakote.
Maliban sa droga, nakumpiska ang isang M-16 Armalite rifle mula sa suspek na nakatakdang sampahan ng mga kaukulang kaso.
Nahulog sa kamay ng mga awtoridad ang hinihinalang lider ng isang drug group sa ikinasang operasyon sa lungsod ng Navotas.
Ang suspek na si Rodolfo Reyes ay nasakote matapos bentahan ng 12,000 pesos na halaga ng umano’y shabu ang isang pulis na nagpanggap na buyer sa C-3 Road, Barangay NBBS Kaunlaran.
Nasabat mula kay Reyes ang isang 9mm pistol na may limang bala, 9.5 kilos ng marijuana na may street value na 1.14 million pesos, suspected shabu na nagkakahalaga ng higit 68,000 pesos at isang timbangan.
Kasong paglabag sa Comprehensive Dangerous Drugs Act ang isasampa laban sa suspek.
Nasungkit ng nag-iisang mananaya mula Ormoc City ang jackpot sa 6/42 Regular Lotto.
Ayon sa Philippine Charity Sweepstakes Office (PCSO), natumbok ng bettor ang six-digit winning combination na 37-09-25-14-28-04 na may katumbas na premyong nagkakahalaga ng 5.94 million pesos.
Ang 6/42 Regular Lotto ay binobola tuwing Martes, Huwebes at Sabado.
12 indibidwal ang nahuli ng National Bureau of Investigation (NBI) dahil sa pagkakadawit sa illegal quarrying at mining operations sa Rodriguez, Rizal.
Ayon sa otoridad, nakatanggap sila ng reklamo na nagsasagawa umano ng illegal mining activities ang kumpanya ng mga naaresto simula pa noong 2019 sa nasabing lugar.
Nahaharap naman sa kasong paglabag sa Philippine Mining Act of 1995 ang mga naaresto. —sa panulat ni Airiam Sancho
Nasabat ng mga otoridad ang higit tatlong milyong halaga ng hinihinalang shabu matapos ang ikinasang buy-bust operation sa Valenzuela City.
Ayon sa PDEA-NCR, inaresto ang isang 27 anyos na residente ng tondo na itinuturing na high-value target ng ahensiya dahil sa pagbabagsak ng ilegal na droga sa Maynila at CAMANAVA.
Nahaharap ang suspek sa kasong paglabag sa RA 9165 o Comprehensive Dangerous Drug Act of 2002. —sa panulat ni Airiam Sancho
Mahigit 9 na pamilya ang nawalan ng tahanan matapos sumiklab ang sunog sa bayan ng Guinayangan sa lalawigan ng Quezon.
Batay sa ulat ng Bureau of Fire Protection (BFP) ng Guinayangan, bandang alas dos ng umaga nagsimula ang sunog sa Barangay Poblacion kung saan mabilis na kumalat ito sa magkakadikit na bahay dala ng malakas na hangin.
Bukod sa fire truck ng BFP, rumesponde rin ang pamatay sunog ng bayan ng Calaug, Quezon.
Samantala, wala namang naitalang nasaktan at nasawi sa nangyaring insidente.
Habang inaalam pa ng mga otoridad ang sanhi ng sunog kung saan aabot sa 2.8 milyong halaga ang napinsala sa nangyaring sunog.
Arestado ang isang suspek matapos ang ikinasang buy-bust operation ng otoridad sa Negros Occidental.
Kinilala ng mga pulisya ang suspek na si Emil Fernandez Mariano, 39 taon gulang na isang high-value target sa lungsod ng San Carlos sa nasabing probinsya.
Nasamsam mula sa suspek ang 25 sachets o 500g ng shabu na tinatayang nagkakahalaga ng higit tatlong milyong piso (P3.4-M)
Nahaharap naman ito sa kasong paglabag sa RA 9165 o Comprehensive Dangerous Drug Act of 2002. —sa panulat ni Airiam Sancho
Nasawi ang isang lalaking trabahador ng isang mall sa Quezon City matapos makaladkad ng isang SUV na sasakyan habang paakyat sa bahagi ng parking area ng isang establisyimento.
Kinilala ang biktima na si Edward Lustre na nakasakay sa motorsiklo nang mangyari ang insidente.
Ayon sa mga otoridad, paakyat at nasa paikot na bahagi ng elevated parking lot ang SUV at ang biktimang nakamotorsiklo.
Tumanggi naman magbigay ng pahayag ang driver ng SUV na si Marvin Mamuyak.
Samantala, handa naman magsampa ng reklamo ang kapatid ng biktima sa driver ng SUV.
Hindi na kailangan ng RT-PCR test result ang mga bakunadong indibidwal sa Bohol.
Ayon sa Lokal na Pamahalaan ng Bohol, hihingan nalang ng proof of full vaccination at isang government issued identification card ang mga papasok sa nasabing probinsya.
Kailangan din na ma-secure ng mga biyahero ang approval via S-Pass na hinihingi ng Lokal na Pamahalaan.
Matatandaang una nang nag-anunsyo ang Cebu City, Mandaue City at Roxas City kaugnay sa pagpasok ng mga biyahero sa kanilang probinsya sa pamamagitan ng pagpresenta ng vaccination card na may QR code, vaccination certificate at isang valid identification card.
Bukod pa dito, nilinaw din na maituturing na fully-vaccinated ang isang indibidwal 14 na araw matapos matanggap ang ikalawang dose sa two-dose series o 14 na araw matapos ang single-dose vaccine.—sa panulat ni Angelica Doctolero