RONDA PROBINSYA

Pinawalang-bisa ng Batangas Court ang search warrant na ginamit ng mga pulis laban sa isang aktibista dahil sa pagkabigong tukuyin ang lugar na hahalughugin.

Ibinasura din ng Tanauan, Batangas City Regional Trial Court ang kasong Illegal Possession of Firearms And Explosives laban kay Erlindo Baez, Spokesperson ng Bagong Alyansang Makabayan-Batangas Chapter.

Si Baez ay hindi kabilang sa mga nasawi sa tinaguriang bloody sunday raids dahil wala siya sa kanyang bahay nang ihain ng awtoridad ang search warrant ngunit sinampahan din siya ng naturang kaso. —sa panulat ni Hya Ludivico

Isang bangkay ng sanggol na lalaki ang natagpuan sa isang bakanteng lote sa barangay San Pedro sa bayan ng Narvacan, Ilocos Sur.

Ayon kay Police Executive Master Sergeant Analisa Jamandra, isang residente ang nakadiskubre sa naagnas na bangkay ng bata at tinatayang apat hanggang limang araw na itong patay.

Nakadapa umano ang sanggol at nakakabit pa ang umbilical cord nito.

Sa ngayon ay patuloy ang imbestigasyon ng mga otoridad sa pagkakakilanlan ng nagtapon ng bangkay ng sanggol sa lugar. —sa panulat ni Hya Ludivico

Mas mabilis nang makapagpapa-RT PCR o swab test ang mga residente sa lungsod ng Taguig gamit lamang ang trace app.

Ayon kay Taguig City Mayor Lino Cayetano, layon nitong mapadali ang paghahatid ng naturang serbisyo sa kanilang nasasakupan.

Libre ang alok na COVID-19 testing ng lokal na pamahalaan sa 31 health centers sa lungsod, drive-thru testing sa Lakeshore at BGC, Park N’ Test sa parking ng Vista Mall, Mobile Testing Truck at sa Taguig Mega Swabbing Facility sa CP Tinga Elementary School.

Kailangan lamang na buksan ng mga residente ang kanilang account sa trace app at hanapin ang “smart testing swab testing appointment” tab at sagutan ang mga katanungan.

Maaaring pumili ng petsa, lugar at oras kung kailan magpapa-swab test at hintayin lamang ang confirmation text na ipapadala sa numerong nakarehistro sa naturang app.

Ang Taguig ang nangungunang siyudad sa NCR na may pinaka maraming naisagawang COVID-19 testing kung saan hanggang nitong Oktubre 30, ay umabot na sa 221,347 RT-PCR tests ang naisagawa sa lungsod. —sa panulat ni Hya Ludivico

Mananatiling nakasailalim sa Modified Enhanced Community Quarantine (MECQ) ang Zamboanga City dahil sa pagbaba ng kaso ng COVID-19 sa lugar.

Batay sa resolusyon na inilabas ng Inter-Agency Task Force for the Management of Emerging Infectious Diseases, mananatili sa MECQ ang lungsod hanggang Nobyembre 15.

Sa ngayon ay mayroong 20,887 kaso ng COVID-19 sa Zamboanga City, na may 2,333 active cases. —sa panulat ni Hya Ludivico

Hindi na obligadong magpakita ng COVID-19 test result ang mga bakunadong biyahero na papasok o lalabas sa lalawigan ng Marinduque.

Ayon kay Governor Presbitero Velasco Jr., hindi na rin hihingian ng COVID-19 test result ang mga residenteng lalabas ng lalawigan basta’t babalik agad sa loob ng tatlong araw.

Sinabi pa ni Velasco na kailangan ng valid na rason kung bakit pupunta sa lalawigan, Authorized Person Outside Residence (APOR) man o non-APOR.

Maliban dito, daraan rin sa pagsusuri ng Rural Health Unit (RHU) na nasa pantalan ang mga miyembro upang matiyak na walang sintomas ng sakit ang sinumang papasok sa lugar. —sa panulat ni Hya Ludivico

Naghihimas ngayon ng malamig na rehas na bakal ang isang driver matapos umanong mahulihan ng dalawang milyong pisong halaga ng hinihinalang shabu sa buy-bust operation sa Barangay Bunawan, Davao City.

Isang pulis ang nagpanggap na buyer kaya’t naging madali ang pagdakip kay alyas “Brad,” talumpu’t pitong taong gulang, at residente ng nasabing barangay.

Kasong paglabag sa Comprehensive Dangerous Drugs Act of 2002 ang isasampa laban sa suspek.

Malagim ang sinapit ng dalawang rider matapos masawi nang magsalpukan ang mga sinasakyan nilang motorsiklo sa Roxas City, Capiz.

Dead on arrival sa ospital sina Mike Anoche at Gesmark Alborte habang sugatan naman ang tatlong angkas ng mga ito.

Lulan ng motorsiklo si Anoche kasama ang dalawang iba pa nang bumangga sa motor na minamaneho naman ni Alborte na may isang angkas.

Ayon sa mga awtoridad, bukod sa nakainom ng alak ang mga biktima at walang suot na helmet, mabilis din umano ang pagpapatakbo ng mga ito ng kanilang mga motorsiklo nang mangyari ang insidente.

Isang Community Journalist ang patay makaraang barilin sa kanyang bahay sa bayan ng Bansalan, Davao del Sur.

Kinilala ng National Union of Journalists of the Philippines ang biktimang si Orlando “don don” Dinoy, Reporter ng Newsline.ph at Block time Anchor ng Energy Fm – Digos.

Ayon sa Bansalan Municipal Police, pasado ala sais kagabi nang biglang sumulpot ang isang hindi nakilalang lalaki at binaril sa ulo si Dinoy.

Nagsasagawa na ng malalimang imbestigasyon ang pulisya.

Naganap ang insidente isang araw matapos inilabas na report ng Global Impunity Index ng US – Based Committee to Protect Journalists na pang-7 ang Pilipinas sa bansang pinaka-mapanganib para sa mga mamamahayag. —sa panulat ni Drew Nacino