RONDA PROBINSYA

Arestado ng mga otoridad ang dalawang indibidwal na sangkot sa iligal na droga sa Naga City.

Kinilala ang mga suspek na sina Marvin Geroy, 29-anyos at Joel Tapel, 53-anyos na nakuhanan ng iligal na droga na nagkakahalaga ng mahigit P374,000.

Naga City Police Office, isang poseur buyer ang bumili sa mga suspek ng isang pakete ng pinaghihinalaang shabu sa halagang P150,000.

Nang makumpirma ang nasabing transaksiyon ay agad na dinakma ng mga pulis ang mga suspek.

Nakuha sa mga suspek ang tatlong piraso ng heat sealed transparent plastic sachet ng hinihinahalang shabu na may timbang na 2.5 gramo at nagkakahalaga ng P17,000.

Kabuuang 55 gramo ng shabu ang nakumpiska ng mga otoridad sa mga suspek na mahaharap sa kasong paglabag sa RA 9165 o Comprehensive Dangerous Drug Act of 2002. —sa panulat ni Angelica Doctolero

Arestado ng Quezon City Police District ang dalawang suspek matapos ang ginawang pangloloko sa may-ari ng isang mini-grocery store sa Quezon City.

Ayon sa biktima, nag-offer ang mga suspek ng murang grocery supply items para sa kaniyang tindahan na nagkakahalaga ng mahigit 100,000 piso.

Nang matapos ang pakikipagtransaksiyon ng biktima sa mga suspek ay dito na napag-alaman na ang iba sa mga kahon ay wala umanong laman habang ang ibang items naman ay hindi umano kasama sa inorder ng biktima.

Dito na nagsumbong ang biktima sa mga otoridad kung saan, agad na naaresto ang mga suspek matapos makuhanan sa isang CCTV sa nabanggit na lugar.

Dahil dito, nagpaalala ang mga otoridad na mas mainam parin kung bumili nalang sa lehitimong groceries upang maiwasan ang insidente ng panloloko. —sa panulat ni Angelica Doctolero

Patay ang isang chinese national matapos pagbabarilin ng hindi pa nakikilalang suspek sa Brgy. Pinyahan, Quezon City.

Sa imbestigasyon ng mga tauhan ng Quezon City Police District (QCPD)- Criminal Investigation and Detection Unit (CIDU), kinilala ang dayuhang biktima na si Jefferson Dy Tan, 25-anyos.

Ayon sa ama ng biktima, natagpuan niyang nakaluhod sa gilid kama ang kaniyang anak at may tama ng bala sa ulo at dibdib.

Sa nakuhang CCTV footage ng mga otoridad, makikita na isang puting van ang dumating at nakitang pumasok sa bahay ng biktima.

Matapos ang ilang minuto ay agad lumabas ang mga sakay ng van saka nagtungo sa direksiyon ng mapang-akit street sa nabanggit na lungsod.

Iniimbestigahan pa ng mga otoridad ang motibo sa naganap na krimen habang tinutugis narin ang mga salarin. —sa panulat ni Angelica Doctolero

Hindi palalampasin ni Philippine National Police (PNP) Chief P/Gen. Guillermo Eleazar ang ginawang pang-aabuso ng isang Precint Commander sa General Santos City.

Ito’y matapos siyang ireklamo ng panununtok, pananampal at pagbabanta sa kaniyang mga tauhan na pawang mga  Non-Commissioned Officers.

Kinilala ang sinibak na si P/Capt. Nemecio Calipjo Jr na siyang Commander ng Police Community Precint 8 ng General Santos City Police Office na nasa Brgy. Tinagacan.

Batay sa ulat na nakarating sa Kampo Crame, lango sa alak si Calipjo nang dumating sa kanilang himpilan noong araw ng Linggo kung saan, pinag-formation niya sa harap ang kaniyang mga tauhan.

Duon niya kinastigo ang mga ito sabay pinagsusuntok, pinagsasampal at pinagbantaan pang papatayin hawak ang kaniyang M-16 rifle dahil sa reklamo ng kaniyang kaibigang hindi naaksyunan ang reklamo.

Ayon kay Eleazar, bawat Police Commander ay dapat maging mabuting halimbawa sa kaniyang mga tauhan kaya’t hindi niya kukonsintihin si Calipjo sa ginawa niyang pang-aabuso sa kapangyarihan.

Dahil dito, gumugulong na ang imbestigasyon ng Internal Affairs Service para sa kasong Administratibo dahil sa kawalan ng disiplina sa sarili, hindi pagiging maginoo sa kaniyang tungkulin. —sa ulat ni Jaymark Dagala (Patrol 9)

Mistulang ipinako na sa krus ng kahihiyan ang dalawang police trainee matapos masibak sa puwesto, sampahan ng kaso at nanganganib pang alisin sa serbisyo dahil sa panggagahasa ng isang 23 anyos na dalaga sa Rodriguez, Rizal.

Kinilala ng Rodriguez Municipal Police Station ang mga suspek na Police Trainee na sina AJ Magsino at Jack Marquez.

Ayon kay Rodriguez Chief of Police na si P/Col. Marcelino Pipo, naka-off duty na ang dalawang suspek nang magkayayaan na tumakas sa kanilang quarters para mag-inuman sa labas.

Duon inimbitahan ng Trainee na si Magsino ang kaniyang textmate na babae at saka inaya na magcheck-in sa kalapit na motel kung saan ito halinhinang ginahasa.

Ito ang nagtulak sa biktima na magpasaklolo sa mga pulis kung saan agad naaresto ang sina Magsino at Marquez at sinampahan ng kasong rape.

Maliban sa kasong kriminal, umuusad na rin ang kasong Administratibo laban sa dalawang Police Trainee sa Regional Training Center ng CALABARZON PNP. —sa ulat ni Jaymark Dagala (Patrol 9)

Arestado ang riding-in-tandem suspect matapos kaladkarin ang babaeng biktima sa Sampaloc, Maynila.

Sa nakuhang CCTV footage ng mga otoridad, makikitang naglalakad sa gilid ng kalsada ang isang babae ng biglang may tumabing motorsiklo at hinablot ang dala nitong bag.

Nakaladkad ang biktima at muntikan pang mabangga ng isang kotseng kasunod ng nabanggit na motorsiklo.

Agad namang naaresto ng mga otoridad ang dalawang suspek matapos masita dahil walang suot na helmet at wala ding plaka ang motor na kanilang ginamit.

Nakuha sa mga suspek ang isang baril at nabawi ang bag na pagmamay-ari ng biktima na naglalaman ng wallet at mga IDs.

Ayon sa hepe ng Sta. Cruz Police Station na si Plt. Col. John Guiagui, modus na ng mga suspek ang mga biktimang naglalakad na may mga dalang bag at cellphone.

Nagpaalala naman ang mga otoridad sa publiko na magdoble ingat lalo na kung nasa kalsada dahil tumataas ngayon ang kaso ng nakawan sa bansa lalo’t papalapit na ang kapaskohan. —sa panulat ni Angelica Doctolero

Hinuli ng mga tauhan ng National Bureau of Investigation ang anim na miyembro ng isang pamilya dahil sa pagpatay sa isang biktima sa Cebu.

Ayon sa National Bureau Investigation (NBI) Central Visayas, minurder ang isang lalaking kinilalang si Romneck Potot na natagpuang patay malapit sa kanilang bahay sa barangay Manlagtang Bayan ng Tabogon sa Cebu.

Sa imbestigasyon ng mga otoridad, nakitaan ng mga pasa at mga sugat ang inaagnas na katawan ng biktima makaraang matagpuan tatlong araw matapos ang maireport na nawawala.

Nito lamang Hunyo ay kinasuhan ng NBI Region 7 ang asawa ng biktima na kinilalang si Geraldine Potot at mga biyenan ng biktima matapos masangkot sa naturang krimen.

Kabilang sa mga inaresto ang father in-law ng biktima na si Fausto Gerry Deligero at ang kaniyang asawa na si Imelda Deliguero maging ang kamag-anak nilang sina Willin Sopsop, Zaldie Sopsop, Arlene Flores at Jose Bandojo habang nanatili namang nakalaya ang asawa ng biktima na hinimok na sumuko at harapin ang nagawang krimen.

Sasampahan ng kasong murder ang mga naarestong suspek habang may nakabinbing warrant of arrest naman kay Geraldine na mahaharap sa kasong Parricide. —sa panulat ni Angelica Doctolero

Tinupok ng apoy ang pampublikong ospital kahapon ng madaling araw sa siyudad ng Pagadian, Zamboanga Del Sur kung saan nakalagay ang mga suplay ng bakuna laban sa COVID-19.

Ayon kay Zamboanga Del Sur Medical Center (ZDSMC) Chief Dr. Anatalio Cagampang Jr., kabilang sa mga napinsala ang mga bakunang Aztrazeneca, Moderna, Pfizer at Sinovac.

Kasama ang mga bakuna para sa Hepatitis, Measles at Polio.

Gayunman, hindi matukoy ni Cagampang kung ilang doses ng bakuna ang nasira dahil nagpapatuloy pa ang imbestigasyon ng Bureau of Fire Protection. —sa panulat ni Airiam Sancho

Patay ang barangay chairman ng Barangay 143 Caloocan matapos pagbabarilin ng hindi pa nakikilalang riding-in-tandem.

Ayon sa inisyal na imbestigasyon,nakaupo lang umano sa kaniyang tindahan ang biktima nang bigla itong pagbabarilin ng isa sa mga salarin.

Idineklarang dead on the spot ang Kapitan habang sugatan naman ang asawa nito na kasama niya nang mangyari ang insidente.

Samantala, sinabi ni Alexander Dulce, Executive Officer ng naturang barangay na wala silang makitang motibo sa pagpatay sa kapitan dahil wala umano silang kilalang kaaway nito. —sa panulat ni Airiam Sancho

Hinuli ang apat na indibidwal matapos ikasa ang drug buy-bust operation ng mga tauhan ng Marikina City Police Station.

Kinilala ang mga nahuli na sina; Jonny Yap 50-anyos; Nicodemus Eugenio, 36-anyos; John Resoso, 22-anyos at Rose Mary Ann Inamac, 31-anyos.

Nakuha sa mga suspek ang isang empty pack ng Malboro cigarette; dalawang piraso na tig 100 piso; isang piraso ng limang daang piso na ginamit bilang bust money at pitong transparent plastic sachet na naglalaman ng pinaghinalaang shabu na may timbang na 22 gramo na may street value na mahigit 149,000 piso.

Nakakulong na ngayon sa lock-up jail ng Marikina City Police Station ang mga suspek na nahaharap sa kasong paglabag sa RA 9165 Sec. 11 Art. II o mas kilala sa Dangerous Drugs Act of 2002.  —sa panulat ni Angelica Doctolero