RONDA PROBINSYA

Nahulog sa kamay ng mga awtoridad ang mag-asawang tulak umano ng ipinagbabawal na droga sa ikinasang buy-bust operation sa Brgy. Pinagsama, Taguig City.

Kinilala ang mga suspek na si Yolanda Flores, 37 taong gulang, manikyurista, at Wargil Fallarcuna, 42 taong gulang, at kapwa nakatira sa nasabing lugar.

Isang pulis ang nagpanggap na buyer kaya’t nadakip ang mag-asawa kung saan nasabat mula sa mga ito ang limang sachets ng umano’y shabu na nagkakahalaga ng 98,600 pesos, isang pitaka, at maging ang tatlong daang pisong buy-bust money.

Sasampahan ang mga suspek ng kasong paglabag sa Comprehensive Dangerous Drugs Act of 2002.

Arestado ang isang 34 na taong gulang na babae dahil sa pagkakasangkot sa kasong carnapping sa Muntinlupa City.

Matapos ang isinagawang surveillance operations, si Glenda Panganiban ay nadakip sa East Service Road sa Alabang ng pinagsanib na pwersa ng District Anti Carnapping Unit (DACU), District Intelligence Division (DID) at Muntinlupa Sub Station 3.

Si Panganiban ay hinuli sa bisa ng warrant of arrest na ipinalabas ng Muntinlupa Regional Trial Court o RTC Branch 204 dahil sa kasong paglabag sa Republic Act 10883 o New Anti-Carnapping Act of 2016.

Aabot sa 180,000 pesos ang inirekomendang piyansa ng korte para sa pansamantalang kalayaan ng akusado.

Patay ang isang barangay captain matapos pagbabarilin ng hindi pa nakikilalang salarin sa Jaen, Nueva Ecija.

Kinilala ni Central Luzon police director Brig. Gen. Mathew Baccay ang biktima na si Zoilo de Belen, 56 na taong gulang, ng Barangay Lambakin.

Sa imbestigasyon, nagdidilig ng mga halaman ang biktima sa boundary ng barangay nang paulanan ng bala ng mga armadong lalaki na sakay ng isang kotse bago mabilis na tumakas sa hindi matukoy na direksiyon.

Inaalam pa ang motibo sa naturang pamamaslang.

Nasungkit ng nag-iisang mananaya mula San Carlos City sa Pangasinan ang jackpot prize sa 6/49 Super Lotto.

Ayon sa Philippine Charity Sweepstakes Office o PCSO, natumbok ng bettor ang winning combination na 05-03-10-17-43-49 na may katumbas na premyong nagkakahalaga ng higit 125 million pesos.

Labinlimang mananaya naman ang nakahula sa limang kombinasyon kaya’t kapwa nanalo ang mga ito ng tig-50,000 piso.

Ang 6/49 Super Lotto ay binobola tuwing Martes, Huwebes, at Linggo.

Malagim ang sinapit ng limang magkakapitbahay matapos pagbabarilin at hagisan ng granada ang kanilang bahay sa Barangay Tarusanan sa Milaor, Camarines Sur.

Kinilala ni Capt. Rosalinda Moises, hepe ng Milaor Municipal Police Station, ang isa sa mga nasawing biktima na si Romeo de Leon, 72 taong gulang, kasama dalawa nitong apo na edad anim at apat na taong gulang.

Nasawi rin ang kanyang kapitbahay na si Samuel Cobilla, 21 taong gulang, at isang siete-anyos na bata.

Maliban dito, nadamay at sugatan din sa pag-atake ang isa pang menor de edad.

Unang pinasok ng mga salarin ang bahay ni de Leon at pinagbabaril ang mga ito bago hinagisan ng granada ang tahanan ni Cobilla.

Hinihinalang alitan sa lupa ang motibo sa naturang insidente.

Patay ang dalawang katao habang sugatan ang anim na iba pa sa banggaan ng tricycle at truck sa lungsod ng Sapian, Capiz.

Ayon sa imbestigasyon ng pulisya, biglang nawalan ng kontrol ang drayber ng tricycle na si Jordan Viloria kung saan sumalpok ito kasalubong na truck na minamaneho ni Vergilio Pabalona.

Dahil sa lakas ng impak ng banggaan, nawasak ang unang bahagi ng tricycle at naipit ang pasahero sa loob habang ang iba ay tumilapon sa kalsada. —sa panulat ni Airiam Sancho

Nakapagtala ng kaso ng cholera ang tatlong barangay sa bayan ng Tanza, Cavite.

Ito ang kinumpirma ni Tanza Rural Health Unit Officer Dr. Ruth Punzalan matapos makaranas ng pagdudumi at pagsusuka ang mga residente ng barangay Calibuyo, Punta One at Sahud Ulan.

Isang batang may edad isa at tatlong buwan ang una aniyang nasawi hanggang nagsunod-sunod na ito sa mga nabanggit na barangay habang isa ring mangingisda ang pinahuling tinamaan ng water-borne disease batay sa kumpirmasyon ng Research Institute for Tropical Medicine (RITM).

Samantala, inaalam na ng health authorities ang pinagmulan ng cholera outbreak sa mga naturang barangay. —sa panulat ni Airiam Sancho

Arestado ang tatlong magkakamag-anak at dalawang umano’y tulak ng droga matapos ang magkahiwalay na buy-bust operation ng otoridad sa lungsod ng Parañaque at Navotas.

Ayon sa imbestigasyon, kinilala ang mga suspek na sina alyas ‘Angel’, 26 anyos, alyas ‘Ton’, 38 anyos, at alyas ‘Ai’ na nakuhaan ng tatlong plastik ng hinihinalang shabu na may tatlong daang gramo (300g) na tinatayang may halaga na mahigit dalawang milyong piso sa Barangay San Antonio.

Samantala, nahuli rin ang dalawang umano’y tulak ng droga sa Barangay NBBS Kaunlaran sa Navotas kung saan nakuha sa mga ito ang anim na sachet ng mahigit limangpung gramo (50g) ng umano’y shabu na tinatayang nagkakahalagang mahigit tatlong daang libong piso (P346,000), isang baril, drug peraphernalia at ginamit na sasakyan.

Nahaharap ang mga suspek sa kasong paglabag sa RA 9165 o Comprehensive Dangerous Drug Act of 2002 at Illegal Possesion of Firearms. —sa panulat ni Airiam Sancho

Dead-on-arrival ang isang lalaki matapos malunod sa dagat na bahagi ng Barangay Amboyu-An, San Joaquin, Iloilo.

Sa ikinasang imbestigasyon ng mga otoridad, dumalo sa isang beach party ang biktimang kinilalang si Jude Paul Esteba, 25-anyos na residente ng barangay

Sa nakuhang impormasyon ng San Joaquin Municipal Police Station, naglasing ang lalaki kasama ang kanyang mga kaibigan sa dalampasigan sa nabanggit na lugar.

Nagulat na lamang sila na nawawaa na ang biktimang si Esteba na natagpuang wala nang buhay.

Inaalam pa sa ngayon ang motibo at kung sino ang salarin sa pagpatay sa biktima. —sa panulat ni Angelica Doctolero

Arestado ng mga otoridad ang isang lalaki dahil sa iligal na droga sa Bliss Compound, Rose St. Brgy. Hulo, Mandaluyong City.

Kinilala ang suspek na si Leandro Reyes Yu, 47-anyos na naaresto sa ikinasang drug buy-bust operation.

Nakumpiska sa suspek, ang tatlong plastic sachet ng shabu na may timbang na 4.3 gramo na nagkakahalaga ng mahigit P29,000.

Nakuha din sa suspek ang isang kulay brown na coin purse, isang Nokia keypad phone at P1,000 na ginamit bilang buy bust money.

Mahaharap sa RA 9165 o Comprehensive Dangerouse Drugs Act of 2002. —sa panulat ni Angelica Doctolero