NATIONAL NEWS

Hinikayat ng Philippine National Police ang mga barangay officials na maging maagap para maprotektahan ang mga nasasakupan nito laban sa anumang aksidente ngayong papalapit na Bagong Taon.

Partikular na tinukoy ni Acting PNP Chief Lt. Gen. Jose Melencio Nartatez Jr. ang paggamit ng iligal na paputok at mga baril.

Kasabay nito, tiniyak ni Lt. Gen. Nartatez na kabahagi ang pulisya sa pagtiyak ng kaligtasan ng publiko.

Pinaalalahanan din ng hepe ng pambansang pulisya ang publiko na maging maingat sa selebrasyon.

Hinimok ng Department of Trade and Industry ang publiko na bumili lamang ng paputok mula sa mga lisensyadong manufacturers, sa gitna ng papalapit na Bagong Taon.

Pinaalalahanan din ng DTI ang publiko na iwasan ang pagbili ng generic fireworks na walang label, laging basahin at sundin ang instructions bago gamitin, at huwag gamitin kung hindi tiyak ang kaligtasan.

Gayundin, huwag pulutin ang paputok na hindi sumabog at huwag itong gamitin para sa biro o panggugulat sa iba.

Pinayuhan din ang publiko na panatilihing nakasarado ang mga bintana at pintuan para hindi makapasok ang mga paputok, at laging manatili sa ligtas na distansya habang nanonood.

Hinikayat din ng DTI ang sinumang magsisindi ng paputok na gumamit ng mahabang pole at magsuot ng goggles o glasses para protektahan ang mata.

Sa panonood naman ng fireworks, mas mainam ang cotton o denim na damit kaysa polyester, at sapatos kaysa tsinelas.

Hinimok din ng DTI ang paghahanda ng balde ng tubig o hose at first aid kit para sa agarang lunas sakaling may aksidente.

Pumalo na sa halos limandaan ang tawag na natanggap ng National Center for Mental Health Crisis Hotline, mula Disyembre a-bente uno hanggang a-bente sais.

Ayon sa Department of Health, nasa mahigit animnapu’t lima katao ang tumawag matapos makaranas ng anxiety at depression sa nasabing petsa.

Habang ang natitira naman ay tumawag dahil sa problemang may kinalaman sa relasyon at mga isyung pampamilya.

Karamihan sa mga tumawag bago ang bisperas ng Pasko ay nasa pagitan ng edad a-disi otso at trenta.

Hinimok naman ng ahensya ang publiko na maging sensitibo, mabuti, at mapang-unawa sa kalagayan ng iba, lalo na ngayong holiday season.—Sa panulat ni John Riz Calata

Ibinasura ng Department of Justice ang kasong perjury na isinampa ni Senador Jinggoy Estrada laban kay dating Department of Public Works and Highways Bulacan Assistant District Engineer Brice Ericson Hernandez.

Sa resolusyong inilabas ng DOJ Office of the City Prosecutor sa Quezon City, hindi sapat ang mga ebidensya at testimong ipinresinta para patunayang nilabag ni Hernandez ang Article 183 ng Revised Penal Code.

Ipinunto ng DOJ na ang pahayag ni dating Public Works Undersecretary Roberto Bernardo kaugnay sa pagkakadawit ni Sen. Estrada sa pagtanggap ng kickback mula sa flood control project ay nagpatibay sa mga alegasyon ni Hernandez.

Nag-ugat ang reklamong inihain ni Sen. Estrada matapos ang pahayag ni Hernandez sa pagdinig sa Kamara na tumanggap ang senador ng “kickbacks” mula sa flood-control projects sa Bulacan.—Sa panulat ni John Riz Calata

Itinanggi ni Public Works Sec. Vince Dizon na in-authenticate niya ang anumang dokumentong hawak ni Batangas Representative Leandro Leviste na sinasabing nagmula sa yumaong Public Works Undersecretary Catalina Cabral.

Binigyang-diin ni Sec. Dizon na hindi pa niya nakita ang mga dokumentong hawak Rep. Leviste.

Nabatid na hinimok ng kongresista si Palace Press Officer Usec. Claire Castro na kumpirmahin ang katotohanan ng kanyang mga hawak na dokumento kay Sec. Dizon.—Sa panulat ni John Riz Calata

 Ibinunyag ni Batangas Rep. Leandro Leviste na nagkaroon umano ng bigayan ng ‘incentives’ sa mga kongresista noong aprubahan ang panukalang 2026 National Budget sa Kamara.

Ayon kay Rep. Leviste, hinugot ang naturang ‘incentives’ mula sa maintenance, operating, and other expenses (MOOE) ng Mababang Kapulungan.

Binigyang-diin ng kongresista na ang bigayan ng ‘incentives’ mula sa M.O.O.E. ang tila isa sa pinakatinatagong sikreto ng Kamara.

Bukod sa bigayan ng insentibo, isiniwalat din ni Rep. Leviste na pati ang mga consultants ng mambabatas ay binabayaran ‘in cash’ mula sa MOOE—Sa panulat ni John Riz Calata

Ibinunyag ni Senate President Pro-Tempore Panfilo Lacson na may hawak din siyang mga dokumento mula sa kampo ni dating Public Works Undersecretary Catalina Cabral at sa mismong DPWH.

Isiniwalat ni Sen. Lacson na sa kanyang mga hawak na dokumento ay may hindi bababa sa limang cabinet secretaries at ilang undersecretaries ang may bilyon-bilyong pisong allocables at non-allocables sa 2025 budget.

Ayon sa senador, kabilang dito ang isang “E.S.” na may 8.3 billion pesos, at si dating DPWH Sec. Manuel Bonoan, na nakakuha ng 30.5 billion pesos allocables noong 2025.

Ibinunyag din ni Sen. Lacson na hindi bababa sa isang cabinet member, bukod kay Bonoan, ang nakinabang sa kickback, batay sa pahayag ni dating DPWH Undersecretary Roberto Bernardo na naghatid ng pera sa nasabing opisyal.—Sa panulat ni John Riz Calata

Namumuro sa pagtatapos ng taong 2025 ang panibagong dagdag-bawas sa presyo ng mga produktong petrolyo.

Ayon kay Department of Energy–Oil Industry Management Bureau Deputy Director Rodela Romero, posibleng matapyasan ng 50 sentavos ang presyo ng kada litro ng gasolina.

Ito’y batay sa tatlong araw na trade monitoring sa Means of Platts Singapore.

Gayunman, posibleng madagdagan ng diyes sentimo ang kerosene o gaas, habang walang nakikitang paggalaw sa presyo ng diesel.

Itinurong sanhi ng DOE ang nagpapatuloy na geopolitical tension sa pagitan ng U.S. at Venezuela, maging ang walang katiyakang peace agreement sa pagitan ng Russia at Ukraine, maging ang global oversupply ng oil products.