NATIONAL NEWS

Kalusugan ang nangungunang ipinagpapasalamat ng mga Pilipino ngayong 2025, batay sa survey ng Social Weather Stations.

Sa survey na isinagawa ng SWS nitong Nobyembre a-bente kwatro hanggang a-trenta, 45-percent ng mga respondent ang nagsabing nagpapasalamat sila sa mabuting kalusugan ngayong Pasko at Bagong Taon.

Bahagyang mas mababa ito kumpara sa 47-percent noong 2024 at 51-percent noong 2023.

Sumunod sa listahan ang pagpapasalamat sa pamilya na may 29-percent, mas mataas mula 25-percent noong nakaraang taon.

Samantala, sampung porsyento naman ang nagsabing nagpapasalamat sila sa Diyos, habang anim na porsyento ang nagsabing masaya na sila dahil sa sapat na pagkain ngayong taon.—sa panulat ni Jordan Gutierrez

 Walang ipatutupad na taas-pasahe ang MRT-3 sa susunod na taon bagkus tututok ang pamunuan sa pagpapabuti ng mga pasilidad at serbisyo ng linya para sa mga pasahero.

Ayon kay MRT-3 General Manager Michael Capati, isasailalim sa rehabilitasyon ang lahat ng labing tatlong istasyon ng MRT-3 sa susunod na taon sa tulong ng Japanese maintenance provider na Sumitomo.

Popondohan anya ang proyekto sa pamamagitan ng loan mula sa Japan International Cooperation Agency o JICA.

Kabilang sa mga gagawing ayos ang repainting ng mga istasyon, pagpapalit ng tiles at wiring, pagsasaayos ng comfort rooms, at paglalagay ng mas malinaw na wayfinders para sa mga pasahero.

Magdadagdag din ng barriers at pagsasaayos ng rail platforms upang mas mapabuti ang kaligtasan at ginhawa ng mga bumibiyahe araw-araw sa MRT-3.—sa panulat ni Jordan Gutierrez

Bumaba sa 38% ang net trust rating ni Pangulong Ferdinand Marcos Jr., batay sa pinaka-latest survey ng Social Weather Stations na ginawa nitong Nobyembre 24 hanggang 30.

Nabawasan ng 3% ang naturang trust rating ng Pangulo mula sa 41% noong nakaraang taon.

Samantala, tumaas naman ang net trust ni Vice President Sara Duterte na pumalo sa 56% kontra sa 26% na walang tiwala sa kanya.

Bumagsak ang trust ng Pangulong Marcos sa kasagsagan ng anomalya sa flood control projects.

Ayon sa SWS, mula sa Balance Luzon o labas ng Metro Manila, nakakuha si Pangulong Marcos ng mataas na trust rating na +18, samantalang si VP Sara ay nakakuha ng mataas na trust rating sa Mindanao na nasa +74.

Ang Stratbase Consultancy ang nagkomisyon sa survey gamit ang face-to-face interview sa 1,200 adults na may edad 18-anyos pataas sa buong bansa.—sa panulat ni Jordan Gutierrez

Ipinasara ng Department of Migrant Workers ang tatlumpu’t dalawang illegal recruitment companies ngayong 2025.

Ayon kay Migrant Workers Secretary Hans Cacdac, ito ang pinakamalaking bilang ng closure na naitala ng ahensya sa loob ng isang taon.

Ipinunto ni Sec. Cacdac na nasa walo hanggang sampung kumpanya lamang kada taon ang naipapasara ng ahensya, habang 15 naman ang record noong 2024.

Layon pa anya ng DMW na higitan ang kasalukuyang bilang at tiyaking hindi lamang administratibo ang aksyon kundi maisampa rin ang mga kaso sa Department of Justice.

Kasabay ng pagsasara ng mga establisyemento, pinaigting din ng ahensya ang kampanya kontra illegal recruitment online.

Aminado naman si Sec. Cacdac na mas mahirap labanan ang illegal recruitment dahil lumilipat ito sa online platforms, dahilan upang palakasin pa ang koordinasyon sa social media companies at law enforcement agencies.—sa panulat ni Jordan Gutierrez

“Hindi na namin kailangang ma-lecture-an.”

Ito ang binigyang-diin ni House Deputy Speaker at Antipolo 1st District Rep. Ronaldo “Ronnie” Puno sa nais ni Batangas 1st District Rep. Leandro Legarda Leviste na mag-privilege speech ngayong araw sa plenaryo ng Kamara.

Matatandaang sinabi ni Leviste na kung siya ay papayagang makapagsalita sa Kamara mamayang hapon, kaniyang ibabahagi ang mga files na nakuha mula kay yumaong dating Usec. Maria Catalina Cabral, maging ang umano’y sikretong maintenance and other operating expenses (MOOE) fund ng Kongreso.

Para kay Puno, hindi dapat sinasayang ni Leviste ang oras ng mga mambabatas na dapat ay nakatuon lang sa pagsasaayos ng 2026 General Appropriations Act (GAA).

Iginiit ni Puno na hindi pa alam ng bagitong mambabatas ang mga pinagsasabi nito kaya mas mainam kung alamin muna nito kung lehitimo ang mga paratang at ipinupukol nito sa Kongreso.

Aniya, dadagdag lamang si Leviste sa oras na dapat ay itinutok lang sa pagbusisi ng pambansang pondo. | via Geli Mendez (Patrol 30)

Nanawagan ang Automobile Association of the Philippines (AAP) sa pamahalaan na gawing mandatory ang paglalagay ng dashcam sa lahat ng sasakyan upang mapabuti ang road safety at maiwasan ang alitan sa kalsada, kasunod ng sunod-sunod na viral road rage incidents sa bansa.

Ayon kay AAP President Augustus Ferreira, makatutulong ang dashcams upang maresolba ang mga insidente sa pamamagitan ng video review sa halip na mauwi sa pag-aaway sa kalsada.

Tulad sa ibang bansa anya gaya ng Russia, mas mabilis matukoy kung sino ang may kasalanan kapag may malinaw na ebidensya mula sa dashcam, at hindi na kailangan ng pisikal na sakitan sa gitna ng daloy ng trapiko.

Ipinunto rin ni Ferreira na nagiging mas disiplinado ang mga driver kapag alam nilang may nagbabantay, katulad ng epekto ng mga camera sa ilalim ng no contact apprehension policy.

Mandatory na paglalagay ng dashcams sa mga sasakyan upang maiwasan ang mga road rage, ipinanawagan ng AAP

Bukod sa dashcams, iminungkahi rin ng AAP ang pagdaragdag ng psychological training sa driving school curricula upang matugunan ang agresibong pagmamaneho.

 Sasalubong sa mga motorista sa Bagong Taon ang toll hikes sa South Luzon Expressway (SLEX) at Southern Tagalog Arterial Road (STAR) Tollway.

Ayon sa Toll Regulatory Board o TRB, simula January 1, 2026 ay ipatutupad na ang sumusunod na taas-singil sa SLEX:

Alabang hanggang Calamba

Class 1 – ₱126

Class 2 – ₱253

Class 3 – ₱379

Calamba hanggang Sto. Tomas

Class 1 – ₱34

Class 2 – ₱68

Class 3 – ₱102

Sa Calamba hanggang Sto. Tomas section naman, ipatutupad ang ₱3, ₱5, at ₱8 na dagdag-singil sa Class 1, 2, at 3 vehicles.

Samantala, sa STAR Tollway, aarangkada ang mga sumusunod na toll hikes:

Sto. Tomas hanggang Lipa (Section 1)

Class 1 – ₱60

Class 2 – ₱119

Class 3 – ₱179

Lipa hanggang Batangas (Section 2)

Class 1 – ₱53

Class 2 – ₱106

Class 3 – ₱159

Kasabay nito, ipinaliwanag ng TRB na sa pamamagitan ng taas-singil ay matitiyak ang tuloy-tuloy na operasyon, maintenance, at improvements ng SLEX at STAR Tollway.

Magpapatupad ang Philippine National Police ng bagong guideline sa paggamit ng social media bilang ebidensya sa mga kriminal na kaso, kasunod ng inilabas na gabay ng Korte Suprema.

Ayon kay PNP Acting Chief Lt. Gen. Jose Melencio Nartatez Jr., makatutulong ang malinaw na gabay sa mga imbestigador para ma-validate at maipresenta nang maayos ang mga digital evidence.

Upang maipatupad ang bagong patakaran, inatasan ng pambansang pulisya ang lahat ng kaugnay na unit na gumamit ng advanced tools sa pag-trace, pag-beripika, at pag-preserve ng digital evidence.

Magkakaroon din ng koordinasyon sa social media platforms, kabilang ang Facebook, X, Instagram, at TikTok para mas mabilis ma-beripika ang mga account sa mga kasong kriminal.

Pinayuhan ni Lt. Gen. Nartatez ang publiko na agad i-report ang online crimes at magbigay ng credible na ebidensya tulad ng screenshot na may timestamp, URL, o communication logs.

Kinumpirma ng Bureau of Jail Management and Penology na walang personal na pagbisita mula sa kanyang pamilya ang contractor na si Sarah Discaya noong Pasko habang nakakulong sa Lapu-Lapu City Jail sa Mactan, Cebu.

Sinabi ni BJMP Spokesman Superintendent Jayrex Bustinera na online visits lamang ang pinapayagan kay Discaya, at karamihan sa kanyang mga pakikipag-ugnayan ay sa pamamagitan ng kanyang abogado.

Dagdag pa ni Supt. Bustinera, ang pagkain ng nasabing contractor ay ipinadadala mula sa labas at masusing iniinspeksiyon bago pahintulutang maipasok.

Si Discaya at walo pang dating opisyal ng Department of Public Works and Highways sa Davao Occidental ay dinala sa Lapu-Lapu City Jail noong Disyembre a-disi nuebe matapos maglabas ng warrant of arrest laban sa kanila dahil sa sinasabing ghost “flood control” project sa Jose Abad Santos, Davao Occidental.

Umabot na sa halos 80,000 iligal na paputok at pyrotechnic devices ang nakumpiska ng Philippine National Police, ilang araw bago ang Bagong Taon.

Batay sa pinakahuling update mula sa PNP, tinatayang nagkakahalaga ng 1.22 million pesos ang mga nakumpiskang paputok.

Sinabi rin ng PNP na 23 indibidwal sa buong bansa na ang naaresto sa ilalim ng kanilang Ligtas Paskuhan operations dahil sa paglabag sa Republic Act No. 7183, na nagre-regulate sa paggamit at pagbebenta ng paputok at pyrotechnic devices.

Kaugnay nito, nakaaresto ang National Capital Region Police Office ng isang 28-anyos na lalaking vendor ng sinasabing iligal na paputok sa harap ng Divisoria Mall sa Binondo, Maynila.

Nakumpiska sa operasyon ang iba’t ibang uri ng iligal na paputok, kabilang ang maraming kahon at ream ng pla-pla, tuna special, kabise special, piccolo o leopard king, 1,000-round firecrackers, at kangkong firecrackers, pati na rin ang marked buy-bust money.