NATIONAL NEWS

Isa lamang sa bawat limang Pilipino ang ganap na nakatupad sa kanilang mga New Year’s resolution.

Batay sa isang church-based survey na inilabas nitong Lunes, tanging 23.4% ng mga respondent ang nakumpleto ang lahat ng kanilang mga resolusyon.

Ipinakita rin ng survey na bahagyang natupad lamang ng karamihan ang kanilang mga layunin, kung saan aabot sa 38.3% ang nakaabot ng nasa 75% ng kanilang resolusyon, habang 4.3% lamang ang umabot sa 25% ng kanilang mga target.

Lumabas naman na mahalagang factor ang edad sa antas ng tagumpay dahil mas mataas ang porsyento ng mga nasa edad sisenta pataas, at 31 hanggang 59-years old ang nakakumpleto ng 75% ng kanilang resolusyon.

Samantala, 46.7% ng mga kabataang nasa edad 21 hanggang 30 ang nagsabing kalahati lamang ng kanilang mga layunin ang kanilang natupad.

Isinagawa ang nasabing survey mula Disyembre a-uno hanggang a-bente singko ng taong kasalukuyan.

Nanatiling pessimistic o negatibo ang pananaw ng mayorya ng mga Pilipino sa kalagayan ng bansa sa pagpasok ng taong 2026.

Batay sa pahayag-survey ng Publicus Asia, lumabas na 58% ng mga Pilipino ang nagsabing negatibo ang kanilang sentimyento sa bansa, mas mababa ito kumpara sa 70% nitong nakaraang quarter.

Umangat naman ang optimism o ang positibong pananaw sa 42%, ngunit hindi pa rin nito natatapatan ang 51% na naitala noong nakaraang taon.

Sa kabila nito, 37% ng mga Pilipino ang umaasang lalago ang ekonomiya ng bansa, pero nananatili ang kawalan ng tiwala dahil sa mga isyu ng kurapsyon, mahinang pananagutan ng mga opisyal, at kawalan ng katiyakan sa liderato ng pamahalaan.

Pinakamataas ang pessimistic sa Visayas at Mindanao, pati sa mga kabataang edad 18–20, high-income earners, government workers, at non-OFW households, habang mas mataas ang optimistic sa South Luzon at ilang bahagi ng Visayas.

Isinagawa ang survey nitong Disyembre 7 hanggang 10, na may isang libo limang daang rehistradong respondent sa buong bansa.

Pinaalalahanan ng Philippine National Police ang kanilang mga opisyal hinggil sa muling pagpapatupad ng one-strike policy laban sa indiscriminate o ilegal na pagpapaputok ng baril, sa pagsalubong ng Bagong Taon.

Ayon kay PNP Acting Chief Lt. Gen. Jose Melencio Nartatez Jr., bahagi ang one-strike policy sa kanilang security measures ngayong holiday season.

Sinumang opisyal na mapapatunayang guilty sa maling pagpapaputok ay haharap sa mga kaukulang parusang administratibo at kriminal.

Samantala, isinasaalang-alang din ng PNP ang muling paggamit ng muzzle taping sa mga baril ng mga pulis upang maiwasan ang nasabing aktibidad, pero wala pang opisyal na direktiba hinggil dito.

Pero naniniwala naman si National Police Commission o Napolcom Commissioner Rafael Vicente Calinisan na hindi na kinakailangan ang nasabing hakbang.

Nagpaalala ang Department of Labor and Employment sa mga private sector employer hinggil sa tamang pasahod ngayong araw bilang paggunita sa Rizal Day, na itinuturing na regular holiday sa ilalim ng Labor Code.

Ayon sa DOLE, may karapatan pa ring tumanggap ng 100-percent ng kanilang arawang sahod ang mga empleyadong hindi pumasok sa Rizal Day, basta’t pumasok sila o naka-paid leave sa araw ng trabaho bago ang holiday.

Para naman sa mga empleyadong pumasok ngayong araw, dapat bayaran ng employer ang katumbas ng 200-percent ng basic wage para sa unang walong oras ng trabaho, habang may dagdag namang 30-percent ang bawat oras kapag siya’y nag-overtime.

Samantala, nilinaw ng DOLE na kung tumapat ang regular holiday sa rest day ng empleyado at pumasok pa rin ito, may karagdagang 30% ang kanyang 200% holiday pay.

Suportado ng mayorya ng mga Pilipino ang agarang pagsasabatas ng isang “fully empowered body” na mag-iimbestiga sa sinasabing korapsyon sa mga infrastructure projects ng pamahalaan.

Ayon sa bagong Pulse Asia survey, 52% ng mga Pilipino ang sumang-ayon na dapat ipasa ng Kongreso ang batas na bubuo sa Independent Commission Against Infrastructure Corruption o ICAIC.

Habang 15% naman ang hindi sumang-ayon, at 33% ang neutral o undecided.

Pinakamalaki ang nakuhang suporta ng ICAIC bill sa Metro Manila na may 67%, na sinundan ng Visayas na may 61%, at iba pang bahagi ng Luzon na may 52%, habang 35% lamang ang pabor sa Mindanao.

Kung sakaling maisabatas, papalitan ng ICAIC ang Independent Commission for Infrastructure na nauna nang itinatag ni Pangulong Ferdinand Marcos Jr.

Itinanggi ni dating Senador Manny Pacquiao ang alegasyong nag-uugnay sa kanya sa 200-million pesos infrastructure projects sa ilalim ng 2025 national budget.

Ito’y matapos mapabilang ang pangalan ng dating senador bilang isa sa mga sinasabing nag-request ng flood control at road projects sa Sarangani.

Paliwanag ni Pacquiao, hindi na siya senador nang inihanda ang 2025 budget, kaya nakapagtataka ang pagdadawit sa kanya rito.

Nanindigan din ang dating senador na kahit wala na siya sa opisina, nananatili siyang tapat sa kanyang anti-corruption advocacy, at binigyang-diin ang kanyang mga rekord sa Senado, kabilang ang pagpapatalsik sa Road Board at paglaban sa maling paggamit ng public funds.

Kaugnay nito, naniniwala rin ang kampo ni Pacquiao na maaaring pagkakamali lamang o talagang paninira ang pagbanggit sa kanyang pangalan sa kontrobersya.

Naniniwala si Baguio City Mayor at dating Independent Commission for Infrastructure special adviser Benjamin Magalong na wala nang may gustong maging commissioner o maging bahagi ng ICI.

Ito’y kasunod ng pagbibitiw sa pwesto ng mga commissioner nito tulad nina Comm. Rogelio Singson at Comm. Rosana Fajardo.

Ayon kay Mayor Magalong, kahit posibleng mayroon pang intensyon ang appointing authority o si Pangulong Ferdinand Marcos Jr. na magtalaga ng mga bagong commissioner, maaaring wala na rin anyang magvo-volunteer para sa posisyon.

Aniya, kung wala nang quorum ang komisyon, hindi na nito maipagpapatuloy pa ang kanilang mandato, at kung wala na ring mapipili pang ibang commissioner, posibleng i-terminate o tuluyan na itong buwagin.

Sa kasalukuyan, tumatayo na lamang bilang miyembro ng ICI sina Chairman Andres Reyes Jr., Executive Director Brian Keith Hosaka, at Special Adviser Rodolfo Azurin Jr.

Kumpiyansa si House Appropriations Committee chairperson at Nueva Ecija Rep. Mikaela Suansing, na walang maivi-veto na anumang probisyon si Pangulong Ferdinand Marcos Jr.

Kasunod ito ng ratipikasyon ng Bicam eral Conference Committee o Bicam Report matapos pagbotohan sa pamamagitan ng “viva voce” o boses sa plenaryo ng Kamara.

Ayon kay Suansing, “confident” siya na walang probisyon ng 2026 National Budget o Fiscal Year 2026 General Appropriations Bill o GAB ang mai-viveto ni PBBM.

Nilinaw ng Nueva Ecija solon, na limang beses nilang proof-read at maayos na nailatag ang lahat ng special provisions, general provisions, at mga numero sa proseso ng budget.

Iginiit ni Suansing, na walang insertions o mga tagong pondo na isiningit sa 2026 budget dahil lahat aniya ay dumaan sa masusing deliberasyon ng Kongreso at nakabatay sa pangangailangan ng bawat distrito.

Sa ngayon, ang pagrerebyu at pirma na lang ni Pangulong Marcos ang hinihintay para tuluyang maipasa ang 2026 National Budget.