NATIONAL NEWS

Masusing sinusuri ngayon ng Malacañang ang ratipikadong 2026 General Appropriations Act matapos itong pormal na matanggap ng Palasyo mula sa Kongreso noong Disyembre a-bente-nuwebe.

Ayon kay Executive Secretary Ralph Recto, personal na binubusisi ni Pangulong Ferdinand Marcos Jr., kasama ang mga miyembro ng kanyang gabinete, ang bawat alokasyon at probisyon ng panukalang pambansang budget.

Layunin nitong tiyakin ang integridad ng GAA at matukoy ang mga pagbabagong ipinasok kumpara sa orihinal na National Expenditure Program.

Binigyang-diin ni Sec. Recto na sisikapin ng administrasyon na matiyak na ang 2026 GAA ay hindi lamang sumusunod sa lahat ng legal at teknikal na rekisito, kundi higit sa lahat ay tunay na tumutugon sa pangangailangan at kapakanan ng mamamayang Pilipino.

Tiniyak ng Kamara na hindi na mauulit ang paghugot ng pondo sa unprogrammed appropriations para gamitin sa infrastructure programs gaya na lang ng kontrobersyal na flood control projects.

Ito ang sinabi ni House Appropriations Committee Chairperson at Nueva Ecija Rep. Mikaela Suansing, na may mga nakasaad na special provisions sa unprogrammed appropriations para limitahan at kung para saan lang ang paggamit nito at hindi na kasama dito ang flood control o infrastructure projects.

Iginiit ni Congresswoman Suansing na inalis na ng Bicameral Conference Committee ang Strengthening Assistance for Government Infrastructure Programs o SAGIP na pinagkukuhanan ng pondo para sa proyekto ng flood control at sinasabing isa sa pinagmumulan ng insertions sa UA.

Maaari lamang anyang gamitin ang UA para sa foreign-assisted projects na pinasok ng bicam dahil malalim ang pagsisiyasat at bahagi ito ng multilateral partners ng bansa gaya ng JICA.

Kasama rin sa mga maaari lang makagamit ng UA ay ang AFP modernization at Marawi Rehabilitation Program.

 Tiniyak ng Department of Health na wala pang naitatalang kaso ng “superflu” sa Pilipinas.

Ito’y sa kabila ng pagtaas ng kaso ng nasabing sakit sa Estados Unidos at mga nauusong sakit tuwing amihan season.

Paalala ni Health Secretary Ted Herbosa sa lahat na manatili na lamang sa bahay kapag mayroong nararamdaman, tulad ng ubo at sipon ngayong December holiday season.

Kasabay nito, tiniyak din ni Sec. Herbosa ang patuloy na pagbabantay ng DOH sa banta ng nasabing sakit.

Isa sa bawat dalawang Pilipino ang pabor sa panukalang anti-dynasty bill at nais itong maipasa kaagad.

Ayon ito sa Pulse Asia Research na isinagawa mula December 12 hanggang 15, kung saan 54 na porsyento sa 1,200 respondents nito ang nagsabing sang-ayon sila sa agarang pagsasabatas ng anti-dynasty bill.

Pinakamataas na bilang ng mga pabor sa agarang pagpasa ng anti-dynasty bill ay mula sa Metro Manila sa 69 percent; sinundan ng nalalabing bahagi ng Luzon at Visayas na tig-59%; at mga miyembro ng Class D sa 57%.

Samantala, labing-walong porsyento naman ng mga Pilipino ay kontra sa pagpasa sa nasabing panukala, at pinakamataas dito ay mula sa Mindanao na nasa 27%.

Kasabay nito, lumabas din sa survey na 52 percent ng mga respondent ang nakikitang kailangang talagang buuin ang Independent Commission Against Infrastructure Corruption, na tututok sa katiwalian sa infrastructure projects.

Iginiit ni Senador Robin Padilla na dapat nang amyendahan ang Konstitusyon upang matanggal o malimitahan ang kapangyarihan ng Kongreso na magpasok ng amendments sa panukalang pambansang budget.

Ayon kay Senador Padilla, dapat ikunsidera ito ni Senador Kiko Pangilinan na chairman ng Senate Committee on Constitutional Amendments and Revision of Codes and Laws upang maiwasang maabuso ng mga tiwali na nasa posisyon ang naturang budget.

Batid din anya na matagal bago mapa-amyendahan ang Konstitusyon dahil may pagtatalo pa kung hiwalay o magkasamang magbobotohan ang Senado at Kamara, kaya’t isinusulong nya ang kanyang mahiya naman kayo bill o Senate Bill Number 1299.

Ipinagbabawal sa nasabing bill na mag-initiate, mag-endorso o magsingit ng pondo para sa anumang proyekto sa Annual National Budget ang mga senador at kongresista habang ginagawa o matapos gawin ang national budget.—Sa panulat ni Jordan Gutierrez

Pagkontrol sa inflation rate sa bansa ang dapat unang tugunan na isyu ng pamahalaan.

Batay sa Pulse Asia survey, aabot sa 59% ng mga Pilipino ang nagsabing inflation ang pangunahing alalahanin dahil sa mahal na bilihin sa bansa.

Tumindi rin ang panawagan ng publiko sa pagsugpo sa katiwalian sa pamahalaan na may 48%, habang nasa 39% ang umaasa sa pagtaas ng sahod ng mga manggagawa.

Lumabas sa survey na lahat ng rehiyon sa bansa pinamamadali ang pag-aksyon ng pamahalaan sa isyu ng tumataas na inflation rate.

Isinagawa ang nasabing survey sa isanlibo dalawandaang respondent mula Disyembre a-dose hanggang a-kinse ng kasalukuyang taon.—Sa panulat ni Jordan Gutierrez

Target palakasin ng Department of Energy (DOE) ang renewable energy at energy security ng bansa sa taong 2026.

Ayon kay Energy Secretary Sharon Garin, pagtutuunan ng kanilang ahensya ang clean energy at mas matatag na supply ng kuryente.

Layunin din anya ng DOE na bawasan ang pagdepende sa coal at diesel, lalo na sa mga island grids kung saan nasa 7-percent lamang ang bahagi ng renewables.

Sa kabila ng mga panganib sa malalaking proyekto, nananatiling kumpiyansa ang DOE na maabot ang 3,300-megawatt offshore wind target sa ilalim ng Green Energy Auction, ang mekanismong nagbibigay ng proyekto sa mga developer na may pinakamababang alok na presyo.

Pinaboran ng Korte Suprema ang isang buntis BPO employee na nakaranas umano ng diskriminasyon sa kanyang trabaho.

Sa desisyon ng korte, inutusan ang BPO company na bayaran ang dating empleyado ng buo niyang back wages, separation pay, at ₱250,000 bilang danyos, kasama ang attorney’s fees at interes, dahil sa paglabag sa Magna Carta of Women.

Ayon sa Korte Suprema, ang paglilipat sa empleyado sa malalayong work assignment habang siya ay buntis ay nagdulot ng hirap at hindi makatarungang kondisyon sa trabaho, na itinuring na constructive dismissal.
Binigyang-diin ng korte na kahit may resignation letter, maaari pa ring ituring na sapilitan ang pagbibitiw kung ito ay dulot ng diskriminasyon at hindi makataong pagtrato.

Giit ng Korte Suprema, may karapatan ang mga buntis na empleyado sa patas at makataong kondisyon sa trabaho.

Isa lamang sa bawat limang Pilipino ang ganap na nakatupad sa kanilang mga New Year’s resolution.

Batay sa isang church-based survey na inilabas nitong Lunes, tanging 23.4% ng mga respondent ang nakumpleto ang lahat ng kanilang mga resolusyon.

Ipinakita rin ng survey na bahagyang natupad lamang ng karamihan ang kanilang mga layunin, kung saan aabot sa 38.3% ang nakaabot ng nasa 75% ng kanilang resolusyon, habang 4.3% lamang ang umabot sa 25% ng kanilang mga target.

Lumabas naman na mahalagang factor ang edad sa antas ng tagumpay dahil mas mataas ang porsyento ng mga nasa edad sisenta pataas, at 31 hanggang 59-years old ang nakakumpleto ng 75% ng kanilang resolusyon.

Samantala, 46.7% ng mga kabataang nasa edad 21 hanggang 30 ang nagsabing kalahati lamang ng kanilang mga layunin ang kanilang natupad.

Isinagawa ang nasabing survey mula Disyembre a-uno hanggang a-bente singko ng taong kasalukuyan.