NATIONAL NEWS

Tiniyak ng Department of Public Works and Highways na tuluy-tuloy pa rin ang iba’t ibang aktibidad sa ilalim ng “Oplan Kontra Baha” kahit sa panahon ng Kapaskuhan at Bagong Taon.

Ayon sa DPWH, ilan sa kanilang mga isinagawang hakbang ang paglilinis ng mga estero, dredging at hauling ng spoils, declogging at paglilinis ng mga drainage lines, at ang desilting sa mga waterways.

Layunin ng nasabing programa na matiyak ang maayos na daloy ng tubig sa mga pangunahing lansangan ng Metro Manila upang maiwasan ang pagbaha at masiguro ang kaligtasan ng mamamayan.

Sa pinakahuling linggo ng Disyembre, mahigit 60 percent na ng drainages ang sumailalim sa declogging, habang mahigit 7,000 cubic meters naman ang natapos sa desilting ng mga daluyan ng tubig sa iba’t ibang lugar.—Sa panulat ni Jordan Gutierrez

Dalawang sanggol ang ipinanganak sa pagsisimula ng taong 2026.

Kabilang sa mga tinaguriang New Year babies sina Yuri at Zamara na kapwa ipinanganak sa Jose Fabella Memorial Hospital sa Tayuman, Manila.

Ayon sa pamunuan ng Fabella Hospital, iniluwal ng beinte singko anyos na si Sally Alburo mula sa Cavite ang ikalawang anak na si Yuri sa pagpatak ng alas-dose ng hatinggabi o Year’s Day ngayong araw na ito.

Makalipas naman ang sampung segundo ay ipinanganak ng beinte uno anyos na si Jennilyn Dalen ang kanyang unang baby na si baby girl Zamara.

Ibinahagi ng Philippine Atmospheric, Geophysical and Astronomical Services Administration (PAGASA) na nakahanda na ang listahan ng mga pangalang itatalaga sa mga bagyong papasok sa Pilipinas para sa taong 2026.

May kabuuang 25 pangunahing pangalan at sampung auxiliary set names na gagamitin sakaling lumagpas sa dalawampu’t lima ang bilang ng mga bagyo ngayong taon.

Kabilang sa mga pangunahing pangalan ng bagyo para sa 2026 ang:

• Ada
• Basyang
• Caloy
• Domeng
• Ester
• Francisco
• Gardo
• Henry
• Inday
• Josie
• Kiyapo
• Luis
• Maymay
• Neneng
• Obet
• Pilandok
• Queenie
• Rosal
• Samuel
• Tomas
• Umberto
• Venus
• Waldo
• Yayang
• Zeny

Samantala, nakahanda rin ang auxiliary set na binubuo ng: Agila, Bagwis, Chito, Diego, Elena, Felino, Gunding, Harriet, Indang, at Jessa, na gagamitin kung sakaling kailanganin ng karagdagang pangalan ng mga bagyo sa 2026.—Sa panulat ni Jordan Gutierrez

Abiso sa mga konsyumer!

Tataas ng dalawang piso ang presyo ng kada kilo ng liquefied petroleum gas o LPG ngayong araw na ito.

Bunsod na rin ito ng pagtaas ng contract price ng naturang produkto sa world market.

Kabilang sa nag-anunsyo ang Regasco na magpapatupad ng dos pesos na dagdag sa kada kilo, epektibo simula 6 am, katumbas ng dagdag 22 pesos kada tangke.

Karagdagang P2.18 naman ang ipatutupad ng Solane.

Itinurong dahilan ni Regasco president Arnel Ty ang pagsipa ng contract price ng LPG ng Saudi Aramco na umaabot ng mahigit $33 per metric ton.—Sa panulat ni Jordan Gutierrez

Lumobo na sa dalawampu’t apat na milyong Pilipino ang “functionally illiterate”.

Ayon sa Second Congressional Commission on Education, tumutukoy ang “functionally illiterate” sa mga taong marunong magbasa at magsulat ngunit hindi nakakaintindi.

Sa nasabing bilang, saklaw nito ang mga Pilipinong nasa edad sampu hanggang animnapu’t apat, habang nasa 5.8 milyon naman ang “basically illiterate”.

Natuklasan din ang malaking kakulangan sa inclusive education para sa mga batang may kapansanan.

Batay sa policy brief ng Edcom 2 at ID-Insight, mahigit 300,000 o 8% lamang ng tinatayang 5.1 million children with disabilities ang naka-enroll sa public schools sa buong bansa.

Ipinuntong dahilan ng Edcom 2 ang kakulangan sa pondo at pasilidad ng mga lokal na pamahalaan para tugunan ang nasabing kakulangan sa edukasyon.—Sa panulat ni Jordan Gutierrez

Haharapin ng 89% ng mga Pilipino ang bagong taon nang may pag-asa sa halip na takot at pangamba.

Batay sa survey ng Social Weather Stations (SWS), bahagyang bumaba ngayong taon ang nasabing bilang dahil naitala noong 2024 ang 90% at 96% noong 2023.

Sa parehong survey, 11% ng mga Pilipino ang papasok sa 2026 na may pangamba, ang pinakamataas na naitala mula pa noong 2009. Patunay ito na patuloy ang pagtaas ng bilang ng mga nag-aalinlangan sa hinaharap.

Isinagawa ang fourth quarter 2025 SWS survey nitong Nobyembre 24 hanggang 30 sa pamamagitan ng face-to-face interviews sa isanlibo dalawangdaang respondents sa bansa.—Sa panulat ni Jordan Gutierrez

Isang malaking tagumpay para sa edukasyon at sa kabataang Pilipino ang naaprubahan ng Kongreso na 2026 budget kung saan 1-point-35 trillion pesos ang inilaan para sa edukasyon, ang pinakamalaking pondo para sa edukasyon sa kasaysayan ng Pilipinas.

Ayon kay Senate Committee on Basic Education Chairman Bam Aquino, magreresulta ang makasaysayang pondo sa konkretong suporta para sa mga estudyante sa buong bansa.

Kasama sa 2026 budget para sa edukasyon ang 67 billion pesos para sa implementasyon ng Republic Act Number 1-0-9-3-1, o ang Free College Law, na kanyang inakda, at dagdag na pondo para sa Tertiary Education Subsidy o allowance para sa mga mahihirap na estudyante.

Inilaan din ang 68 billion pesos para sa pagpapagawa ng mga silid-aralan, at 25-point-6 billion pesos para sa School-Based Feeding Program, na parehong mas malaki ang alokasyon kaysa noong 2025 budget.

Nagbabala ang Philippine Army na may katapat na parusa ang sinumang sundalo na mapatutunayang gumamit ng baril bilang pagdiriwang sa pagsalubong sa Bagong Taon.

Ayon kay Army Spokesman Colonel Louie Dema-ala, tiwala siya na mananatiling propesyonal ang bawat sundalo kaya’t hindi na kailangang busalan ang mga service firearm ng mga ito bilang preventive measure laban sa celebratory at indiscriminate gunfire.

Nauna nang nagpaalala ang Armed Forces of the Philippines sa lahat ng military personnel nito na pairalin ang disiplina at propesyonalismo sa kanilang pagtupad sa kanilang sinumpaang tungkulin.

Matatandaang may naitala nang isang nasawi dahil sa isang insidente ng indiscriminate firing sa Tondo, Maynila noong Araw ng Pasko, habang pitong iba pa, kabilang ang isang pulis, ang inaresto dahil sa pagpapaputok ng baril mula Disyembre 16 hanggang 26.

 Binigyang-diin ni Senate President Pro Tempore Panfilo “Ping” Lacson na dapat maunawaan at tanggapin ni Pangulong Ferdinand Marcos Jr. na dapat na hindi selective ang kanyang administrasyon sa pagpapapanagot sa mga sangkot sa mga flood control anomalies; at kahit malapit sa kanya ay dapat makasuhan at mapanagot kung malinaw at malakas ang ebidensya na sangkot ito sa anomalya.

Hindi binanggit ni Sen. Lacson ang tinutukoy niyang malapit sa pangulo, pero hindi lingid sa kaalaman ng publiko na ang pinsan nitong si dating House Speaker at Leyte First District Representative Martin Romualdez ay nadadawit sa mga sinasabing insertions at kickbacks sa mga infrastructure projects ng Department of Public Works and Highways.

Giit pa ng senador, walang magagawa ang sinuman, kahit ang mga malalapit sa pangulo, kung gumawa ito ng kasalanan sa taumbayan, at dapat anya itong papanagutin.

Dapat din anyang hands-off ang pangulo pagdating sa imbestigasyon, ipaubaya na lang ito sa mga nag-iimbestiga, dahil kung hindi ay malamang maku-kwestiyon lang kung mayroong hindi makakasuhan kahit kitang-kita na na sangkot ang mga ito sa anomalya.

Dagdag pa ni Lacson, hindi dapat nagtatakda ng deadline ang administrasyon kung kailan makakasuhan at makukulong ang mga sangkot sa korapsyon.

Ang mahalaga anya ay malakas ang kaso upang hindi ma-abswelto ang mga nangungulimbat sa pondo ng bayan, bagama’t inip na inip pa rin anya ang taumbayan dahil nakita na nila ang ebidensya sa Senate Blue Ribbon Committee hearing, at nakita nila ang ebidensya sa mga nasasangkot sa anomalya.