NATIONAL NEWS

22 ang sugatan matapos hagisan ng granada ang isang salu-salo ng mga residente na nagdiriwang ng bagong taon sa Barangay Dalapitan, Matalam, North Cotabato.

Ayon sa pulisya, dalawang lalaki na sakay ng motorsiklo ang sinasabing naghagis ng granada sa lugar at agad na tumakas matapos ang pagsabog.

Agad rumesponde ang mga otoridad upang masigurong ligtas ang lugar at maiwasan ang karagdagang insidente.

Nagtamo ng sugat ang mga biktima at agad na isinugod sa iba’t ibang ospital kung saan sila patuloy na ginagamot. Wala namang naitalang nasawi sa nasabing pagsabog.

Samantala, mahigpit na kinondena ng mga otoridad ang pag-atake at iniutos ang malawakang manhunt laban sa mga responsable sa insidente.

Mahigpit nang ipatutupad ng Land Transportation Office ang pagbabawal sa mga e-trike sa major highways sa Metro Manila ngayong araw, Enero 2.

Kabilang sa mga saklaw ng pagbabawal ang Epifanio de los Santos Avenue o EDSA, C-5 Road, Roxas Boulevard, at Quirino Avenue to Magallanes sa South Luzon Expressway, alinsunod sa mga umiiral na patakaran ng Metropolitan Manila Development Authority.

Ayon kay LTO chief, Assistant Secretary Markus Lacanilao, nakabatay sa pangkalahatang konsiderasyon sa kaligtasan sa kalsada ang pagpapatupad ng nasabing hakbang.

Giit ni Asec. Lacanilao na mahaharap sa parusa ang mga lalabag alinsunod sa Republic Act No. 4136, o Land Transportation and Traffic Code, at Joint Administrative Order No. 2014-01, pagmumulta, at posibleng pag-impound ng e-trike.

Dagdag pa ni Asec. Lacanilao, maglalaan ng mga law enforcer ang LTO sa mga kritikal na lugar sa mga nasabing lansangan para ipaalam ang nasabing patakaran at tiyakin ang wastong pagpapatupad nito, kasabay ng panawagan ng kooperasyon sa publiko. —Sa panulat ni Anjo Riñon

Naniniwala si Senate President Vicente “Tito” Sotto III na naging oportunidad o pagkakataon ang malalaking isyu na hinarap ng bansa noong 2025 para itama ang mga pagkakamali ng Senado.

Ayon kay SP Sotto, naging daan ang usapin ng impeachment hanggang sa flood control anomalies para bumuo ng bagong pamantayan pagdating sa transparency sa pagpapasa ng pambansang budget.

Bilang Senate President, iginiit ni Sotto na tiniyak niya na sa unang pagkakataon ay bukas sa pagsusuri at partisipasyon ng publiko ang buong proseso ng pag-apruba sa 2026 budget.

Giit pa ni Sen. Sotto, sa tulong at paggabay ng Diyos, patuloy nawa silang makapagsilbi sa publiko nang may sensiridad at katapatan.

Sinabi pa ng pinuno ng Senado na “humbling experience” para sa kanya na mula sa pagiging minority leader ay naging Senate President siya sa panahong may mga kontrobersyal na isyu na kinakaharap ang Senado bilang institusyon. —Sa panulat ni Anjo Riñon

Nanindigan ang Malacañang na nasa kamay na ng Office of the Ombudsman ang pag-authenticate sa mga dokumentong tinaguriang “Leviste files,” kaugnay ng mga isyung ibinabato sa ilang personalidad sa pamahalaan.

Ayon kay Palace Press Officer Undersecretary Claire Castro, mismong si Assistant Ombudsman Mico Clavano ang nagsabi na ang mga dokumentong hawak ng ibang indibidwal at maaaring ma-edit ay hindi maaaring ituring na conclusive evidence.

Ginawa ni Usec. Castro ang pahayag matapos mabanggit o ma-tag ang Office of the President, Executive Secretary, at Office of the Special Assistant to the President sa listahan ni Batangas Representative Leandro Leviste.

Hindi anya sapat ang ganitong mga papeles upang magsilbing matibay na batayan ng anumang paratang.

Dagdag pa ng palace official, lumilitaw na maraming bersyon ng naturang mga dokumento at hindi magkakatugma ang nilalaman ng mga ito.

May ilang kopya anya na may mga handwritten annotations at pangalan ng mga Cabinet secretaries, habang ang ibang bersyon ay wala naman ng mga naturang detalye.

Binigyang-diin ni Usec. Castro na ang mga kwentong walang sapat at matibay na ebidensya ay mananatiling haka-haka lamang.

Dahil dito, hinikayat ng Palasyo ang publiko na maghintay sa magiging pahayag at opisyal na aksyon ng Office of the Ombudsman hinggil sa usapin. —Sa panulat ni Anjo Riñon

Magiging malaking hamon para sa Pilipinas ang pagpapalago sa ekonomiya nito sa 2026.

Matatandaang lumagapak ang paglago ng ekonomiya ng bansa noong 2025 bunsod ng naiswalat na katiwalian sa pamahalaan, partikular sa maanomalyang flood control projects.

Dahil dito, itinaas ng Development Budget Coordination Committee (DBCC) ang growth target ng ekonomiya sa anim hanggang pitong porsyento sa 2026, mula 5.5 hanggang 6.5% noong nakaraang taon.

Para kay Finance Secretary Frederick Go, isa sa mga bagay na kailangang gawin ng pamahalaan ay ang pinansyal na disiplina sa pamamagitan ng pag-prioritize sa mga proyektong kikita ng malaki upang muling makahikayat ng kumpiyansa mula sa mga mamumuhunan.

Ayon naman kay Department of Economy, Planning, and Development Secretary Arsenio Balisacan, mas mainam na tiisin ang mabagal na paglago ng ekonomiya sa ngayon kung hahantong naman ito sa long-term growth.

Ngunit, para sa ilang ekonomista, parehong hindi gagana ang mga estratehiya ng dalawang kalihim, at mas mainam anila kung lalo pang papalakasin ng pamahalaan ang kumpiyansa sa remittances, consumption, at mga pangunahing industriya ng bansa. —Sa panulat ni Anjo Riñon

Kinumpirma ng National Capital Region Police Office ang “generally peaceful” ang naging pagsalubong sa taong 2026.

Ayon kay NCRPO spokesperson Major Hazel Asilo, nakapansin ang pulisya ng pababang trend sa dami ng mga naputukan at sa dami ng mga nagpaputok ng baril sa taong ito kumpara noong mga nakaraang taon.

Umaasa naman si Maj. Asilo na patuloy pang bababa ang trend pagdating sa mga naputukan at nagpaputok ng baril sa pagsalubong sa bagong taon.

Samantala, iginiit din ni Maj. Asilo na nasampahan na ng kasong administratibo at kriminal at posibleng matanggal sa serbisyo ang isang pulis na naaresto dahil sa pagpapaputok nito ng service firearm sa Parañaque City, at mas marami pa rin aniyang sibilyan ang nadadawit sa indiscriminate firing. —Sa panulat ni Anjo Riñon

Sumampa na sa 288 ang kaso ng atake sa puso, stroke at hika na naitala ng Department of Health.

Ang nasabing datos ay simula Disyembre 21 hanggang kahapon, Disyembre 31.

Mas mataas ito ng 5% kumpara sa 274 cases sa parehong panahon noong isang taon.

Tinukoy ng DOH ang acute stroke o brain attack na nangungunang sanhi ng kamatayan.

Nanawagan ang Philippine National Police sa publiko na isuko na lamang sa mga otoridad ang mga paputok na hindi napaputok o nagamit sa pagsalubong sa Bagong Taon upang maiwasan ang aksidente.

Ayon kay National Capital Region Police Office chief Major General Anthony Aberin, mas ligtas na dalhin ang mga naturang firecracker sa PNP o Bureau of Fire Protection kaysa subukang itapon o sirain nang mag-isa.

May tamang proseso anya sa pag-dispose ng mga delikadong bagay, tulad ng paputok, na dapat sundin.

Binigyang-diin ni General Aberin na tanging mga sinanay at propesyonal na tauhan mula sa PNP, BFP, at Anti-Explosive Ordnance Disposal units ang dapat humawak sa pagsira ng mga paputok upang maiwasan ang pinsala at disgrasya.—Sa panulat ni Jordan Gutierrez

Makakatanggap ng dagdag-sahod ang mga minimum wage earner at kasambahay sa Northern Mindanao simula Enero a-disi sais ng kasalukuyang taon.

Ayon sa Department of Labor and Employment, inaprubahan ng Regional Tripartite Wages and Productivity Board ang 39 pesos na umento sa arawang sahod ng mga manggagawa sa sektor ng agrikultura at non-agriculture.

Ipatutupad ang wage hike sa dalawang yugto, na magtataas sa minimum wage sa rehiyon sa 485 pesos hanggang 500 pesos kada araw kapag ganap nang naipatupad.

Samantala, may 500 pesos na dagdag-buwanang sahod ang mga kasambahay, kaya’t aabot na sa 6,500 pesos ang kanilang minimum monthly pay.—Sa panulat ni Jordan Gutierrez