Patay ang tatlo katao nang umano’y ma-suffocate sa loob ng isang septic tank sa isang farm sa Barangay Sampatulog, Alubijid, Misamis Oriental.
Kabilang sa mga nasawi, ayon sa mga otoridad, ang farm manager, farm worker at ang anak nito.
Batay sa imbestigasyon, aksidenteng nahulog ng farm manager ang dalawang pliers sa septic tank habang hinihintay ang pag-subside ng tubig mula rito.
Sinasabing pumasok ito sa tangke para makuha ang pliers subalit nahilo dahil sa toxic gases at kawalan ng oxygen rito, dahilan kaya’t nag-collapse ito at nalubog sa tubig sa septic tank.
Sumaklolo naman ang isang farm worker para magbigay ng first aid subalit nadale rin ito ng masamang kondisyon at nag-collapse rin sa loob mismo ng tangke.
Makalipas ang ilang minuto, tumalon ang anak ng nasabing worker sa septic tank para tulungan ang kanyang ama subalit na-suffocate rin ito.
Binasag naman ng iba pang farm workers ang concrete wall ng septic tank para makuha ang tatlong indibidwal at kaagad humingi ng medical assistance.
Idineklarang dead on arrival sa ospital ang tatlong biktima.
