Tiniyak sa publiko ng Commission on Elections (COMELEC) na walang magaganap na power interruption o hindi magkukulang ang suplay ng kuryente sa mismong araw ng May 9, 2022 National and Local Elections.
Ayon kay COMELEC Spokesperson James Jimenez, nakikipag-ugnayan na ang kanilang ahensya sa mga pangunahing power supplier maging sa electric cooperatives sa bansa upang matugunan ang isyu ng power supply.
Sinabi ni Jimenez na noong nagsagawa ng mock elections ang COMELEC sa Pasay City noong buwan ng Disyembre ng nakaraang taon ay nagsagawa rin ng sariling parallel dry run ang Meralco.
Sa ngayon, layunin ng COMELEC na maging isang grupo o isang working group ang ibat-ibang power producers sa bansa para paghandaan ang kritikal na panahon gaya ng pagproseso sa halalan upang maiwasang maantala. —sa panulat ni Angelica Doctolero