NATIONAL NEWS

Ibinunyag ni Senate President Pro-Tempore Panfilo Lacson na may hawak din siyang mga dokumento mula sa kampo ni dating Public Works Undersecretary Catalina Cabral at sa mismong DPWH.

Isiniwalat ni Sen. Lacson na sa kanyang mga hawak na dokumento ay may hindi bababa sa limang cabinet secretaries at ilang undersecretaries ang may bilyon-bilyong pisong allocables at non-allocables sa 2025 budget.

Ayon sa senador, kabilang dito ang isang “E.S.” na may 8.3 billion pesos, at si dating DPWH Sec. Manuel Bonoan, na nakakuha ng 30.5 billion pesos allocables noong 2025.

Ibinunyag din ni Sen. Lacson na hindi bababa sa isang cabinet member, bukod kay Bonoan, ang nakinabang sa kickback, batay sa pahayag ni dating DPWH Undersecretary Roberto Bernardo na naghatid ng pera sa nasabing opisyal.—Sa panulat ni John Riz Calata

Namumuro sa pagtatapos ng taong 2025 ang panibagong dagdag-bawas sa presyo ng mga produktong petrolyo.

Ayon kay Department of Energy–Oil Industry Management Bureau Deputy Director Rodela Romero, posibleng matapyasan ng 50 sentavos ang presyo ng kada litro ng gasolina.

Ito’y batay sa tatlong araw na trade monitoring sa Means of Platts Singapore.

Gayunman, posibleng madagdagan ng diyes sentimo ang kerosene o gaas, habang walang nakikitang paggalaw sa presyo ng diesel.

Itinurong sanhi ng DOE ang nagpapatuloy na geopolitical tension sa pagitan ng U.S. at Venezuela, maging ang walang katiyakang peace agreement sa pagitan ng Russia at Ukraine, maging ang global oversupply ng oil products.

Sinisingil ni Kamanggagawa Party-list Representative Elijah San Fernando si Pangulong Ferdinand Marcos Junior sa kabiguang tuparin ang pangakong may makukulong na mga pulitikong sangkot sa maanomalyang flood control projects bago ang Pasko.

Ayon kay Congressman San Fernando, paulit-ulit nang ipinangako ni Pangulong Marcos na walang “Merry Christmas” ang mga sangkot sa korapsyon, pero lumipas na ang deadline, wala pa ring naaarestong mataas na opisyal ng pamahalaan.

Iginiit ng kongresista na puro lamang press release o pampapogi ang naririnig ng mamamayan mula noong nabulgar ang nasabing kontrobersya.

Binatikos din ni Cong. San Fernando ang pagtutok ng pamahalaan sa mga mabababang opisyal ng Department of Public Works and Highways at mga contractor.

Ipinunto ng party-list solon na kung seryoso ang Pangulo, dapat kasamang makasuhan ang mga kongresista at senador na kasabwatan ng mga utak at padrino sa mga proyekto ng flood control.

Binigyang-diin ni Cong. San Fernando na hindi papayag ang mga manggagawa at ordinaryong Pilipino na walang makulong na tiwaling pulitiko ngayong taon.

Umabot sa mahigit isang milyong Pilipino ang nakinabang sa programang “12 Days of Christmas: Libreng Sakay” ng Department of Transportation.

Ayon sa ulat, ang programa’y isinagawa bilang katuparan ng hangarin ni Pangulong Ferdinand Marcos Jr. na mabigyan ang mga komyuter ng ligtas, komportable, at masayang karanasan sa pagbibiyahe ngayong holiday season.

Nagpasalamat din ang pamunuan ng MRT-3 sa pagtangkilik ng publiko sa kanilang libreng sakay at tiniyak ang patuloy na pagbibigay ng mas maayos at ligtas na serbisyo para sa bawat commuter.

Dagdag pa ng DOTR, hindi rito nagtatapos ang kanilang serbisyo para sa mga komyuter, kundi magsisilbi itong hakbang tungo sa mas pinahusay na pampublikong transportasyon sa bansa.

Inaasahang mas marami pang Pilipino ang makikinabang sa patuloy na pagpapalawak ng Benteng Bigas Meron Na program ng Department of Agriculture.

Ito, ayon kay Agriculture Secretary Francisco Tiu-Laurel Jr., ay dahil sa inaasahang mass rollout ng programa simula sa Enero 2026 para maabot ang target na labinlimang milyong kabahayan.

Ayon sa kalihim, walong lugar ang magkakaroon ng provincial-wide rollout ng “BBM Na Program” mula sa unang dalawang buwan ng 2026, kabilang ang Pangasinan.

Habang lingguhan namang maglalabas ang D-A ng distribution schedule ng bente pesos bigas para sa mga nasa lower-middle-income class sa susunod na taon.

Pumalo na sa kabuuang 16,000 cybercrime complaints ang natanggap ng Cybercrime Investigation and Coordinating Center matapos maitala ang mahigit 6-thousand bagong reklamo ngayong 2025.

Sa Bagong Pilipinas Ngayon public briefing, sinabi ni CICC Usec. Aboy Paraiso na malaking factor o salik sa pagdami ng reklamo ang mas pinaigting na information drive at ang mas mabilis na 24-hour feedback mechanism ng hotline 1326.

Ayon kay Usec. Paraiso, nakatutulong nang malaki ang pinalakas na koordinasyon ng mga ahensya gaya ng PNP, NBI, AFP, DOJ at DICT sa mas mabilis at mas maayos na imbestigasyon ng cybercrime cases.

Giit ni Usec. Paraiso, mahalaga ang whole-of-government approach upang mapalawak ang kakayahan ng pamahalaan laban sa mga cyber threats.

Kinumpirma ng CICC official ang pakikipagtulungan ng CICC at Presidential Communications Office sa paglaban sa misinformation at disinformation.

Sa ilalim ng partnership, ang PCO ang nagmo-monitor ng mga pekeng balita habang ang CICC naman ang tumutulong sa fact-checking at pagpapa-takedown ng mga mapanlinlang na online content.

Tiniyak ng Department of National Defense na patuloy ang kanilang pagresponde sa mga insidente ngayong holiday season.

Ayon kay DND Sec. Gilbert Teodoro Jr., patuloy silang nakaalerto laban sa mga banta sa bansa—natural o man-made.

Nagpasalamat naman si Sec. Teodoro sa mga nagpapanatili ng kaligtasan ng publiko at sinigurong patuloy na nakabantay ang pamahalaan sa mga pamilya nito, kagaya ng kanilang ginagawa sa mga beterano.

Nagpaabot din ng panalangin ang kalihim sa mga biktima ng mga nagdaang kalamidad ngayong taon, sa loob o labas ng bansa, kasabay ng pagtitiyak na ginagawa nila ang lahat ng makakaya upang hindi na ulit ito maranasan ng mga Pilipino.

Nag-anunsyo na ang DPWH-NCR ng karagdagang schedule ng rehabilitasyon ng ilang bahagi ng EDSA. Bukod ito sa naunang inilabas na schedule simula Disyembre 24 hanggang December 27.

Batay sa expanded EDSA rehabilitation schedules, sisimulan sa Linggo, December 28, ang pagsasaayos sa bahagi ng EDSA kanto ng Taft Avenue hanggang FB Harrison, malapit sa Home Expo Building Depot, outer lane hanggang P. Celle Street at Ayala Underpass exit hanggang San Lorenzo Village.

Simula rin sa Linggo hanggang Enero a-singko ng susunod na taon, isasaayos ang bahagi ng Roxas Boulevard, Heritage Hotel hanggang Sergeant Mariano.

Park Avenue hanggang EDSA Orense, inner lane; ilang bahagi ng EDSA mula Orense hanggang Shell McKinley at Tramo hanggang E. Rodriguez, inner lane hanggang outer lane.

Isasaayos din simula December 29 hanggang January 5, 2026 ang bahagi ng E. Rodriguez hanggang Kalayaan Avenue, inner lane hanggang outer lane.

Roxas Boulevard hanggang FB Harrison, inner lane hanggang outer lane, simula December 31, 2025 hanggang January 5, 2026.

Inabisuhan naman ang mga motorista na asahan na ang mabigat na daloy ng trapiko sa mga apektadong lugar at pinayuhang dumaan sa mga alternatibong ruta.

Para sa karagdagang detalye, maaaring bisitahin ang official Facebook page ng DPWH-NCR at himpilan ito.